[13] 1 Veigauna 11

¹Era sa qai lako kece mai na Isireli vei Tevita ki Epironi, ka tukuna, "E dina ga ni keimami sa suimu ka lewemu.

²"Ena gauna talega sa oti, ni sa tui tiko o Saula, oi kemuni ga o ni a liutaki ira yani na Isireli ki tuba ka kauti ira lesu tale mai ki loma; ka sa tukuna vei kemuni o Jiova na nomuni Kalou, 'O na vakatawai ira na Noqu tamata na Isireli, ka lewa vei ira na Noqu tamata na Isireli.'"

³O koya oqo era sa lako kece mai kina na qase ki vua na tui ki Epironi, ka sa cakava o Tevita e dua na veiyalayalati vata kei ira ena mata i Jiova mai Epironi. Ia era sa lumuti Tevita me tui e Isireli taucoko, me vaka na vosa i Jiova e na gusui Samuela.

⁴Sa qai lako o Tevita kei ira kecega na Isireli ki Jerusalemi, e kilai tu me o Jevusa, na koro era tiko kina na Jevusaiti, o ira nai taukei ni vanua.

⁵Ia era sa tukuna nai taukei ni vanua vei Tevita, "Mo kakua ni lako mai ki ke!" Ia o Tevita sa rawa na koro ni valu o Saioni (o ya, na Koro i Tevita).

⁶Ia oqo sa tukuna o Tevita, "O koya ena kabai ira e liu na Jevusaiti ena turaga ka kavetani." Ia o Joave na luve i Seruwaia sa liu taumada, ka sa yaco me turaga.

⁷Sa qai tiko o Tevita ena koro qaqa; ia oqo era sa vakayacana me Koro i Tevita.

⁸Ka sa tara o koya na kena veikoro vakavolivolita, mai Mailo ki na vanua vakavolivolita. Sa vakavinakataka o Joave na vo ni veikoro.

⁹Ia sa tubu cake voli o Tevita me rogo levu, ka ni sa tiko vata kei koya o Jiova ni lewe vuqa.

¹⁰Ia oqo o ira sa liu vei ira na tamata qaqa i Tevita, era sa vakaukauwataki ira vata kei koya e na nona matanitu, kei ira kecega na Isireli, me ra buli koya me tui, me vaka na vosa i Jiova ena vuku i Isireli.

¹¹Sai koya oqo na kedra i wiliwili na tamata qaqa sa tu vei Tevita: Jasoviama na luve i Akimonaiti tagane, sa liu vei ira na kavetani; e a laveta cake na nona moto vei ira e lewe tolu na drau, e vakamatei ira vata kece e na dua ga na gauna.

¹²E taravi koya o Iliesa na luve i Toto tagane, na Aoaite, o koya e dua vei iratou na lewe tolu na tamata qaqa.

¹³O koya e a tiko vata kei Tevita mai Pasidemimi. Ia oqo era sa soqoni vata na kai Filisitia me veivala, ka sa dua na tiki ni qele sa tubu tu kina na witi. Ia oqo era sa dro na tamata mai vei ira na kai Filisitia.

¹⁴Ia era sa la'ki tu vakadua ena loma donu ni veiwiti, era taqomaka, ka vakamatei ira na kai Filisitia. Ia o Jiova sa vakavuna e dua na qaqa levu.

¹⁵Ia oqo e le tolu vei ira na lewe tolusagavulu na turaga ni valu e ratou a lako sobu ki na vatu vei Tevita, ki na qaravatu mai Adulama; ka ra sa keba vakaivalu mai na buca o Refeimi o ira na kai Filisitia.

¹⁶O Tevita sa tiko e na gauna o ya mai na koro ni valu, ka sa tiko na mataivalu ni Filisita mai Peceliema.

¹⁷Ka sa tukuna ena nona gagadre dina o Tevita, "Isa, ke dua mada ga me bau vagunuvi au ena wai mai na mata-ni-wai mai Peceliema, o koya e tiko e na yasa ni matamata!"

¹⁸E ratou a curuma vakaukauwa na nodra keba na kai Filisitia, ratou takiva na wai mai na matani- wai e Peceliema ka tiko mai na matamata, ka kauta mai kivei Tevita. Ia sa sega ni gunuva o Tevita, sa sova ga yani kivei Jiova.

¹⁹Ka sa tukuna, "Me vakayawa sara vei au, oi Kemuni na noqu Kalou, me'u cakava na ka oqo! Me'u gunuva li na nodratou dra na tamata oqo ni ratou a douvaka na mate? Ni ratou a bolea na mate me ratou kauta mai na wai." O koya oqo sa bese kina ni gunuva. Na veika oqo e ratou a cakava na lewe tolu na tamata qaqa.

²⁰O Avisai na taci Joave sai liuliu vei iratou e lewe tolu tale. Sa laveta cake o koya na nona moto vei ira e le tolu na drau na tamata ni valu, vakamatei ira, ka sa rawata e dua na yaca rogo vei iratou tolutolu oqo.

²¹Sa dokai vakalevu cake o koya mai vei rau na lewe rua na nonai tokani. Sa yaco kina o koya me nodratou kavetani. Ia e sega ga ni rawata me liutaka na i matai ni tolu.

²²O Penaia na luve i Jioiada tagane, na luvena e dua na tamata qaqa mai Kabasili, o koya sa cakava oti e vuqa na ka vinaka. E a vakamatei rau e rua na tamata yate vakalaione ni Moape. Sa lako sobu talega o koya ka vakamatea e dua na laione ena loma ni dua nai keli ena dua na siga ni uca cevata.

²³Ka sa vakamatea talega e dua na kai Ijipita, e tamata levu, ka vitu veimama na fiti na kena balavu. E ligana na kai Ijipita o ya e taura tu na nona moto ka vaka tu na kaukamea ni vakadei i koya na dautalitali; ka sa lako sobu yani vua kei na dua nai titoko, ka kaliraka tani mai ligana na kai Filisitia na nona moto, ka vakamatei koya ena nona moto ga.

²⁴Na veika oqo e a vakayacora o Penaia na luve i Jioiada, ka sa rawata kina na yaca e rogo vei iratou na tamata qaqa e tolu oqo.

²⁵E dina ni sa dokai cake o koya vei ira na lewe tolusagavulu, ia e a sega ga ni rawata me uasivi cake vei iratou nai matai ni tolu. Ka sa digitaki koya o Tevita me liutaki ira na nona mata-yadra.

²⁶E ratou tamata qaqa talega ni valu o Asaeli na taci Joave, o Elanani na taci Toto na kai Peceliema,

²⁷O Samoci na Aroraite, Elesi na Pelonaite,

²⁸na luve i Ikesi na Tekoite, Aviesa na kai Anacoci,

²⁹Sivekai na luve i Usa, Ilai na Aoaite,

³⁰Mearai na kai Netofa, Eledi na luve i Peana na kai Netofa,

³¹Icei na luve i Ribai na kai Kipea, mai vei ira na luve i Penijamini, Penaia na Piraconaite,

³²O Urai mai na veimata ni wai drodro e Keasi, Avieli na kai Araba,

³³Asamaveci na Bearumaite, Eliava na Sealibonaite,

³⁴iratou na luvei Asemi tagane na Kisonaite, Jonacani na luve i Sake tagane na Araraite,

³⁵O Ayame na luvei Sakari tagane na Araraite, Elifali na luve i Uri,

³⁶Eferi na kai Mekera, Aija na Pelonaite,

³⁷Esiro na Kamelaite, Nearai na luve i Esibai,

³⁸Joeli na taci Necani, Miveri na luve i Akiri,

³⁹Seleki na Amonaite, Nearai na Peroci (o koya sa daucolata nai yaragi i Joave na luve i Seruwaia tagane),

⁴⁰Ira na Iciraite, Karevi na Iciraite,

⁴¹Uraia na Itaite, Savati na luve Alai tagane,

⁴²Adina na luve i Sisa tagane na luve i Rupeni (e dua na turaga vei ira na kawa i Rupeni) ka lewe tolusagavulu era tu vata kei koya,

⁴³Anani na luve i Maeka tagane, Josafati na Micinaite,

⁴⁴Usaia na kai Asiteraca, Sama kei Jeieli rau na luve i Ocami tagane na Aroeraite,

⁴⁵Jetiaeli na luve i Simiri tagane, kei Joa na tacina, na Tisaite,

⁴⁶Elieli na Meavaite, Jeribai kei Josavaia rau na luve i Eliniama tagane, Icima na kai Moape,

⁴⁷Elieli, Opeti, kei Jiasieli na Mesovaite.