[13] 1 Veigauna 23

¹Ia ni sa qase mai o Tevita ka sa vuqa na nona veisiga, sa buli Solomoni na luvena me tui vei ira na Isireli.

²Ia o koya sa vakasoqoni ira vata mai nai liuliu kecega e Isireli, kei ira kecega na bete kei ira na Livai.

³Ia oqo sa tauri na kedra i wiliwili na Livai me tekivu mai vua sa yabaki tolusagavulu se sivia; ia na kedra i wiliwili na tagane e tolusagavulu ka walu na udolu.

⁴Vei ira oqo, e lewe ruasagavulu kava na udolu mera vakaraica na cakacaka ena vale i Jiova, e ono na udolu mera ovisa kei na turaganilewa,

⁵e va na udolu mera i vakatawa ni matamata, e va na udolu era dausere ni vakavinavinaka vei Jiova kei nai vakatagi, "O koya au a cakava," e tukuna o Tevita, "Me ka ga ni vakavinavinaka."

⁶Sa wasei ira talega o Tevita kivei iratou na luve i Livai: O Keresoni, Koaca, kei Merari.

⁷Vei ira na luve i Keresoni tagane: O Leadani kei Simei.

⁸Na luve i Leadani tagane: na kenai matai o Jeieli, sa qai tarava o Secame kei Joeli ” e lewe tolu taucoko.

⁹Na luve i Simei tagane: O Selomici, Asieli, kei Arana ”e tolu taucoko. O iratou oqo na ulu ni vuvale i Leadani na tamadratou.

¹⁰Kei na luve i Simei tagane: O Jeaca, Sina, Jeusi, kei Veraia. O iratou oqo na luve i Simei tagane.

¹¹O Jeaca na ulumatua kei Sisa na kenai karua. Ia o Jeusi kei Veraia e sega ni levu na luvedrau tagane; o koya oqo sa lesi kina vei rau me dua ga na vuvale.

¹²Na luve i Koaca tagane: O Amirami, Isari, Epironi, kei Usieli ” e ratou lewe va taucoko.

¹³Oi rau na luve i Amirami: O Eroni kei Mosese; ka sa tawasei tani o Eroni, o koya kei ira na luvena tagane me sega ni mudu, me vakasavasavataka o koya na veika sa tabu sara, me vakama na veika boi vinaka e na matai Jiova, me veiqaravi ki Vua, ka me solia na veivakalouvinakataki e na Yacana me sega ni mudu.

¹⁴Ia oqo oi rau na luve i Mosese na tamata ni Kalou e rau sa wili vata kei ira na yavusa i Livai.

¹⁵Oi rau na luve i Mosese tagane o Keresoni kei Iliesa.

¹⁶Vei ira na luve i Keresoni tagane, e ulumatua o Sevueli.

¹⁷Vei ira na kawa i Iliesa, e ulumatua o Riavaia. Ia e sega tale ni dua na luve i Iliesa tagane, ia era lewe levu sara na luve i Riavaia tagane.

¹⁸Vei ira na luve i Isari tagane, e ulumatua o Selomici.

¹⁹Vei ira na luve i Epironi tagane, e ulumatua o Jeraia, kenai karua o Amaraia, ai katolu o Jeasieli, kei Jekameami na kenai kava.

²⁰Vei ira na luve Usieli, e ulumatua o Maika kai karua o Jesaia.

²¹Oi rau na luve i Merari tagane o Mali kei Musi. Na luve i Mali o Iliesa kei Kisi.

²²Ia sa mate oiliesa, ka sega na luvena tagane, ia sa vakaluveni yalewa ga; ia o ira na wekadra, na luve i Kisi tagane, era sa tauri ira mera watidra.

²³Na luve i Musi tagane o Mali, Eta, kei Jeremoce ” e ratou lewe tolu taucoko.

²⁴Oqo o ira na luve i Livai mai na dui nodra vuvale na tamadra ” na ulu ni veivuvale i tamadra me vaka era sa wiliki yadudua mai na veitaravi ni yacadra, o koya sa cakava na cakacaka ni vale i Jiova, me tekivu mai vei koya sa yabaki ruasagavulu ka lako cake.

²⁵Ni sa tukuna o Tevita, "O Jiova na Kalou i Isireli sa solia na vakacegu vei ira na Nona tamata, ka me ra na tiko e Jerusalemi ka sega ni mudu";

²⁶Ia vei ira talega na Livai, "Era na sega tale ni kauta tiko na valenisoro, se dua vei ira nai yaya ni veiqaravi."

²⁷Ia mai nai otioti ni vakaro i Tevita sa wili na kedra levu na Livai me tekivu vei ira na yabaki ruasagavulu ka lako cake;

²⁸Baleta ni nodra i tavi me ra vukei ira na luve i Eroni ena veiqaravi ena vale i Jiova, ena valenisoro kei na kena vei tikini vale e loma, ena kena vakasavasavataki na ka tabu kecega kei na cakacaka ni veiqaravi ena vale ni Kalou,

²⁹Me baleta ruarua na madrai dauraici kei na valawa qaqi vakamatailalai me ka ni soro sulutana, vata kei na keke sega ni vakai “ vakatubu kei na ka sa vavi e nai tavuteke, kei na ka e veiwakitaki me vaka na kenai vakarau kei na kena levu yadua;

³⁰Me ra tucake tu ena veimataka mera vakavinavinaka ka vakalavelaveti Jiova, ka vaka talega kina ena veiyakavi;

³¹Kei na veigauna taucoko ni vakacaboi soro kama vei Jiova ena veiSiga ni Vakacecegu kei na veivula vou kei na veigauna ni kana magiti vakarautaki, ena kedra i wiliwili me vaka na veitaravi ni lewa vei ira, me caka ena veigauna kecega ena mata i Jiova;

³²Ka mera na dau qarava na ka kecega e gadrevi ena veigauna kece ni soqoni ena vale ni soro, na ka e gadrevi ena vale tabu, kei na ka era gadreva na luve i Eroni era wekadra ena cakacaka ni vale i Jiova.