AmaHubo 94

¹Nkulunkulu wempindiselo, Jehova, Nkulunkulu wempindiselo, vela ukhanye.

²Phakama, Mahluleli womhlaba, uphindisele kwabazidlayo izenzo zabo.

³Jehova, koze kube nini ababi, koze kube nini ababi bethaba na?

⁴Bayampompoza, bakhuluma amagangangozi; bayazidla bonke abenza okubi.

⁵Isizwe sakho, Jehova, bayasiphohloza, nefa lakho balinyathela phansi.

⁶Bayabhubhisa umfelokazi nomfokazi, nezintandane bayazibulala.

⁷Bathi: “UJehova akaboni, uNkulunkulu kaJakobe akanaki.”

⁸Qaphelani nina zithutha phakathi kwabantu; nani ziwula, niyakuqonda nini na?

⁹Owenza indlebe kanakuzwa na? Owadala iso kanakubona na?

¹⁰Othethisa abezizwe, yena ofundisa abantu ukwazi, kanakujezisa na?

¹¹UJehova uyayazi imicabango yabantu ukuba ingumoya nje.

¹²Jehova, ubusisiwe lowo muntu omyalayo, omfundisayo ngomthetho wakho,

¹³wenzela ukuba umphumuze ezinsukwini ezimbi, aze ambelwe umgodi lowo ongenamthetho.

¹⁴Ngokuba uJehova akayikulahla abantu bakhe, nefa lakhe akayikulishiya.

¹⁵Ngokuba ukulunga kuyakubuyela ekwahluleleni, bonke abaqotho ngenhliziyo bakulandele.

¹⁶Ngubani oyakungimela phambi kwababi na? Ngubani oyakungelekelela kwabenza okubi na?

¹⁷Uma uJehova ebengesilo usizo lwami, umphefumulo wami ubuyakushesha ukuhlala ekuthuleni kokufa.

¹⁸Lapho ngithe unyawo lwami luyashelela, umusa wakho, Jehova, wangiphasa.

¹⁹Kubo ubuninginingi bemicabango yenhliziyo yami ukududuza kwakho kwathokozisa umphefumulo wami.

²⁰Isihlalo sobubi singahlanganyela nawe yini, leso esisebenza okubi kungathi ngomthetho na?

²¹Bahlangana ukuvukela umphefumulo wolungileyo; igazi elingenacala bayalilahla.

²²Kepha uJehova waba yinqaba yami, uNkulunkulu wami waba yiwa engiphephela kulo.

²³Uyaphindisela kubo ukushinga kwabo, abaqede ngobubi babo; uJehova uNkulunkulu wethu uyakubaqeda.