Psalms 9

¹Ek wil die HERE loof met my hele hart; ek wil al u wonders vertel.

²(9:3) In U wil ek bly wees en juig; ek wil psalmsing tot eer van u Naam, o Allerhoogste,

³(9:4) omdat my vyande agteruitwyk, struikel en omkom van voor u aangesig.

⁴(9:5) Want U het my reg en my regsaak behandel; U het gaan sit op die troon, o regverdige regter!

⁵(9:6) U het die heidene gedreig, die goddelose laat omkom, hulle naam uitgedelg vir ewig en altyd.

⁶(9:7) Die vyande het omgekom—puinhope vir ewig; ook die stede wat U verwoes het; hulle gedagtenis, ja, dié het vergaan.

⁷(9:8) Maar die HERE sit vir ewig; Hy het sy troon reggesit vir die oordeel.

⁸(9:9) En Hy self sal die wêreld oordeel in geregtigheid en die volke vonnis met reg.

⁹(9:10) So is die HERE dan ‘n rotsvesting vir die verdrukte, ‘n rotsvesting in tye van benoudheid.

¹⁰(9:11) En hulle wat u Naam ken, sal op U vertrou, omdat U die wat U soek, nie verlaat nie, o HERE!

¹¹(9:12) Psalmsing tot eer van die HERE wat op Sion woon; verkondig onder die volke sy dade.

¹²(9:13) Want Hy wat die bloed soek, dink aan hulle; Hy vergeet die geroep van die ellendiges nie.

¹³(9:14) Wees my genadig, HERE, aanskou my ellende vanweë my haters, U wat my verhef uit die poorte van die dood;

¹⁴(9:15) sodat ek al u roemryke dade kan vertel, in die poorte van die dogter van Sion kan juig oor u heil.

¹⁵(9:16) Die heidene het gesink in die kuil wat hulle gemaak het; hulle voet is gevang in die net wat hulle gespan het.

¹⁶(9:17) Die HERE het Hom bekend gemaak; Hy het strafgerig geoefen; die goddelose is verstrik in die werk van sy hande. Higgajon. Sela.

¹⁷(9:18) Die goddelose sal teruggaan na die doderyk, al die heidene wat God vergeet.

¹⁸(9:19) Want die behoeftige sal nie vir altyd vergeet word, die verwagting van die ellendiges nie vir ewig verlore gaan nie.

¹⁹(9:20) Staan op, HERE, laat die mens nie sterk word nie; laat die heidene voor u aangesig geoordeel word!

²⁰(9:21) o HERE jaag hulle skrik aan; laat die heidene weet, hulle is mense! Sela.