Imeum-Imeum 24

21 verses

¹TUHAN meufeureuman ubak Nabi Musa geuyue jak peusampoe peurintah-peurintah nyoe ubak bansa Israel: Ba kheueh laju minyéuk zaiton nyang murni dan nyang paleng gét keu panyöt lam Khimah TUHAN, mangat jeuet teupeu udeb dan hu sabe.

³Nabi Harun harôh geu atoe banmandum panyöt-panyöt nyan pon seupôt sampoe troh beungoh nibak teumpat TUHAN teuka, diluwa tirée nyang teutôb Peuto Peujanjian nibak Ruweueng Mahasuci. Peurintah nyan harôh jipeubuet keu siumu masa.

⁴Nabi Harun harôh geu urôh banmandum panyöt-panyöt bak gaki panyöt nyang teupeugét nibak méuh murni mangat teutab hu lam Khimah TUHAN.

⁵Cok kheueh laju dua blaih kilo gram teupông nyang paleng gét dan peugét kheueh laju dua blaih boh ruti bulat, maséng-maséng sikilo gram teupông.

⁶Keubah laju ruti nyan lam dua boh suson, tieb-tieb suson nam boh ruti, ateueh meuja nyang meulapéh ngon méuh murni nyang na dalam Khimah TUHAN.

⁷Pasoe laju keumeunyan nyang aseuli ubak tieb-tieb sinuson ruti sibago tanda bahwa ruti nyan keureubeuen peunajoh keu TUHAN.

⁸Tieb-tieb uroe Sabat harôh na ruti nyang teuhidang lam Khimah TUHAN. Nyan kheueh keuwajéban bansa Israel keu siumu masa.

⁹Ruti nyan na kheueh keu Nabi Harun dan keuturonan gobnyan. Awaknyan harôh geupajoh atra nyan bak teumpat nyang suci, sabab rutinyan sibagoe bagian nyang paleng suci nibak keureubeuen peunajoh nyang teupeuseumah ubak TUHAN keu imeum-imeum.

¹⁰Nibak khimah-khimah ureuëng Israel na sidroe ureuëng agam. Ayah jih ureuëng Meusé dan ma jih ureuëng Israel nyang nanjih Selomit, aneuëk Dibri nibak sukée Dan. Bak siuroe ureuëng nyan jimeudakwa ngon ureuëng Israel di khimah-khimah nyan. Watée meudakwa nyan, ureuëng nyan laju jikutok Po teu Allah. Sabab nyan kheueh lé ureuëng Israel jiba ureuëng nyan meuhadab ubak Nabi Musa,

¹²dan jiteun ureuëng nyan disinan sira jipréh keuputosan TUHAN keuhai peue nyang harôh awaknyan peubuet ateueh ureuëng nyan.

¹³TUHAN meufeureuman ubak Nabi Musa,

¹⁴"Gata ba laju ureuëng nyan uluwa khimah-khimah. Soe mantong ureuëng nyang ka jideungoe ureuëng nyan jikutok Ulôn, harôh jipeuduek jaroe ateueh ulée ureuëng nyan keu jibri keusaksian bahwa ureuëng nyan salah. Óh lheueh nyan banmandum umat harôh jirhom ureuëng nyan ngon batée sampoe án maté.

¹⁵Óh ka lheueh nyan jak peumaklum kheueh nyoe ubak bansa Israel: Soe mantong nyang kutok Po teu Allah ureuëng nyan harôh jitanggong akibat jih

¹⁶dan teuhuköm maté. Soe mantong nyang kutok TUHAN ureuëng nyan harôh teugeulawa ngon batée sampoe maté lé banmandum jeumaáh. Huköm nyan teutab berlaku keu ureuëng Israel dan ureuëng aséng nyang ka tinggai teutab di Israel.

¹⁷Soe mantong nyang poh maté ureuëng laén ureuëng nyan harôh teuhuköm maté.

¹⁸Soe mantong nyang poh maté beulatang ureuëng laén harôh jigantoe. Dasai jih na kheueh 'nyawöng geunantoe nyawöng'.

¹⁹Soe mantong ngon sabab jih ureuëng laén cidra, peue mantong nyang ka jipeubuet, harôh teubalah teuma ateueh ureuëng nyan.

²⁰Meunyoe jihnyan jipeupatah tuleueng, teuma tuleueng jih pih harôh teupeupatah teuma. Meunyoe jih nyan jipeubuta siblaih mata ureuëng laén, teuma mata ureuëng nyan harôh teupeubuta siblaih. Meunyoe jih jipoh ureuëng laén sampoe patah gigo, teuma gigo ureuëng nyan pih harôh teupeupatah teuma. Peue mantong nyang jipeubuet seuhingga ureuëng laén cidra, nyan pih harôh teubalaih ateueh ureuëng nyan sampoe cidra.

²¹Soe mantong nyang poh maté beulatang harôh jigantoe, teuma soe mantong nyang poh maté manusia ureuëng nyang harôh teuhuköm maté.

²²Huköm nyan teutab berlaku keu gata banmandum dan keu ureuëng aséng nyang tinggai teutab meusajan gata, sabab Ulôn kheueh TUHAN, Allah gata."

²³Óh ka lheueh Nabi Musa geupeusampoe hai nyan ubak bansa Israel, awaknyan laju jiba ureuëng nyang ka kutok Po teu Allah nyan uluwa khimah-khimah laju jigeulawa ureuëng nyan ngon batée sampoe maté. Deungon cara lagée nyan bansa Israel ka jipeubuet peue nyang ka geupeurintah lé TUHAN ubak Nabi Musa.

← Previous All Books Next →

Loading Bible Translation

First-time download in progress. This may take a few seconds…

←Bible|||

Acehnese Holy Bible Wordproject Bible