[13] 1 Veigauna 12

¹Ia oqo o ira era a lako mai kivei Tevita ki Sikilaki ni se dro voli o koya mai vei Saula na luve Kisi tagane; era maliwai ira na tamata qaqa, era sa veivuke e nai valu,

²e nodra i yaragi na dakai titi, e kaukauwa ruarua na ligadra i matau kei nai mawi ena viritaki vatu kei na vanataki gasau ni dakai. O ira oqo mai vei Penijamini, era wekai Saula.

³Sa nodra i liuliu o Aisare, tarava o Joasi, o irau na luve i Semea na kai Kipea; o Jesieli kei Peleti e rau luve i Asimaveci; Biraka, kei Jeu na kai Anacoci;

⁴Isimaia na Kipionaite, e tamata qaqa vei ira na lewe tolusagavulu; ka uasivi cake vei ira na lewe tolusagavulu; Jeremaia, Jeasieli, Joanani,kei Josavati na Ketera;

⁵Elusai, Jerimoca, Pealaia, Semaraia, kei Sefataia na kai Arupi;

⁶Elikana, Jisaia, Asareli, Joesa, kei Jasobimi, na Koraite;

⁷kei Joela kei Sevataia e rau luve i Jeroama tagane na kai Kedori.

⁸Eso na luve i Kata era sa la'ki to vata kei Tevita mai na koro ni valu mai veikau, era tamata qaqa ni valu, era sa vulici tu mera vala, era kila na taura nai sasabai kei na moto, na matadra sa vaka na mata ni laione, ka ra sa totolo sara me vaka na me kila ni vei ulu-ni-vanua:

⁹Sa liu o Esera, nai karua o Opetaia, o Iliavi na kenai katolu,

¹⁰Misimana na kenai kava, Jeremaia nai kalima,

¹¹Atai nai kaono, Elieli nai kavitu,

¹²Joanani nai kawalu, Elisavati na kenai kaciwa,

¹³Jeremaia nai ka tini, kei Makibanai na kenai ka tinikadua.

¹⁴O ira oqo mai vei ira na luve i Kata, era kavetani ni valu; nai wiliwili lailai duadua e dua na drau, kei nai wiliwili levu duadua e sivia na dua na udolu.

¹⁵Oqo o ira era a kosova na Joritani e nai matai ni vula, ni sa vuabale na uciwai; ka ra sa vakasavi ira kecega era tiko ena buca, vaka ki na tokalau ka vaka ki na ra.

¹⁶Era sa qai lako mai eso na luve i Penijamini tagane kivei Tevita ena koro ni valu.

¹⁷Ka sa la'ki tavaki ira o Tevita, ka vosa vei ira, ka vaka, "Kevaka dou sa kauta mai ena yalo vinaka vei au mo dou mai vukei au, na yaloqu ena sema vata kei kemudou; ia kevaka dou sa via mai volitaki au vei ira na kequ meca, me vaka ni sa sega na cala ena ligaqu, me na qai raica ga ka lewa vei kemudou na nodra Kalou na tamada."

¹⁸Sa qai curumi Amisai na Yalo, o koya sa liu vei ira na kavetani, ka sa tukuna: "Keimami sa nomuni, i Tevita; Keimami sa to vata kei kemuni, na luve i Jese tagane! Na Vakacegu, Na Vakacegu me nomuni, me ra vakacegu talega o ira sa vukei kemuni! Ni sa vukei kemuni na nomuni Kalou." Sa mani ciqomi ira o Tevita, ka lesi ira me ra kavetani ni vei mataivalu.

¹⁹Ka so vei ira na kawa i Manasa era sa la'ki to vata kei Tevita ni sa lako vata o koya kei ira na kai Filisitia me ra veivala kei Saula; ia era a sega ni vukei koya, ni ra sa vakatalai koya tani yani o ira sa turaga vei ira na kai Filisitia me vaka era sa duavata kina, ka vaka, "Ena qai la'ki to vata tale kei na nona turaga o Saula ka na rawa ni tamusuka na uluda."

²⁰Ni sa lako o koya ki Sikilaki, o iratou mai vei Manasa ka ratou a sa lako mai vua o Atina, Josavati, Jediaeli, Maikali, Josavati, Ilaiu, kei Siletai, e ratou kavetani ni vei udolu ka ratou a lako mai vei Manasa.

²¹Ka ra sa vukei Tevita me vala kei ira na mataivalu daubutako, ni ra sa tamata qaqa kecega ni valu, ka ra kavetani talega ni mataivalu.

²²E na gauna o ya era sa dau lako mai vei Tevita e na veisiga kecega me ra vukei koya, me yacova ni sa dua na matai valu levu, me vaka na mataivalu ni Kalou.

²³Ia oqo nai wiliwili ni veiwasewase kecega sa vakaiyaragitaki ki nai valu, ka ra sa lako mai vei Tevita ki Epironi me ra solia na matanitu i Saula kivei koya, me vaka na vosa i Jiova:

²⁴mai vei ira na luve i Juta tagane era vakai sasabai kei na moto, era lewe ono na udolu ka walu na drau era vakaiyaragi ki nai valu;

²⁵mai vei ira na luve i Simione tagane, na tamata qaqa era sa vakarau tu ki nai valu, e vitu na udolu dua na drau;

²⁶mai vei ira na luve i Livai e va na udolu ono na drau;

²⁷Jioiada, o koya sa liu vei ira na luve i Eroni tagane, e lewe tolu na udolu vitu na drau era tu vata kei koya;

²⁸O Setoki, e dua na cauravou, e tamata qaqa ni valu, kei na ruasagavulu ka rua na kavetani mai na vale i tamana;

²⁹mai vei ira na luve i Penijamini tagane, era wekai Saula, e tolu na udolu (me yacova mai na gauna o ya e dua nai wase levu era se dina tikoga ki na vuvale i Saula);

³⁰mai vei ira na luve i Ifereimi tagane e lewe rusagavulu na udolu walu na drau, era tamata qaqa ni valu, era tamata rogo e na vuvale i tamadra;

³¹mai na veimama ni yavusa i Manasa e tinikawalu na udolu, era a kacivi e na yacadra me ra lako mai ka buli Tevita me tui;

³²mai vei ira na luve i Isakari tagane ka sa matata vinaka tu vei ira na veigauna, mera kila na ka e dodonu me cakava o Isireli, e rua na drau na nodra turaga; ka ra lewa vei ira kecega na wekadra;

³³mai vei Sevuloni era lewe limasagavulu na udolu ka ra lako ki nai valu, era kena dau ni valu kei nai yaragi kecega ni valu, era tamata yalodina ka dauvakarorogo;

³⁴mai vei Navitalai e dua na udolu na kavetani, kei na tolusagavulu ka vitu na udolu era vakai sasabai kei na moto;

³⁵mai vei Tani na tamata era rawa ni tuvai ira nai valu, e ruasagavulu na udolu ono na drau;

³⁶mai vei Aseri, o ira era rawa ni lako i nai valu, ka e rawa ni ra tuvai ira e nai valu, e vasagavulu na udolu;

³⁷mai vei ira na Rupeni kei na Kata kei na veimama ni yavusa i Manasa, mai na tai kadua ni Joritani, e dua na drau ruasagavulu era sa vakaiyaragi ni valu e na veimataqali yaragi kecega ni valu.

³⁸O ira kecega na tamata ni valu oqo, ka ra rawa ni maroroya nai tutu, era lako mai ki Epironi ena yalo dina, me ra buli Tevita me tui Isireli; kei ira kecega na Isireli era sa yalovata me ra bulu Tevita me tui.

³⁹Ka ra sa tu vata kei Tevita mai kea me tolu na siga, era kana ka gunu, ni ra sa vakarautaka vei ira o ira na wekadra.

⁴⁰Ia oqo o ira era tu volekati ira, me tekivu mai na vanua yawa vakataki Isakari ki Sevuloni kei Navitalai, era sa kau kakana ni ra vakavodoka mai e na asa kei na kameli, e na meule kei na bulumakau “ na valawa kei na keke vuanikau kei na keke sulutana, na waini kei na waiwai kei na bulumakau kei na sipi e sa levu sara, ni sa yaco na reki e Isireli.