[13] 1 Veigauna 17

¹Ia ni sa oti o ya, ni sa tiko o Tevita e na nona vale, sa tukuna o Tevita vei Necani na parofita, "Raica oqo, au sa tiko ena vale sitari, ia na kato ni veiyalayalati i Jiova sa tiko ena loma ni vale laca."

²Sa qai tukuna o Necani vei Tevita, "Cakava na ka kecega sa tiko e yalomu, ni sa tiko vata kei iko na Kalou."

³Ia sa yaco ena bogi ga o ya ni sa rogo mai na vosa ni Kalou vei Necani, ka vaka,

⁴"Lako ka la'ki tukuna vei Tevita na noqu tamata, 'Sa vakaoqo na ka sa tukuna o Jiova: "O na sega ni tara vei au e dua na vale Me'u tiko kina.

⁵"Ni'u a sega tale ni bau tiko e na dua na vale me tekivu mai na gauna Au vakatuburi Isireli cake kina, me yacova mai na siga oqo, ia Au a lako voli ga mai na vale laca ki na vale laca, mai na dua na valenisoro ki na dua tale.

⁶"Na veivanua kece Au lakova vata kei ira na Isireli, Au bau cavuta li e dua na vosa vua e dua na turaganilewa e Isireli, o ira Au sa lesia me ra vakatawai ira na Noqu tamata, ka tukuna, 'Ena vuku ni cava dou sa sega ni tara kina vei Au e dua na vale sa caka e na sitari?""

⁷"Ia oqo, mo na tukuna vua na Noqu tamata o Tevita, 'Sa tukuna vakaoqo o Jiova ni lewe vuqa: "Au a kauti iko tani mai na qele ni sipi, mai na nomu vakamuri ira voli na sipi, mo mai tui vei ira na Noqu tamata na Isireli.

⁸"Ka'u sa tu vata kei iko ena veivanua kecega o lakova, ka tamusuki ira kecega na kemu meca mai matamu, ka vakayacani iko ena dua na yaca e tautauvata kei na yacadra na tamata qaqa era sa tiko e vuravura.

⁹"E dina Au na lesia e dua na vanua vei ira na Noqu tamata na Isireli, Au na tei ira, ka me ra na tiko vakadua e na dua na vanua e nodra ka sega tale ni veitokiyaki; se me ra mai vakararawataki ira tale o ira na luve ni valavala ca, me vaka e liu,

¹⁰"Me tekivu mai na gauna Au a vakaroti ira kina na daunilewa mera liutaki ira na Noqu tamata na Isireli. Au na vakamalumalumutaki ira talega na kemudou meca. Ia Au sa tukuna talega vei iko ni na tara vei iko o Jiova e dua na vale.

¹¹"Ia ena yaco, ni sa oti na nomu veisiga, ni o sa na lako vakaidina vei ira na na tamamu, Ni'u na vakatubura na nomu kawa me kemui sosomi, ena dua ga o koya vei ira na luvemu; ia Au na vakadeitaka na nona matanitu.

¹²"Ena tara vei Au o koya e dua na Noqu vale, ia Au na vakadeitaka na nonai tikotiko vakaturaga me sega ni mudu.

¹³"Au na Tamana, ka na Luvequ o koya; ia na Noqu yalololoma Au na sega ni kauta tani mai vei koya, me vaka Au a kauta tani mai vei koya sa liu vei iko.

¹⁴"Ia Au na vakadeitaki koya ena Noqu vale kei na Noqu matanitu me sega ni mudu; kei na nonai tikotiko vakaturaga me sega ni mudu."'"

¹⁵Me vaka na vosa kecega oqo ka me vaka na raivotu kecega oqo, sa vosataka o Necani vei Tevita.

¹⁶Sa qai curu yani ki loma o Tevita ka la'ki dabe sobu ena matai Jiova; ka tukuna o koya: "O cei o au i Jiova na Kalou? Se cava mada na noqu vuvale, Mo Ni kauti au mai kina me yacova mai oqo?

¹⁷"Ia sa dina ni sa ka lailai ga oqo ena Matamuni, noqu Kalou: ka o ni sa vosa oti tale tikoga me baleta na nona vuvale na Nomuni tamata me yacova na veigauna maimuri, ka sa raici au me vaka e dua vei ira na turaga dokai, I Jiova na Kalou.

¹⁸"Na cava tale me tukuna vei kemuni o Tevita me baleta na Nomuni dokai koya na Nomuni tamata? Ni o ni sa kilai koya na Nomuni tamata.

¹⁹"I Jiova, ena vukuna na Nomuni tamata, ka me vaka talega na Lomamuni, o ni sa cakava na ka cecere oqo, ni o ni sa vakatakila na veika cecere oqo.

²⁰"I Jiova, e sega tale ni dua e tautauvata kei kemuni, se dua tale me tu e Yasamuni, me vaka na ka kecega keimami sa dau rogoca ena daligai keimami.

²¹"Ia o cei e tautauvata kei ira na Nomuni tamata na Isireli, na matanitu duadua ga e vuravura ka a lako mai na Kalou me mai volia lesu me ra Nona tamata “ me cakava vei Kemuni e dua na yaca rogo ena vuku ni cakacaka cecere ka veivakurabuitaki, ena nodra vakasavi tani na veimatanitu e matadra na Nomuni tamata o ni a voli ira lesu tale mai Ijipita?

²²"Ni o ni sa vakayacori ira na Nomuni tamata na Isireli mera Nomuni tamata sega ni mudu; ia oi Kemuni Jiova, sa yaco me nodra Kalou.

²³"Ia oqo, i Jiova, na vosa o ni sa cavuta me baleti koya na Nomuni tamata ka baleta na nona vuvale, me vakadeitaki ka sega ni mudu, ka Mo ni vakayacora me vaka na ka o ni a tukuna.

²⁴"Ia me vakadeitaki mada, me sa vakacaucautaki na Yacamuni ka sega ni mudu, ka vaka, 'O Jiova ni lewe vuqa, na Kalou nei Isireli, sa Kalou ni Isireli.' Ka vakayacora na vuvale i Tevita me tudei e Matamuni.

²⁵"Ni Oi Kemuni, Na noqu Kalou, sa vakatakila vua na Nomuni tamata ni o ni na tara e dua na vale me nona. O koya oqo sa kunea kina e lomana na Nomuni tamata me masu vei Kemuni.

²⁶"Ia oqo, Jiova, o ni sa noqu Kalou, ka o ni sa yalataka na veivakalouvinakataki oqo vua na Nomuni tamata.

²⁷O ni sa marautaka e daidai Mo ni vakalouvinakataka na vuvale ni Nomuni tamata, ka me tu ga e Matamuni me sega ni mudu; ni o ni sa vakalouvinakataka, i Jiova, ka na vakalouvinakataki me sega ni mudu."