[13] 1 Veigauna 15

¹A sa tara o Tevita na veivale me nona ena Koro i Tevita; ka sa vakarautaka e dua na vanua me tiko kina na kato ni Kalou, ka vakaduria e dua na kena vale laca.

²Sa qai tukuna o Tevita, "Me kakua ni dua me laveta na kato ni Kalou o ira ga na Livai, ni sa digitaki ira o Jiova me ra kauta na kato ni Kalou ka veiqaravi e matana me sega ni mudu."

³Ia o Tevita sa vakasoqoni ira vata mai na Isireli kecega ki Jerusalemi, mera kauta cake mai na kato ni Kalou ki na kena vale, o koya sa vakarautaka oti tu o koya.

⁴Sa qai vakasoqoni ira vata na luve i Eroni kei ira na Livai o Tevita:

⁵Mai vei ira luve i Koaca tagane, sa liu o Urieli, kei na lewe dua na drau ruasagavulu na wekana;

⁶Mai vei ira na luve i Merari tagane, sa liu o Asaia, kei na lewe rua na drau ruasagavulu na wekana;

⁷Mai vei ira na luve i Keresomi tagane, sa liu o Joeli, kei na lewe dua na drau tolusagavulu na wekana;

⁸Mai vei ira na luve i Ilisavani, sa liu o Semaia, kei na lewe rua na drau na wekana;

⁹Mai vei ira na luve i Epironi tagane, sa liu o Elieli, kei na lewe walusagavulu na wekana;

¹⁰Mai vei ira na luve i Usieli tagane, sa liu o Amenatave, kei na lewe dua na drau tinikarua na wekana.

¹¹Ka sa kacivi rau o Setoki kei Aviaca na bete, vei ira talega na Livai: vei Urieli, Asaia, Joeli, Semaia, Elieli, kei Amenatave.

¹²Sa tukuna o koya kivei ira, "Oi kemudou na ulu ni veivuvale i Livai na tamamudou; dou vakasavasavataki kemudou, kei ira talega na wekamudou, ka mo dou na kauta cake mai na kato i Jiova na Kalou i Isireli ki na vanua au sa vakarautaka oti tu.

¹³"Me baleta ni dou a sega ni cakava oqo e liu, sa tawasei Koya tani kina mai vei keda o Jiova na noda Kalou, baleta ni da a sega ni tarogi Koya ena kenai tuvatuva dodonu."

¹⁴Ia oqo era sa vakasavasavataki ira o ira na bete kei ira na Livai me ra kauta cake na kato i Jiova na Kalou ni Isireli.

¹⁵Era sa colata na luve i Livai e domodra na kato ni Kalou, ena kenai vua, me vaka nai vakaro i Mosese e tukuna na vosa i Jiova.

¹⁶Sa qai tukuna o Tevita vei ira na nodra i liuliu na Livai me ra digitaka eso na wekadra mera dauni- sere ka ra salavata kei nai vakatagi, vakatagi vakawa, na api, sibali, e na nodra tabalaka na domodra ena reki.

¹⁷Ia o ira na Livai era sa qai digitaki Emani na luve i Joeli tagane; mai vei ira na wekana o Asafa na luve i Verekaia tagane; mai vei ira na wekana, o ira na luve i Merari, o Ecani na luve i Kusaia tagane;

¹⁸ka sa tiko vata kei ira o ira na wekadra e nai karua ni vakatagedegede: Sakaraia, Peni, Jeasieli, Semiramoce, Jeieli, Uni, Iliavi, Penaia, Measeia, Maticia, Elifele, Mikineia, Opeti-Itomi, kei Jeieli, o ira nai vakatawa ni matamata;

¹⁹na daunisere, o Emani, Asafa, kei Ecani, me ratou tukia na sibali varasa;

²⁰Sakaraia, Asieli, Semiramoci, Jeieli, Uni, Iliavi, Measeia, kei Penaia, e nai vakatagi vakawa vakataki Alamoci;

²¹O Maticia, Elifele, Mikineia, Opeti-Itomi, Jeieli, kei Asasia, mera liuataka ena Api sa tiko ena Seminici;

²²O Kenanaia, na nodra i liuliu na Livai, sa qasenivuli liu ni sere kei nai vakatagi, baleta ni matai dina;

²³O Verekaia kei Elikana e rau i vakatawa ni katuba ni kato ni Kalou;

²⁴O Sevanaia, Josafati, Necaneli, Amasai, Sakaraia, Penaia, kei Iliesa, o iratou na bete, e ratou na uvuca na biukila ena mata ni kato ni Kalou; ia o Opeti-Itomi kei Jeaia nai vakatawa ni katuba ni kato.

²⁵Ia o Tevita, o ira na qase e Isireli, kei ira na kavetani ni lewe udolu era sa lako ka kauta mai na kato ni veiyalayalati i Jiova, mai na vale i Opeti- Itomi ena marau.

²⁶Sa qai yaco ena gauna sa vukei ira kina na Livai o ira sa dau colata na kato ni veiyalayalati i Jiova, na Kalou, era sa qai vakacabora e vitu na bulumakau tagane kei na vitu na sipi tagane.

²⁷O Tevita e sulumaka tu e dua nai ubi lineni matailalai, vakatalega kina o ira na Livai era colata tiko na kato, o ira na daunisere, kei Kenanaiti na qasenivuli ni sere vata kei ira na matasere. Sa vakaefoti lineni talega o Tevita.

²⁸O koya oqo o ira na Isireli era sa kauta cake mai na kato ni veiyalayalati i Jiova e na kaikaila kei na domo ni davui, na biukila kei na sibali, ni ra qiria nai vakatagi vakawa kei na api.

²⁹Ia sa yaco, ni sa kau mai na kato i Jiova ki na Koro i Tevita, sa iro yani mai na mata ni katuba leka o Maikali, na luve i Saula yalewa, ka raici Tevita ni sa meke katagi; ka sa beci koya sara e lomana.