Amsal 12

¹Ureuëng nyang cinta keu iéleumé peungeutahuan ureuëngnyan galak meunyoe teuseugah; teuma ureuëng nyang hana galak teuseugah na kheueh ureuëng bangai.

²Ureuëng nyang jroh geugalak lé TUHAN, teuma ureuëng nyang peuna nyang jeuhet jiteurimong huköman.

³Hana meusidroe ureuëng pih nyang hase jaya deungon buet jeuhet; teuma ureuëng jujoe teutab teuga, hana hase meuguncang.

⁴Ureuëng binoe nyang jroh na kheueh keubanggaan dan keubahgiaan lakoe jih, teuma peurumoh nyang jipeumalée lakoe na kheueh peunyakét tuleueng nyang jikurek trok lam sum-sum.

⁵Ureuëng jujoe nyang jipike na kheueh hai-hai nyang gét; seudangkan ureuëng jeuhet jireuncana tipée daya.

⁶Tutoe haba ureuëng jeuhet meumatékan; meunyoe tutoe haba ureuëng jujoe teuba ubak seulamat.

⁷Ureuëng jeuhet reubah dan binasa deungon hana beukaih; teuma ureuëng nyang jroh teutab teuga tron meutron.

⁸Ureuëng jipujoe sisuai deungon keubijaksanaan jihnyan; dan ureuëng nyang teuhina sisuai teuma deungon bangai jih.

⁹Leubeh gét jeuet keu rakyat ubit asai na buet, nibak meulagak lagée ureuëng rayeuk padahai kureueng peunajoh.

¹⁰Ureuëng nyang jroh jihiro keubeulatang peulara jih; teuma di ureuëng jeuhet jiseksa.

¹¹Ureuëng meutani nyang jimeubuet brat bak jihnyan le that peunajoh, teuma ureuëng peuhabéh watée droe nibak hai-hai nyang hana meuguna na kheueh ureuëng bangai.

¹²Ureuëng jeuhet meuheut meuteumé keulaba nibak ureuëng doraka; di ureuëng gét-gét lagée bak kayée nyang hana putôh jimubôh.

¹³Ureuëng jeuhet meucarueh ngon tutoe haba nyang brok nyang ka jipeugah; di ureuëng nyang gét meuseuliseh nibak keupayahan.

¹⁴Tieb-tieb ureuëng meuteumé keunaleueng nyang sisuai deungon tutoe haba dan buet jihnyan; maséng-maséng teubri upah nyang sisuai deungon peue nyang jipeubuet.

¹⁵Ureuëng bangai meurasa droe jih hántom na salah, teuma ureuëng bijaksana jitem deungoe naseuhat.

¹⁶Meunyoe ureuëng bangai teusinggong, nibak watée nyan cit teuma jipeugah até jih sakét that; teuma ureuëng bijaksana hana jipako meunyoe jirapa.

¹⁷Deungon teupeugah nyang beuna, ureuëng jipeudong keuadelan; deungon meusulet, ureuëng jipeuna keuhana adelan.

¹⁸Mariet nyang hana meuteuntée hase teupeuluka até lagée teusôk deungon peudeueng; dan tutoe haba nyang bijaksana lagée ubat nyang bagaih puléh watéenyan cit teuma.

¹⁹Sulet teuma deuh lam sikleb mata, teuma tutoe haba nyang beutôi teutab na siumu masa.

²⁰Ureuëng nyang jireuncana buet nyang jeuhet galak keu nyang hana ade; ureuëng nyang jiuseuha bak buet nyang jroh teuma meuteumé bahgia.

²¹Ureuëng nyang jroh hana teuma keunong musibah; dan di ureuëng jeuhet sabe lam keuadaan sosah.

²²TUHAN geubanci keu ureuëng nyang galak meusulet; teuma Gobnyan galak keu ureuëng nyang jujoe.

²³Ureuëng bijaksana hana geupeuleumah droe iéleumé peungeutahuan jih; teuma di ureuëng bangai jipeugah-peugah haijih nyang bangai nyan.

²⁴Sabab keureuja brat hana jitem meunyeurah sampoe ureuëng nyan hase jimat kuasa; meunyoe beu-o teupaksa ureuëng nyan jeuet keuhamba.

²⁵Rasa khawate teupeutah seumangat, teuma tutoe haba nyang ramah nyan kheueh nyang peurayeuk até.

²⁶Ureuëng nyang jroh leubeh meu-untông nibak teutangga jihnyan; ureuëng jeuhet sisat sabab buet nyang jeuhet nyang jikeureuja.

²⁷Meunyoe beu-o-beu-o hana hase peue nyang teucita-cita lam até; deungon meukeureuja brat ureuëng nyan jiteumé keukayaan.

²⁸Ureuëng nyang jiseutôt bak jalan nyang beuna teuma udeb bahgia; dan ureuëng nyang jiseutôt nibak jalan nyang jeuhet jipeukeu ubak mawöt.