Amsal 6

32 verses

¹Aneuëk ulôn, mungken gata na tameujanji ubak sidroe-droe ureuëng keugata tanggong utang jih.

²Dan jeuet mantong gata ka meucarueh deungon tutoe haba gata dan teupeurangkab deungon janji gata keudroe.

³Meunyoe beutôi meunan, aneuëk ulôn, gata kana lam keukuasaan ureuëng nyan. Teuma nyoe kheueh cara jih mangat gata hase tateubiet: bubagaih gatajak ubak ureuëng nyan; lakée kheueh deungon peunoh harab mangat jihnyan jitem peuleueh gata.

⁴Bék kheueh tajak éh ilée, dan bék tapiôh hék.

⁵Peuleueh kheueh droe gata nibak peurangkab nyan lagée cicém atawa rusa jipeuleueh droe nibak ureuëng let.

⁶Ureuëng beu-o harôh jikalon cara udeb sidom dan jimeurunoe nibak sidom nyan.

⁷Sidom hana peumimpén, hana teuma peunguasa dan nyang kawai,

⁸teuma teungoh mantong musém keumeukoh di sidom-sidom nyan jipeusapat beukai keu jikeubah watée teuka musém deuk.

⁹Sampoe ánpajan sibeu-o nyan jitem éh? Dan pajan kheueh jihnyan jitem beudôh?

¹⁰Jihnyan jiduek mantong deungon jaroe lam pangkée sira jipiôh, dan laju jipeugah, "Ah, ulôn jak éh sikeujab, ulôn teungéut that mata."

¹¹Teuma, watée jihnyan teungoh teungéut nibak teumpat éh, jihnyan laju teuka lé bala kureueng atra dan gasien nyang teuka lagée peurampok meusinjata.

¹²Ureuëng jeuhet dan ureuëng kureueng aja jimeusulet dipat-pat mantong.

¹³Jihnyan jimeuén mata dan jipeugöt isyarat keu teumipée.

¹⁴Pikeran jih nyang brok ka peunoh deungon reuncana jeuhet dan jipeuteuka dakwa meudakwa dipat-pat mantong.

¹⁵Banmandum nyan na kheueh rhot ubak sabab keuceulakaan nyang rhot ateueh droe jih keudroe deungon hana teusangka-sangka, dan jihnyan hanco banmandum.

¹⁶Na tujoh boh peukara nyang geubanci lé TUHAN dan hana jeuet geupeubiyeu meunan mantong: Sikeub nyang sombong, babah nyang peugah haba sulet, jaroe nyang jipoh maté ureuëng nyang hana meusalah, utak nyang jireuncana hai-hai nyang jeuhet, gaki nyang bagaih-bagaih jijak ubak buet nyang jeuhet, saksi nyang hana jipiôh-piôh jimeusulet, dan ureuëng-ureuëng nyang jipeuteuka musoh lamkawan rakan deungon rakan.

²⁰Aneuëk ulôn, tapeubuet kheueh laju peue nyang geupeurintah lé ureuëng syiek gata, dan bék tuwoe ubak peue nyang ka geunaseuhat lé ma gata.

²¹Ingat kheueh sabe ubak tutoe haba gobnyan dan takeubah kheueh nyan lam até.

²²Ajaran-ajaran gobnyan teubimbéng gata nibak rot ueh raya, nyang jaga gata óh watée malam, dan nyang bri peutunyok nibak gata óh watée gata tabeudôh.

²³Peutunyok-peutunyok nyang teuka nibak ureuëng syiek gata na kheueh lagée panyöt tanglong nyang hu trang meucahya; geuteugah gata na kheueh teutunyok keu gata pakriban cara udeb nyang jroh.

²⁴Deungon na nyang lagéenyan gata ka geupeujiôh nibak ureuëng-ureuëng inong jeuhet, dan nibak jirayu nyang meubisa keu peurumoh ureuëng laén.

²⁵Bék kheueh gata teugoda lé ceudah dan lagak ureuëng nyan, dan bék kheueh teupikat deungon mata awaknyan nyang peurayu.

²⁶Inong jeuhet si tukang mukah hase teusiwa deungon bu saboh pireng, teuma meunyoe meumukah deungon peurumoh gob harôh teubayeue deungon nyawöng.

²⁷Peu kheueh na ureuëng nyang hase jiwa apui deungon hana tutong bajée jih?

²⁸Dan peu kheueh na ureuëng nyang hase jigilo ngéue apui deungon hana tutong gaki jih?

²⁹Banmandum nyan saban bahya jih lagée meumukah deungon peurumoh ureuëng laén. Soemantong nyang peubuet nyan hana teupeusie nibak huköman.

³⁰Meunyoe ureuëng jijak cua peunajoh, bahpi sabab deuk, ureuëng nyan teuma teuhina.

³¹Dan meunyoe ureuëng nyan keunong drob ureuëng nyan harôh jibayeue lom tujoh goe lipat; deungon nyan ureuëng nyan harôh gadôh banmandum hareuta milék jih keudroe.

³²Teuma pakriban kheueh deungon ureuëng agam nyang meuzina? Ureuëng nyan ka jireuloh droe jihnyan keudroe! Bangai that-that ureuëng nyan!

³³Ureuëng nyan teuma teuseuksa dan jihina. Nan jihnyan teuma ka kutoe sampoe siumu masa.

³⁴Sabab, deungon na nyang jipeubuet lagée nyan lakoe ureuëng inong nyan ka jeuet keu ureuëng ceumuru, sampoe beungéh silakoe nyan meutamah-tamah ju. Dan meunyoe jihnyan jibalaih dam, nibak ureuëng nyan ka hana le rasa gaséh sayang.

³⁵Ureuëng nyan hana hase teubujuk deungon péng; hadiah nyang le sidub toh mantong hana hase teupeureuda beungéh ureuëng nyan. Indonesia

← Previous All Books Next →