Psalms 63

¹O God, U is my God, U soek ek; my siel dors na U, my vlees smag na U, in ‘n dor en uitgedroogde land, sonder water.

²(63:3) Só het ek U in die heiligdom aanskou, om u sterkte en u heerlikheid te sien.

³(63:4) Want u goedertierenheid is beter as die lewe; my lippe moet U prys.

⁴(63:5) Só sal ek U prys my lewe lank, in u Naam my hande ophef.

⁵(63:6) Soos met vet en vettigheid sal my siel versadig word, en my mond sal roem met jubelende lippe

⁶(63:7) as ek aan U dink op my bed, in die nagwake oor U peins.

⁷(63:8) Want U was ‘n hulp vir my, en in die skaduwee van u vleuels sal ek jubel.

⁸(63:9) My siel is aan U verkleef; u regterhand ondersteun my.

⁹(63:10) Maar húlle wat soek om my lewe te verderwe, hulle sal kom in die onderste plekke van die aarde.

¹⁰(63:11) Hy sal oorgelewer word in die mag van die swaard; die deel van die jakkalse sal hulle word.

¹¹(63:12) Maar die koning sal bly wees in God; elkeen wat by Hom sweer, sal hom beroem; want die mond van die leuensprekers sal gestop word.