[46] 1 Koronica 13

¹Kevaka au sa vosataka na nodra dui vosavosa na tamata kei na vosa ni agilosi, ia ka sega vei au na loloma, au sa vaka walega na kaukamea sa rorogo, kei na veleti varasa sa tataqiriqiri.

²Kevaka sa tiko vei au nai solisoli ni parofisai kei na kila na veika kecega, kevaka sa tu vei au na vakabauta kecega me rawa ni'u tosoa kina na ulunivanua, ia ka sega vei au na loloma, au sa ka walega.

³Kevaka au solia kece na noqui yau me ra kana kina na dravudravua, kevaka au solia na yagoqu me'u vakamai, ia ka sega vei au na loloma, sa sega sara ga ni dua na ka e yaga me'u na rawata mai kina.

⁴Na loloma sa dauvosota vakadede ka dau yalovinaka; na loloma e sega ni dau vuvu; na loloma sa sega ni vosa doudou se me viavialevu;

⁵Sa sega ni sabalia tu nona i tovo, sa sega ni qara na ka baleti koya, sa sega ni dau vakavuca, sa sega ni dau vakanananu ca;

⁶Sa sega ni rekitaka na ka ca, ia sa rekitaka ga na dina;

⁷Sa dau ciqoma ena galu na ka kecega, sa vakadinata na ka kecega, sa vakanuinuitaka na ka kecega, sa vosota na ka kecega.

⁸Na loloma ena sega ni oti. Na parofisai ena oti mai, na vosatani eso ena oti mai, na kila ka ena seavu yani.

⁹Na noda kila ka kei na noda parofisai e sega ni ka e taucoko.

¹⁰Ia ni sa qai yaco mai na ka e taucoko, na vakamumuri esa na yali tani.

¹¹Ni'u a gone, au vosa me vaka na gone, au kila ka me vaka tu ga na gone, au vakanananu me vaka na gone; ia ni'u sa qase cake mai, au biuta laivi kece na bula vagonegonea.

¹²Ena gauna oqo, na noda rai e vaka na noda tirovi keda ena Iloilo buwawa, ia ena qai yaco mai na gauna meda na veisotari mata kina ena matanavotu. Na noqu kila se bera ni taucoko, ia ena yaco mai na gauna me'u na kila kina na ka e dodonu me'u kila deivaki.

¹³E tolu na ka oqo, sai koya na vakabauta, nai nuinui, na loloma; ia vei ratou oqo, e uasivi duadua na loloma.