[13] 1 Veigauna 10

¹Ia oqo era sa mai vala o ira na kai Filisitia kei ira na Isireli; ia era sa dro na Isireli e matadra na kai Filisitia, ka ra sa vakamatei mai na Ulunivanua o Kiliboa.

²Era sa qai vakacemuri Saula kei iratou na luvena vakaukauwa o ira na kai Filisitia. Ia o ira na kai Filisitia era sa vakamatei Jonacani, Avinatave, kei Malekisua, oiratou na luve i Saula tagane.

³Sa kaukauwa cake vei Saula nai valu. Sa vanai koya o ira na dauvanavana, ka sa mavoa o koya ena gasau ni nodra dakai na dauvanavana.

⁴Sa qai tukuna o Saula vua sa daucolata na nonai yaragi, "Ucuna na nomui seleiwau, ka suaki au kina, de ra lako mai na tamata sega ni cili oqori ka vakacacani au." Ia sa sega ni rawa vua sa daucolata na nonai yaragi, baleta ni sa rere vakalevu. Sa mani vakaduria e dua nai seleiwau o Saula ka bale yani kina.

⁵Ia ni sa raici Saula na cauravou sa daucolata na nonai yaragi ni sa mate, sa baleta talega o koya na nonai seleiwau ka mate.

⁶Sa mani mate o Saula kei iratou na luvena tagane tolutolu, kei ira kece na nona lewe ni vale era sa mate vata kecega.

⁷Ia ni ra sa raica o ira na Isireli kecega era sa tiko e na buca ni ra sa dro kecega ka sa mate talega o Saula kei iratou na luvena, era sa biuta tani tu na nodra veikoro ka dro; era sa qai lako mai na kai Filisitia ka vakatawani ira.

⁸Ia sa yaco ena siga ka tarava, ni ra sa lako mai na kai Filisitia mera luvata na nodra i sulu na mate, era sa kunei Saula kei iratou na luvena ni ratou sa mate toka mai na Ulunivanua o Kiliboa.

⁹Era sa luvata na nonai sulu ka kauta na uluna kei na nonai yaragi, ka vakauta nai tukutuku ki na veivanu kece e Filisitia mera kacivaka nai tukutuku ena vei vale-ni-soro ni nodra veikalou matakau kei ira kece talega na tamata.

¹⁰Era sa qai biuta na nonai yaragi ena loma ni nodra bure kalou, ka vakarubeca na uluna ena bure kalou i Tekoni.

¹¹Ia ni ra sa rogoca kecega mai Jepesi-Kiliati na ka kecega era sa cakava na kai Filisitia kivei Saula,

¹²era sa duri cake na tamata qaqa ni valu kecega ka kauta na yago i Saula kei na yagodratou na luvena; ka ra sa kauta mai ki Jepesi, ka buluta na suidratou e na ruku ni vuni oki mai Jepesi, ka lolo me vitu na siga.

¹³Ia sa mate o Saula e na nona talaidredre ka cakava vei Jiova, baleta ni a sega ni maroroya na vosa i Jiova, ka ni a vakarorogo talega kina nonai vakasala e dua na dauvakacuru.

¹⁴Ia e a sega ni taroga na Kalou; sa mani vakamatei koya kina o Koya, ka solia na matanitu vei Tevita na luve i Jese.