PTL Lyrics

PRAISE THE LORD LYRICS

Loading Bible Translation

First-time download in progress. This may take a few seconds…

Daily Reading Bible

✅ Shared successfully

←Bible|||

Acehnese Holy Bible Wordproject Bible

Imeum-Imeum 25

53 verses

¹Nibak ateueh Gunong Sinai TUHAN meufeureuman ubak Nabi Musa dan geuyue laju ubak gobnyan

²jak peusampoe kheueh peuratoran-peuratoran nyoe ubak bansa Israel. Meunyoe gata tatamong lam nanggroe nyang teuma geubri lé TUHAN keu gata, gata harôh gata horeumat TUHAN deungon cara lagée nyoe: Tieb-tieb thon nyang keutujoh gata hana jeuet gata pula sapeue nibak tanoh.

³Nam thon treb jih harôh gata pula banmandum lampôh atawa ladang gata, gata gunteng lampôh-lampôh anggô dan gata peusapat wase tanoh gata.

⁴Teuma tieb-tieb thon nyang keutujoh teupeu khusos keu TUHAN. Sithon peunoh nyan tanoh gata peubiyeu mantong meunan hana jeuet gata keureuja. Bék gata pula sapeue pi lam ladang dan bék gata gunteng lampôh anggô gata.

⁵Meunan cit gandom nyang timoh keudroe atawa anggô bak anggô gata keudroe nyang hana teugunteng, hana jeuet gata peusapat dan gata keubah, sabab thon nyoe na kheueh thon tanoh meureuhat.

⁶Bah kheueh meunan, tanoh nyan teuma jibri cit wase keu teupeujeuet peunajoh keu gata, namiet-namiet gata, ureuëng-ureuëng nyang tung upah nibak gata, dan ureuëng aséng nyang na tinggai deungon gata.

⁷Meunan cit keu beulatang-beulatang nyang gata peulara dan beulatang-beulatang kleuet lam nanggroe gata. Peue mantong nyang jipeuhase lé tanoh nyan jeuet teumakheun.

⁸Itong kheueh tujoh go tujoh thon, deungon jeumeulah jih peuet ploh sikureueng thon.

⁹Óh lheueh nibak tanggai siploh buleuen tujoh, bak uroe peu amphon desya, gata yue kheueh ureuëng mangat jiyueb beureuguih jeub-jeub teumpat bansaboh nanggroe.

¹⁰Harôh gata peukhusos thon nyang keu limong ploh nyan, dan gata peumaklum keuhai beubaih ubak mandum ureuëng lam nanggroe. Lam thon nyan banmandum hareuta milék nyang ka teupeubloe harôh teujok pulang ubak ureuëng po jih nyang phon atawa ubak keuturonan jih. Soe nyang jipeubloe sibagoe namiet harôh jipeuriwang ubak keuluwarga jih.

¹¹Bék kheueh gata pula ladang gata. Gandom nyang timoh keudroe jih atawa boh anggô lam lampôh anggô gata nyang hana teugunteng atra nyan hana jeuet peusapat dan gata keubah.

¹²Thon nyan na kheueh thon nyang suci keu gata. Gata teuma jeuet teupajoh peue nyang na timoh di ladang gata.

¹³Bak thon nyan banmandum tanoh nyang ka teupeubloe harôh teujok pulang ubak ureuëng nyang phon po tanoh nyan.

¹⁴Teuma meunyoe gata tapeubloe tanoh bansa droe gata ureuëng Israel, atawa gata bloe tanoh nibak ureuëng nyan, bék kheueh gata peubuet bloe peubloe nyan ngon hana jujoe.

¹⁵Yuem tanoh nyan harôh teupatok meunurot jeumeulah thon seumantong tanoh nyan mantong jibri hase trok ubak Thon Teupulang lom teuma.

¹⁶Meunyoe jeumeulah thon jih le, yuem tanoh nyan meuhái. Teuma meunyoe jeumeulah thon jih bacut, yuem jih harôh murah, sabab nyang teupeubloe na kheueh jeumeulah wase mupot.

¹⁷Bék teumipée sabe keudroe gata ureuëng Israel, teuma bah kheueh gata takot ubak TUHAN, Po teu Allah gata.

¹⁸Taát kheueh ubak mandum huköm dan peurintah TUHAN, mangat gata udeb deungon aman nibak nanggroe nyan.

¹⁹Tanoh nanggroe nyan teuma jibri wase sampoe gata na peunajoh nyang seb dan tinggai disinan deungon aman seujahtera.

²⁰Mungken na nyang teumanyong peue nyang teupajoh watée thon nyang keutujoh bak watée tanoh hana teupula sapeue dan hase jih hana teukuteb.

²¹Bak thon nyang keunam TUHAN teuma geubri beureukat ubak tanoh sampoe wase jih seb keu lhée thon.

²²Bak thon gata tapula ladang gata nyan lam thon nyang keulapan, hase nyang teupot bak thon nyang keunam mantong na keu gata pajoh. Dan keuneubah peunajoh gata nyang mantong teukeubah seb sampoe bak watée gata tapeusapat hase nibak thon nyan.

²³Pajan mantong tanoh gata hana jeuet teupeubloe, sabab tanoh nyan bukon atra gata, teuma milék Po teu Allah. Gata cit lagée ureuëng aséng nyang meuteumé idhin gata peuguna tanoh nyan.

²⁴Meunyoe saboh keubeueng tanoh teupeubloe, harôh jiaku hak milék ureuëng po phon keu teutuboh tanoh nyan.

²⁵Meunyoe sidroe ureuëng Israel ka rhot ubak gasien sampoe jih nyan teupaksa jipeubloe tanoh jih, waréh kawöm jih nyang paleng to wajéb jiteuboh tanoh nyan.

²⁶Meunyoe hana ureuëng nyang teuboh tanoh nyan teuma di ureuëng po tanoh nyan bak saboh saát hase dan na péng nyang seb keu jiteuboh tanoh nyan,

²⁷teuma ureuëng nyan harôh jibayeue ubak ureuëng nyang ka bloe tanoh jihnyan deungon yuem hase tanoh nyan sampoe bak thon-thon seulanjut jih sampoe trok ubak Thon Teupulang nyang teuma teuka. Deungon lagée nyan jihnyan ka meuteumé lom tanoh droe jih.

²⁸Teuma dilikot nibaknyan meunyoe ureuëng nyan hana daya keu jiteuboh tanoh nyan, di ureuëng nyang bloe tanoh nyan teutab na kuasa sampoe trok ubak Thon Teupulang teuma. Bak thon nyan tanoh nyan harôh teupulang ubak ureuëng po nyang phon.

²⁹Meunyoe sidroe ureuëng jipeubloe saboh rumoh lam banda nyang jikeulileng lé beuton, teuma ureuëng nyan nahak jiteuboh rumoh jihnyan lam jangka watée sithon teuhitong phon tanggai teupeubloe atra nyan.

³⁰Teuma meunyoe rumoh nyan hana jiteuboh lam watée sithon teuma gadôh kheueh hak jih keu jiteuboh rumoh nyan. Rumoh nyan teutab hak milék ureuëng nyang bloe dan keuturonan ureuëng bloe nyan. Lam Thon Teupulang, rumoh nyan hana teujok pulang.

³¹Keu rumoh di gampông nyang hana jikeulileng lé beuton keunong ubak peuratoran nyang phon lagée nibak tanoh: ureuëng nyang phon na hak jiteuboh dan rumoh nyan harôh jijok pulang nibak Thon Teupulang.

³²Teuma di ureuëng Lewi na hak keu pajan mantong jiteuboh atra milék awaknyan di banda-banda nyang ka teupeuteutab keu awaknyan.

³³Meunyoe ureuëng Lewi jipeubloe rumoh jih bak saboh banda nyan dan jihnyan hana niet jiteuboh atra nyan, rumoh nyan harôh jijok lom ubak jih nyan nibak Thon Teupulang lom teuma. Sabab rumoh ureuëng Lewi di banda-banda awaknyan na kheueh milék awaknyan nyang teutab lamkawan bansa Israel.

³⁴Teuma blang naleueng nyang bansikeulileng banda-banda sukée Lewi hana jeuet teupeubloe. Nyan na kheueh atra ureuëng Lewi keu siumu masa.

³⁵Meunyoe na ureuëng nyang saboh bansa ngon gata nyang tinggai lamkawan gata ka rhot ubak gasien dan hana hase lé jimita hareutakat keu biaya udeb jih, gata harôh gata tulông jih nyan lagée ureuëng aséng atawa jamé teuka, mangat ureuëng nyan hase udeb sabe lamkawan gata.

³⁶Bék kheueh gata lakée bungöng nibak péng nyang gata peu-utang bak ureuëng nyan, teuma bah kheueh gata tatakot ubak Po teu Allah, dan peubiyeu mantong ureuëng nyan udeb lamkawan gata. Meunan cit bék gata cok laba nibak peunajoh nyang gata peubloe keu ureuëng nyan.

³⁸Nyang kheueh peurintah TUHAN Po teu Allah gata nyang ka geupeuteubiet gata nibak nanggroe Meusé keu geubri nanggroe Kanaan ubak gata, mangat gobnyan jeuet keu Po teu Allah gata.

³⁹Meunyoe na ureuëng nyang saboh bansa ngon gata nyang rhot ubak gasien sampoe ji peubloe droe jih sibagoe namiet ubak gata, ureuëng nyan hana jeuet gata yue jimubuet lagée buet nyang jipeubuet lé namiet.

⁴⁰Ureuëng nyan harôh tinggai nibak gata sibagoe ureuëng tung upah dan jimubuet bak gata sampoe ubak Thon Teupulang.

⁴¹Bak watée nyan ureuëng nyan ngon aneuëk-aneuëk jih jeuet jitinggai rumoh gata dan jigisa ubak keuluwarga jih dan ubak tanoh indatu jih.

⁴²Ureuëng Israel na kheueh hamba-hamba TUHAN; Gobnyan kheueh nyang ba awaknyan peuteubiet nibak nanggroe Meusé, dan ngon sabab nyan awaknyan hana jeuet teupeubloe sibagoe namiet.

⁴³Jadi ureuëng Israel nyang jipeubloe droeji ubak gata hán jeuet barang gaho gata peubuet ateueh jihnyan. Bah kheueh gata teumakot ubak Po teu Allah gata.

⁴⁴Meunyoe gata na peureulée namiet, jeuet gata bloe bak bansa-bansa nyang na tinggai sikeulileng gata.

⁴⁵Meunan cit jeuet gata bloe aneuëk-aneuëk ureuëng aséng nyang na tinggai teutab lamkawan gata. Aneuëk-aneuëk ureuëng aséng nyang lahé di nanggroe gata atra nyan jeuet keuhak milék gata

⁴⁶dan jeuet cit gata peuwaréh ubak aneuëk-aneuëk gata keu jeuet keu namiet awaknyan siumu masa. Meunyoe seusabe gata ureuëng Israel hana jeuet gata peubuet ngon gasa.

⁴⁷Meunyoe na ureuëng aséng nyang tinggai lamkawan gata jeuet keu kaya, dan na teuma ureuëng gata Israel ka rhot gasien sampoe ureuëng nyan jipeubloe droe jih sibagoe namiet ubak ureuëng aséng nyan atawa ubak keuluwarga jih,

⁴⁸ureuëng Israel nyan teutab na hak keu teutuboh. Sidroe nibak syedara jih nyang agam,

⁴⁹atawa apha jih, atawa syedara karong jih atawa sidroe nyang laén nibak rakan jih nyang paleng krab, jeuet jiteuboh nyan. Atawa meunyoe jih keudroe keumungkenan mampu, ureuëng nyan jeuet jiteuboh droe jih keudroe.

⁵⁰Namiet nyan harôh jimupakat ngon ureuëng nyang ka bloe jih. Awaknyan harôh ji itong jeumeulah thon nibak phon droe jih nyan teupeubloe sibagoe namiet sampoe ubak Thon Teupulang teuma, laju jipeuteuntée yuem sineuboh jihnyan. Yuem nyan harôh teupeuteutab meunurot teu itong upah nyang teubri ubak ureuëng tung upah.

⁵¹Namiet nyan harôh jijok pulang yuem teubloe droe jih nyan nyang le jih sidub upah ureuëng tung upah nyang treb jih sithon nyang gohlom trok,

⁵³siulah-ulah jihnyan ka jimubuet sibago ureuëng tung upah nyang teugaji sithon sigoe. Toke jih hana jeuet jipeubuet ateueh ureuëng nyan deungon gasa.

⁵⁴Meunyoe jihnyan hana hase teutuboh ngon cara lagée nyan, ureuëng nyan dan aneuëk-aneuëk jih harôh teupeubeubaih bak Thon Teupulang ukeue nyan teuma.

⁵⁵Sidroe ureuëng Israel hana jeuet jihnyan jeuet keu namiet siumu masa sabab bansa Israel na kheueh hamba-hamba TUHAN. TUHAN kheueh nyang ba awaknyan teupeuteubiet nibak nanggroe Meusé. Gobnyan kheueh TUHAN, Allah awaknyan.

← Previous All Books Next →