Amsal 16

¹Manusia jeuet jipeugöt reuncana, teuma Po teu Allah nyang bri keuputosan.

²Tieb-tieb buet ureuëng nyan mungken gét nibak pandangan jih keudroe, teuma TUHAN kheueh nyang nilai meukeusut até ureuëng nyan.

³Peucaya kheueh ubak TUHAN banmandum reuncana gata, teuma gata meuhase peue mantong nyang gata reuncana.

⁴Peue mantong nyang geupeugöt lé TUHAN na tujuan jih; dan tujuan nibak ureuëng jeuhet na kheueh keubinasaan.

⁵Banmandum ureuëng sombong geubanci lé TUHAN; Gobnyan hana geupeubiyeu awaknyan teuhinda nibak huköman.

⁶Ureuëng nyang seutia ubak Po teu Allah ureuëng nyan meuteumé peungamphonan; dan ureuëng nyang taqwa teuma teuhinda nibak bandum nyang jeuhet.

⁷Meunyoe gata hase tapeugalak até TUHAN, musoh-musoh gata teuma geupeujeuet keurakan gata.

⁸Leubeh gét meuhase bacut deungon cara jujoe, nibak meupéng le deungon cara hana ade.

⁹Manusia hase jipeugét reuncana, teuma nyang peuteuntée jalan udeb ureuëng nyan na kheueh Po teu Allah.

¹⁰Raja geuteurimong kuasa nibak Po teu Allah, lé nyan, gobnyan hana salah tieb-tieb keuputosan gobnyan.

¹¹TUHAN geumeuharab manusia nyan jujoe meunyoe jimeuniaga, meunan cit lam hai ukoran dan timbangan.

¹²Nibak ureuëng mat kuasa, meubuet jeuhet na kheueh saboh hai nyang paleng kutoe, sabab peurintah gobnyan teuga ngon kong kareuna ade.

¹³Keuteurangan nyang beutôi keubit that galak nibak peunguasa, dan gobnyan geugaséh keu ureuëng nyang jipeubuet jujoe.

¹⁴Meunyoe raja ka beungéh na kheueh lagée saboh haba keuhai huköman maté; teuma di ureuëng nyang bijaksana jiuseuha jipeureuda.

¹⁵Keuhai jroh até raja na kheueh geupeuteuka udeb seujahteura, lagée awan jipeutron ujeuen meunyoe musém uroe.

¹⁶Meuteumé hikeumat leubeh gét nibak meuteumé méuh; meuteumé iéleumé peungeutahuan leubeh meuyuem nibak meuteumé pirak.

¹⁷Ureuëng jroh-jroh jipeujiôh droe nibak ureuëng jeuhet; dan ureuëng nyang jipakoe cari udeb jih, jilindong droe jih keudroe.

¹⁸Ureuëng sombong meuakibat ubak keuhancoran; dan keuangkohan meuakibat ubak reuloh.

¹⁹Leubeh gét miyueb até dan hana meuhareuta, nibak teuseutôt deungon ureuëng sombong dan teunekmat hareuta nyang jireupah lé awaknyan.

²⁰Peurati kheueh peue nyang teupeurunoe keu gata, teuma gata meuteumé nyang paleng jroh. Peucaya kheueh ubak TUHAN, teuma gata bahgia.

²¹Ureuëng bijaksana teuturi nibak pikeran jih nyang tajam; cara jih peugah haba nyang meunarek, dan tutoe haba jih nyang keubit meunarek até.

²²Keubijaksanaan na kheueh pangkai keubahgiaan udeb ureuëng meubudoe; dan ureuëng bangai jiseksa lé bangai jihnyan keudroe.

²³Pikeran ureuëng meubudoe tutoe haba jih bijaksana, dan nyang peurunoe seumaken teupeuyakén teuma.

²⁴Nariet nyang ramah lagée meulisan; maméh nyúm jih dan teupeuseuhat badan jih.

²⁵Na rot ueh nyang leumah jih sulu, teuma akhé jih rot ueh nyan teujak ubak mawöt.

²⁶Meuheut keuneuk seumajoh teudorong ureuëng jimeu useuha; sabab pruet droe jih, gobnyan teupaksa meukeureuja.

²⁷Ureuëng jeuhet ji useuha keu jipeuceulaka seusabe keudroe-droe; tutoe haba jih jeuhet lagée ngéue apui nyang hu meutaga.

²⁸Ureuëng nyang curang jipeuteuka dakwa-dakwi; tukang peusuna hase jipeucre sahabat nyang krab.

²⁹Ureuëng keujam jipeungét bubena rakan-rakan jih, dan jiba awaknyan u dalam bahya.

³⁰Até-até kheueh keu ureuëng nyang jiseunyum dan jimeuén mata, ureuëng nyan teungoh jireuncana buet nyang jeuhet didalam até jih.

³¹Ureuëng nyang jujoe geu anugeurah umu nyang panyang; ôk putéh gobnyan lagée mahkota nyang geumilang cahya.

³²Hana bagaih beungéh leubeh jroh nibak na kuasa; teukuasa droe leubeh jroh nibak teukuasa bansa.

³³Mangat jiteupeue naseb, manusia jitiek undi, teuma nyang peuteuntée jaweueb jih na kheueh TUHAN keudroe.