Amsal 7

24 verses

¹Ingat kheueh tutoe haba ulôn, hai aneuëk ulôn, dan bék tuwoe ubak peue nyang ka ulôn peugah bak gata.

²Seutôt kheueh ubak naseuhat-naseuhat ulôn mangat gata udeb bahgia. Dan taseutôt kheueh ajaran ulôn beujroh-jroh lagée gata jaga aneuk mata keudroe.

³Ingat kheueh ubak ajaran-ajaran nyang ka ulôn peurunoe nyan, dan takeubah kheueh lam até sanubari gata.

⁴Anggab kheueh hikeumat sibagoe syedara gata dan peungeutahuan sibagoe sahabat gata nyang paleng rab nibak gata.

⁵Deungon hikeumat teuma teupeujiôh gata nibak ureuëng inong jeuhet, nibak ureuëng inong nyang meurayu deungon tutoe haba nyang maméh.

⁶Bak siuroe ulôn kalon rot tingkab rumoh lôn.

⁷Deuh laju ulôn ngieng ramé that aneuëk muda nyang mantong ijo-ijo; teuma khusos jih ulôn ngieng sidroe nyang bangai lamkawan awaknyan.

⁸Óh seupôt uroe watée jih karab malam, aneuëk muda nyan lôn ngieng jijak-jak tô deungon tikongan nibak rot nyang teujak ubak rumoh sidroe ureuëng inong.

¹⁰Ureuëng inong nyan na kheueh sidroe inong nyang hana ék jiduek di rumoh. Siat-at inong nyan ka deuh bak binéh rot, óh lheuehnyan ka leumah teuma nibak binéh padang, atawa jidong sira jipreh nibak simpang rot. Peurangoe jih beurani that dan hana jiteupeue malée. Óh lheuehnyan ulôn kalon inong nyan jiteubiet deungon peukayan inong lunte, laju jipeurab ubak aneuëk muda nyang bangai nyan deungon reuncana nyang lisyek.

¹³Inong nyan laju jiwa aneuëk mudanyan sira jicöm. Deungon hana malée laju jipeugah,

¹⁴"Uroenyoe ulôn harôh lôn bayeue kaôy lôn, dan keu nyan ulôn ka lheueh lôn peuseumah keureubeuen.

¹⁵Nyang kheueh sabab jih ulôn teubiet keulôn mita gata, mangat gata tamakheun di rumoh lôn. Jinoenyoe ka meurumpok ulôn deungon gata!

¹⁶Teumpat éh ulôn ka lôn peungui deungon ija sipre nyang meubagoe wareuna nibak nanggroe Meusé,

¹⁷dan ka ulôn boh minyéuk mangat bée mur, ceundana dan kayée maméh.

¹⁸Jinoe, jak geutanyoe ta meucumbu dan ta nekmat asmara geutanyoe simalam suntok.

¹⁹Lakoe ulôn hana di rumoh, gobnyan teungoh geujak u teumpat nyang jiôh.

²⁰Meusajan gobnyan péng le that geuba, dan hana geuwoe lam dua aleuhad nyoe."

²¹Meunan kheueh cara jih inong jeuhet nyan jirayu peumuda nyan deungon meubagoe rayuan nyang lumpah meumikat sampoe teugoda kheueh aneuëk muda nyan.

²²Hana panyang pike laju jiseutôt inong jeuhet nyan lagée leumô jihue bak teumpat sie dan lagée ureuëng huköman nyang teungoh jiba mangat jiteurimong huköm nyang teukeubah keu ureuëng bangai;

²³sikeujab teuk aneuëk panah teuma teupeubeusôt lam até jih. Lagée cicém jipo jijak ubak taron, meunan kheueh peumuda nyan hana jisada bahwa nyawöng jih teungoh teu ancam.

²⁴Lé sababnyan, hai aneuëk-aneuëk lôn, deungoe kheueh ulôn. Dan simak kheueh kheueh naseuhat-naseuhat ulôn.

²⁵Bék tapeubiyeu inong nyang lagéenyan jipikat até gata; dan bék tajak tamita jihnyan,

²⁶sabab jihnyan ka jipeuhanco udeb ureuëng agam nyang le. Hana teu itong le jih nyang ka binasa sabab lé inong nyan.

²⁷Meunyoe teujak u rumoh inong nyan saban cit teucok rot nyang panék ubak maté. Indonesia

← Previous All Books Next →