Amsal 15

33 verses

¹Deungon teujaweueb nyang ramah, beungéh nyang kana nyan hase reuda; meunyoe teujaweueb nyang peudeh teupeubeudôh beungéh nyang hana teukira.

²Tutoe haba ureuëng bijak trok bak peungeutahuan meunarek até; teuma tutoe haba ureuëng bangai asoe jih na kheueh keubodohan.

³TUHAN geungieng banmandum nyang teujadi di jeueb-jeueb teumpat; Gobnyan geupeurati banmandum nyang gét dan nyang jeuhet.

⁴Tutoe haba nyang jroh meutamah seumangat, dan tutoe haba nyang peudeh teupeuleumoh hasrat.

⁵Ureuëng bangai jipeujayéh naseuhat ureuëng syiek droe jih, dan di ureuëng bijak geudeungoe meunyoe teuseugah.

⁶Di rumoh ureuëng nyang jroh na hareuta nyang le; dan keukayaan ureuëng jeuhet leunyab deungon beuncana.

⁷Tutoe haba ureuëng bijaksana peunoh deungon iéleumé peungeutahuan, teuma pikeran ureuëng bangai hana nyang lagéenyan.

⁸TUHAN geuteurimong doá ureuëng jroh, teuma Gobnyan geubanci ubak keureubeuen ureuëng jeuhet.

⁹TUHAN geubanci ubak cara udeb ureuëng doraka, teuma Gobnyan geugaséh keu ureuëng nyang jiuseuha jipeubuet keuheundak Gobnyan.

¹⁰Ureuëng nyang jipeubuet nyang jeuhet teuma geuseksa; dan ureuëng nyang hana jitem teuteugah teuma maté.

¹¹TUHAN geuteupeue donya ureuëng maté dan seulok beulok jih; panena mungken pikeran manusia jisöm nibak Gobnyan?

¹²Ureuëng nyang galak jihina gob ureuëng nyan hana galak teu teugah; jihnyan beu-oe jilakée naseuhat ubak ureuëng bijaksana.

¹³Meunyoe até sabe geumbira muka ureuëng nyan meucahya; teuma meunyoe até nyang seudeh seumangat hase patah.

¹⁴Ureuëng bijaksana geujak mita iéleumé peungeutahuan; teuma ureuëng bangai laloe deungon keubodohan.

¹⁵Ureuëng muram harôh jimeujuang lam udeb jih, teuma ureuëng nyang riang sabe dalam bahgia.

¹⁶Leubeh gét bacut hareuta geutakot ubak TUHAN, nibak hareuta nyang le teuma sabe lam keuadaan gundah.

¹⁷Leubeh gét pajoh gulée teuma meusigoe deungon cinta gaséh, nibak teupajoh uengkot sie nyang mangat teuma meusajan deungon rasa banci.

¹⁸Ureuëng nyang bagaih beungéh nibak ureuëng nyan bagaih that jipeudong dakwa, teuma ureuëng nyang saba nibak ureuëng nyan jiba damé.

¹⁹Ureuëng beu-oe sabe lam keuadaan susah; teuma di ureuëng jujoe hana geurasa sulet.

²⁰Aneuëk nyang bijaksana, keubit that galak até ureuëng syiek jih; teuma aneuëk nyang bangai hana jihareuga keu ma jih.

²¹Bangai na kheueh keuseunangan keu ureuëng beubal, di ureuëng bijaksana udeb geuh teupat.

²²reuncana hase gagai, meunyoe hana teupike-pike; dan reuncana meuhase, meunyoe le ureuëng bri naseuhat.

²³Tutoe haba nyang teupeugah paih bak watée jih, teupeuteuka suka cita.

²⁴Ureuëng nyang bijaksana geuseutôt rot nyang meusineungoh nyang teujak ubak udeb; kon rot nyang meutreun nyang teutuju ubak maté.

²⁵TUHAN geureuloh rumoh ureuëng nyang manyang até, teuma tanoh atra sidroe inong balée teutab geulindong.

²⁶TUHAN geubanci that ubak reuncana nyang jeuhet; teuma tutoe haba nyang jroh keubit galak that até Gobnyan.

²⁷Soe nyang mita laba nyang hana haleue, ureuëng nyan ka jipeuhanco keuluwarga jih keudroe. Dan nyang banci ubak péng sugok, ureuëng nyan teuma udeb bahgia.

²⁸Ureuëng nyang jroh jipike ilée meunyoe jimeututoe; dan di ureuëng jeuhet jipeugah haba hai-hai nyang kutoe.

²⁹TUHAN geudeungoe meunyoe ureuëng jroh nyang meudoá, teuma Gobnyan hana geupako keu ureuëng doraka.

³⁰Ruman nyang geumbira keubit teupeu mangat até, dan haba nyang jroh keubit teupeu seugar jiwa.

³¹Ureuëng nyang jipako ubak teuseugah ureuëng nyan na kheueh jitamong ubak ureuëng nyang bijaksana.

³²Ureuëng nyang hana jitem deungoe naseuhat, ureuëng nyang lagéenyan hana jihareuga keu droe jih keudroe; dan ureuëng nyang jitem teurimong meunyoe teuseugah, ureuëng nyan jeuet keu ureuëng nyang meubudoe basa.

³³Teumakot ubak TUHAN na kheueh dasai peundidekan nyang jroh; dan keuhormatan awai nibak keumiyueb até.

← Previous All Books Next →