[13] 1 Veigauna 14

¹Ia oqo o Irami na tui Taira sa talai ira na dau-tukutuku kivei Tevita, kei na kau na sitari, kei ira na matai ni vatu kei na matai ni kau, mera tara vua e dua na vale.

²Io sa kila o Tevita ni o Jiova sa vakadeitaki koya me tui e Isireli, ka ni sa vakalevulevui cake na nona matanitu e na vukudra na Nona tamata na Isireli.

³Sa qai taura o Tevita eso tale na watina e Jerusalemi, ka sa so tale na luvena tagane kei na luvena yalewa o Tevita.

⁴Ia oqo na yacadra na luvena ka vakatubura mai Jerusalemi: Samua, Sobaba, Necani, Solomoni,

⁵Iveri, Ilaisua, Ilipeleti,

⁶Noka, Nefeki, Jafia,

⁷Ilisama, Bieliada, kei Iliveleti.

⁸Ia oqo ni ra sa rogoca na kai Filisitia ni sa lumuti o Tevita me tui e Isireli, era sa lako taucoko na kai Filisitia mera vakasaqarai Tevita. Ka sa rogoca o Tevita na ka o ya ka lako yani i tautuba me veivala kei ira.

⁹Era sa qai lako na kai Filisita ka la'ki kaba na buca o Refeimi.

¹⁰Sa taroga na Kalou o Tevita, ka vaka, "Me'u lako cake li ka veivala kei ira na kai Filisitia? O Ni na soli ira beka ki na ligaqu?" Sa tukuna o Jiova kivei koya, "Lako cake, ni'u na soli ira ki na ligamu."

¹¹Era sa mani lako ki Peali-Perasimi, ka sa vakadrukai ira o Tevita maikea. Sa qai tukuna o Tevita, "Na Kalou sa curu basikati ira na kequ meca ena ligaqu me vaka ni sa kabasu nai vakaso ni wai." Sa mani vakayacani kina na vanua o ya oPeali-Perasimi.

¹²Ia ni sa biuta tu maikea na nodra kalou matakau, sa vakarota o Tevita me ra vakamai e na bukawaqa.

¹³Era sa baci kaba vakaivalu tale e na buca o ira na kai Filisitia.

¹⁴Sa taroga tale na Kalou o Tevita, ia sa tukuna vua na Kalou, "Mo kakua ni lako cake vei ira; vakavolivoliti ira ga, ka sikiti ira mai na mata ni vei vuni malaberi.

¹⁵"Ia ena yaco, ni dou sa rogoca na domo ni lako vakasotia ena tuvuka ni vei vuni malaberi oqori, dou qai lako ki nai valu, ni sa liu na Kalou vei kemudou me ravuta na keba ni kai Filisitia."

¹⁶Sa mani cakava o Tevita me vaka sa vakarota na Kalou vei koya, ka ra vakasavi ira lesu na mataivalu ni Filisitia mai Kipione me yaco sara ki Keseri.

¹⁷Sa qai kuruseta na vanua taucoko nai rogorogo kei Tevita, ka sa vakavuna o Jiova me ra rerevaki koya na veimatanitu kecega.