PTL Lyrics

PRAISE THE LORD LYRICS

Daily Reading Bible

✅ Shared successfully

Acehnese Holy Bible Wordproject Bible

Amsal 13

25 verses

¹Aneuëk nyang áreh jisimak meunyoe ureuëng syiek jih teungoh bri peutuah; teuma di ureuëng sombong hánjitem teurimong nyang meunyoe teutam.

²Tutoe haba ureuëng nyang jroh jipeuteuka laba; teuma ureuëng nyang hana jujoe galak ubak buet nyang keujam.

³Ureuëng nyang até-até nibak tutoe haba meuteumé aman lam udeb jih; teuma ureuëng nyang jipeugah haba ban galak droe teuma rhot ubak malang.

⁴Ureuëng beu-oe le that nyang jilakée teuma hana meusapeue pih nyang na jiteumé; teuma ureuëng nyang keureuja brat teutab jiteumé peue-peue nyang geukeuheundaki.

⁵Ureuëng nyang jujoe jibanci that keu haba sulet; tingkah laku ureuëng jeuhet keubit malée dan cilaka.

⁶Keujujoran teulindong keu ureuëng nyang udeb geuh teupat; jeuhet jipeuhanco ureuëng nyang meudesya.

⁷Na ureuëng nyang meulagak kaya, padahai hana meuhareuta; na ureuëng nyang meulagak gasien, padahai kaya that.

⁸Ureuëng kaya harôh jipeuteubiet péng mangat udeb jih aman; teuma ureuëng gasien beubaih nibak ancaman.

⁹Ureuëng nyang malém lagée cahya nyang hu trang; teuma di ureuëng jeuhet lagée panyöt lon hana meucahya.

¹⁰Ureuëng nyang angkoh nyang jipeuhase na kheueh dakwa-dakwi; ureuëng nyang bijaksana geutem teurimong ajaran.

¹¹Keukayaan nyang jiteumé deungon mudah bagaih meukureueng; teuma hareuta nyang jipeusapat bacut deumi bacut bagaih meutamah le.

¹²Meunyoe harapan hana teupeupeunoh, baten hase meurana; meunyoe nyang teukeuheundak teukabui, até keubit bahgia.

¹³Ureuëng nyang anggab enteng ajaran TUHAN, jipeuceulaka droe jih keudroe; teuma ureuëng nyang taát ubak huköm Po teu Allah teuma meuteumé upah.

¹⁴Ajaran ureuëng bijaksana lagée mata keubahgiaan; meunyoe jiteuka ancaman, ajaran nyan nyang peuseulamat.

¹⁵Ureuëng meubudoe basa teuma teusanjong; teuma ureuëng nyang hana jeuet teupeucaya meuteumé udeb susah.

¹⁶Ureuëng nyang bijaksana seumike ilée sigohlom jipeubuet; ureuëng bangai jipeugah-peugah keuhai jih nyang bangai.

¹⁷Ureuëng nyang teuyuejak nyang hana até-até jipeuteuka bala; teuma utosan nyang hase teupeucaya teujamin jihnyan meuhase.

¹⁸Ureuëng nyang hánjitem teudidek jihnyan jeuet keu ureuëng gasien dan hina; teuma ureuëng nyang jideungoe naseuhat jihoreumat lé gob.

¹⁹Alangkah gét jih meuteumé peue nyang jikeuheundak! Ureuëng bangai hánjitem meupaleng nibak buet jeuhet.

²⁰Ureuëng nyang meungon ngon ureuëng bijaksana, teuma jeuet keu ureuëng bijaksana; teuma ureuëng nyang jimeurakan deungon ureuëng bangai, teuma meuteumé bala.

²¹Ureuëng meudesya sabe jitiyeub-tiyeub lé nyang malang teuma ureuëng nyang gét sabe meuteumé keubahgiaan.

²²Ureuëng nyang gét jipeuwaréh keukayaan keu aneuëk cucoe jih; teuma keukayaan ureuëng nyang meudesya teukeubah keu ureuëng nyang jujoe udeb jih.

²³Tanoh nyang shoh jeuet meuhase peunajoh nyang le keu ureuëng gasien; teuma lé sabab hana ade jeuet keusabab tanoh nyan hana teupeubuet le.

²⁴Hana teutem poh aneuëk, saban cit hana teugaséh keu aneuëk nyan; meunyoe cinta, harôh tajeuet tapoh aneuëk nyan.

²⁵Ureuëng nyang gét sabe lam keuadaan seb, teuma ureuëng jeuhet sabe lam keuadaan kureueng.

← Previous All Books Next →

Amsal 13 — Acehnese Holy Bible Wordproject Bible | Holy Bible | PTL Lyrics