Imeum-Imeum 26

45 verses

¹TUHAN meufeureuman, "Bék kheueh gata peugét beurala atawa gata peudong patong atawa taméh batée nyang meu-uke keu gata seumah. Ulôn kheueh TUHAN Allah gata.

²Peuraya kheueh uroe raya Sabat dan uroe-uroe raya agama nyang laén dan horeumat kheueh ubak teumpat nyang teupeu khusos keu teuseumah Ulôn. Ulôn kheueh TUHAN.

³Meunyoe gata udeb meunurot atoran-atoran nyang teuka nibak Ulôn dan gata taát peue-peue nyang Ulôn peurintah,

⁴Ulôn ku peutreun ujeuen óh trok bak watée, sampoe tanoh jibri wase dan dumna bak kayée jimeuboh.

⁵Wase tanoh gata meulimpah ruwah, dan meunyoe ka trok watée jih keu teujak pot boh anggô, gata mantong gata koh gandom. Dan meunyoe ka trok watée keu tapula gandom, gata mantong tapot boh anggô. Bak gata teuma na peunajoh nyang seb dan udeb seujahtera di nanggroe gata.

⁶Ulôn teuma Lôn jaga keuamanan nanggroe gata sampoe gata jeuet gata éh deungon teunang dan hana teumakot keu soe mantong. Beulatang-beulatang juah teuma Lôn peuranab nibak nanggroe gata, dan muprang pi teuma hana lé di nanggroe gata.

⁷Gata teuma hase tapeutaloe bubena na musoh gata;

⁸deungon limong droe gata hase tapeutaloe sireutoh droe musoh, dan deungon sireutoh droe hase tapeuloe siploh ribée droe musoh.

⁹Ulôn teuma Lôn bri beureukat ubak gata dan teuma Lôn bri aneuëk-aneuëk cucoe nyang jai keu gata. Peue nyang ka Ulôn meujanji ngon gata, pasti Ulôn peutrok.

¹⁰Wase tanoh gata teuma meulimpah ruwah, sampoe trok sithon. Sikeubit jih gata teupaksa harôh gata peuteubiet hase meuneupot gata nyang ka treb mangat na teumpat gata keubah hase meuneupot nyang barô.

¹¹Ulôn teuma tinggai lamkawan gata lam Khimah Ulôn, dan hana Lôn tulak gata.

¹²Ulôn teuma na meusajan gata; Ulôn jeuet keu Po teu Allah gata dan gata jeuet keu umat Ulôn.

¹³Ulôn, TUHAN Allah gata, nyang ba gata teupeuteubiet nibak nanggroe Meusé mangat gata bék jeuet le keunamiet. Keukuasaan nyang seupet gata ka Ulôn wiet, dan gata Ulôn peujeuet keu ureuëng nyang meurdehka."

¹⁴TUHAN meufeureuman, "Meunyoe gata hana tadeungoe Ulôn dan hana gata peubuet lagée nyang ka Ulôn peurintah,

¹⁵meunyoe gata ta iengkeue ubak janji nyang Ulôn peugét ngon gata dan hana gata taát ubak peue-peue nyang ka Ulôn peuteutab dan peuratoran-peuratoran Lôn,

¹⁶gata teuma Lôn huköm. Ulôn teuma ku peuteuka bala u ateueh gata, peunyakét ngon deumam nyang hana hase teupeupuléh, sampoe mata gata jeuet keubuta dan gata udeb meurana. Gata teuma gata pula seunaman dan hase jih hana gata teumé pajoh, sabab musoh-musoh gata teuka jijak peutaloe gata dan jipeuhabéh peue nyang gata pula.

¹⁷Gata teuma Lôn huköm, sampoe gata jipeutaloe lé musoh-musoh gata dan jikuasa lé ureuëng nyang banci keu gata. Gata teuma jeuet keu ureuëng nyang paleng geusun sampoe gata plueng, bahpi hana nyang peulet gata.

¹⁸Meunyoe ka lheueh gata rasa banmandum huköman nyan dan gata gohlom taát ubak Ulôn, huköman ateueh gata teuma Lôn tamah tujoh go ganda.

¹⁹Gata sombong lumpah na, Ulôn teuma Ulôn peutundok gata. Ujeuen hana teuma jitreun, sampoe tanoh gata ka habéh tho dan kreuh lagée beuso.

²⁰Banmandum jeureh payah gata hana meuguna. Sabab tanoh gata hana jibri wase dan mandum seunaman gata hana teuma meuboh.

²¹Meunyoe hana putôh cit gata lawan Ulôn dan hana gata tem taát ubak Ulôn, teuma huköman gata Lôn tamah lom tujoh go ganda.

²²Ulôn teuma Lôn peuteuka meubago rupa beulatang juwah lamkawan gata. Beulatang-beulatang nyan jiteugöm bubena aneuëk-aneuëk gata, jipoh maté beulatang peulara gata dan jipeuhabéh gata, sampoe jeumeulah jih tinggai bacut teuk, meunan cit rot-rot nyang na di nanggroe gata ka jeuet keu sungue.

²³Meunyoe ka lheueh gata rasa banmandum huköman nyan gohlom cit gata deungoe Ulôn, mantong cit hana gata piôh talawan Ulôn,

²⁴deungon nyan laju Lôn heuntam gata dan Lôn huköm gata tujoh goe leubeh brat nibak nyang ka-ka.

²⁵Ulôn teuma Lôn peuteuka prang lamkawan gata keu teuhuköm gata sabab ka gata iengkeue peujanjian Ulôn deungon gata. Dan meunyoe gata meusapat di banda gata keu gata jak mita teumpat meusom, Ulôn laju Lôn peutreun peunyakét nyang hana hase teupeupuléh, sampoe gata teupaksa gata seurah droe ubak musoh gata.

²⁶Gata teuma habéh peunajoh, akhéji lam siploh droe ureuëng inong teuma cit saboh teumpat tot ruti nyang na bak awaknyan. Peunajoh nyan teuma teupulang ubak gata seucara teuransom, dan óh ka lheueh gata pajoh ruti nyan, gata hana troe dan teutab mantong teurasa deuk.

²⁷Óh ka lheueh gata rasa banmandum huköman nyan gata teutab cit mantong talawan Ulôn dan hana gatatem taát ubak Ulôn,

²⁸teuma deungon beungéh gata laju Lôn heuntam, dan Lôn huköm gata tujoh goe leubeh brat nibak nyang ka-ka.

²⁹Gata teuma deuk, sampoe trok ubak aneuëk-aneuëk gata keudroe.

³⁰Ulôn teuma Lôn peuhanco bubena teumpat-teumpat seumuja gata di ateueh bukét-bukét, Lôn reuloh bubena miseubah gata teumpat gata tot dupa, dan Ulôn rhom manyét-manyét gata u ateueh beurala-beurala gata nyang ka reuloh nyan. Deungon rasa luwat

³¹banda-banda gata Ulôn peuhanco sampoe jeuet keu rungka-rungka, teumpat-teumpat seumuja gata Ulôn peuhanco dan keureubeuen-keureubeuen gata hana Lôn teurimong.

³²Nanggroe gata teuma Lôn peuhanco sapan sapa, sampoe bubena musoh nyang duek lam nanggroe nyan teuma teukeujot óh jingieng pakriban hibat hanco nanggroe nyan.

³³Ulôn teuma Lôn peuteuka prang di nanggroe gata dan Ulôn peucrebre gata di nanggroe-nanggroe aséng. Blang-blang gata teulanta, dan banda-banda gata teupeubiyeu mantong jeuet keu rungka.

³⁴Bak watée nyan teungoh gata mantong na di teumpat-teumpat nyang teuböih lam nanggroe musoh-musoh gata, tanoh gata nyang hana gata peubiyeu jipioh meusikeujab yoh watée mantong gata tinggai disinan, teuma teulanta dan na watée jimeureuhat.

³⁶Ureuëng-ureuëng gata nyang na di teumpat nyang teuböih di nanggroe laén, teuma Lôn peujeuet keuteumakot nyang luwa biasa, sampoe siôn-ôn kayée nyang jiyueb lé angén pi awaknyan ka jiplueng. Gata teuma taplueng sang-sang gata jilet lam mideuen prang, laju reubah bahpi hana musoh bak binéh gata.

³⁷Gata teuma gata plueng dan laju meugantoh sidroe ngon nyang laén, bahpi hana nyang peucrok gata. Dan gata hana teuma hase gata lawan musoh-musoh gata.

³⁸Gata teuma maté nibak teumpat nyang teuböih dan jipeubinasa lé nanggroe musoh-musoh gata.

³⁹Bacut nyang tinggai ureuëng gata nyang mantong udeb lam nanggroe musoh gata teuma meurana sabab desya gata keudroe dan desya indatu gata.

⁴⁰Teuma keuturonan gata jiaku keuhai desya jih dan desya indatu jih nyang ka jilawan Ulôn dan jibeurontak ubak Ulôn,

⁴¹sampoe Ulôn cok tindakan Lôn lawan awaknyan dan Lôn use awaknyan u teumpat nyang teuböih nibak nanggroe musoh-musoh awaknyan. Akhé jih, meunyoe keuturonan gata ka taklok dan jirasa huköman sabab desya dan brontak awaknyan,

⁴²Ulôn teuma Lôn ingat peue nyang ka lheueh Lôn meujanji ngon Nabi Yakub, Nabi Ishaq dan Nabi Ibrahim. Ulôn teuma Lôn peubarô janji Ulôn keu Lôn jok tanoh nyan ubak bansa Ulôn.

⁴³Teuma tanoh nyan leubeh ilée harôh jitinggai lé peunduduek disinan, mangat beutôi-beutôi meuteumé ji meureuhat. Dan umat Ulôn harôh jirasa banmandum huköman nyang ka Lôn peurhot ateueh droe jih sabab hana jitem taát ubak mandum peuratoran dan peue-peue nyang ka Ulôn peurintah.

⁴⁴Teuma meunyoe awaknyan mantong na di nanggroe musoh, awaknyan teutab hana Lôn tinggai atawa Ulôn peubinasa. Sabab meunyoe awaknyan Ulôn peubinasa, saban cit ka Ulôn peuputôh peue nyang ka lheueh Lôn meujanji ngon awaknyan, sabab Ulôn nyoe na kheueh TUHAN, Allah awaknyan.

⁴⁵Ulôn teuma Lôn peubarô peujanjian nyang ka lheueh Lôn peugét ngon indatu awaknyan, watée Ulôn tunyok keukuasaan Lôn ubak banmandum bansa deungon cara Ulôn ba umat Lôn nibak tanoh Meusé, mangat Ulôn, TUHAN, jeuet keu Allah awaknyan."

⁴⁶Nyan kheueh huköm-huköm dan peurintah-peurintah nyang geubri lé TUHAN di ateueh Gunong Sinai ubak Nabi Musa keu bansa Israel.

← Previous All Books Next →