[46] 1 Koronica 14

¹Dou cicimuria na loloma, ka mo dou gadreva nai solisoli vakayalo, ia dou saga vakaukauwa mo dou parofisai.

²Vei koya e vosataka na vosa tani e sega ni vosa vei ira na tamata, ia vua ga na Kalou, ena sega ni dua me kila na ka e cavuta tiko; ni cavuta na veika vuni me vaka sa solia vua na Yalo Tabu.

³Ia o koya sa parofisai, e veivakatatakicake e veivakavulici e veivakacegui vei ira na tamata.

⁴O koya e vosataka na vosa tani e vakatataki koya ga, ia o koya sa parofisai e vakatataki ira nai soqosoqo lewe ni lotu.

⁵Au vinakati kemudou mo dou vosataka na vosa tani, ia ke dua na ka me uasivi sara vei kemudou modou parofisai; ni o koya e parofisai e bibi cake mai vei koya e vosataka tiko na vosa tani eso, na vosa tani me vakadewataki me rawa ni vakatataki kina nai soqosoqo lewe ni lotu.

⁶Ia oqo, na veiwekani, kevaka me'u lako mai vei kemudou ena noqu tukuna na vosa tani, ena sega sara ga ni dua na ka dou na taura rawa mai vei au, dou na taura ga kevaka me'u tukuna nona veivakatakilai na Kalou, se na ka au kila, se na noqu parofisai, se na noqu veivakatavulici?

⁷Nai yaya mada ga ni vakatagi e ka mate, na api, na bitu ni vakatagi e tu vei ira na veimataqali rorogo mera dau solia, ena rawa vakacava me kilai na duidui ni rorogo ni vakatagi, kevaka me sega ni dua e kila na qiria?

⁸Kevaka me sega ni uvuci vinaka me vaka na kenai vakarau na davui ni valu, ena qai rawa vakacava mera vakavakarau kina i valu?

⁹Sa vakakina oi kemudou, kevaka mo dou sa sega ni qai tukuna tiko na vosa eda kila rawa, ena qai tauri rawa vakacava na ka dou via tukuna tiko? Na nomudou vosa dou sa na vosa tuga kina cagi.

¹⁰O vuravura era tu kina na veimataqali vosa duidui, e sega ni dua na vosa oqori me sega ni kilai na kena i balebale.

¹¹O koya oqo, kevaka me'u sega ni kila nai balebale ni vosa e cavuti, oi au e dua na vulagi vei koya e cavuta tiko e vulagi vei au.

¹²Ena nomudou rui gadreva vakalevu nai solisoli vakayalo, dou kerea o koya e uasivi sara na kena vakatataki cake nai soqosoqo lotu.

¹³O koya oqo, vei koya e vosataka na vosa tani eso me masulaka me rawa ni kila na kena vakadewataki.

¹⁴Kevaka me'u masu ena dua na vosa au sega ni kila ka masu tiko na yaloqu, au na sega ni kila na ka au cavuta tiko ni na veilecayaki noqu vakasama.

¹⁵Na cava me'u na cakava? Au na masu ena yaloqu kei na noqu vakasama, au na lagasere talega ena yaloqu kei na noqu vakasama.

¹⁶Kevaka mada mo vakavinavinaka ena nomu cavuta na vosa e sega ni kilai, ena qai rawa vakacava vei koya e sega ni lotu me vaka emeni ena ka o tukuna tiko, ni sega sara tu ga ni bau kila o koya na ka o tukuna tiko.

¹⁷Na nomu vakavinavinaka o kila tiko na kena talei, ia o koya e toka tikivi iko ka sega ni lotu, e sega ni vakatataki koya cake.

¹⁸Au vakavinavinaka vua na noqu Kalou, ni'u uasivi vei kemudou kecega ena vosa ni veivanua tani;

¹⁹Ena gauna ni lotu ena vinaka me'u cavuta e lima na veimataqali vosa e rawa ni kilai, me'u vakavulici kemudou kina, ka ca ga me'u cavuta e tini na udolu na vosa mai na vosa tani.

²⁰Oi kemudou na veiwekani, dou kakua ni vagonegonea tiko; dou na lecava kina na cakacaka ni butobuto me vaka na gone lalai, ia me tubu cake nomudou kila ka mo dou matua kina.

²¹Ena vunau sa volai tu kina: "Au na vosa vei ira na tamata oqo mai na nodra vosa ni gusudra na tamata mai na veivanua eso; io era na sega ga ni via rogoci au mai," sa tukuna na turaga.

²²O koya oqo na vosa tani eso sai vakatakilakila, vei ira na sega ni lotu ka sega ni vei ira na lotu; ia na parofisai baleti ira na lotu ka sega ni vei ira na sega ni lotu.

²³Vakacava mada kevaka mo dou soqoni ena nomudou lotu, ka dou qai vosataka kece na vosa ni veivanua tani, mera lotu tale tikoga kei kemudou na sega ni lotu kei ira na sega vei ira nai solisoli oqo, era na sega beka ni tukuna ni sa ca na ulumudou?

²⁴Ia kevaka mo dou parofisai taucoko, qai curu mai e dua na sega ni lotu ka sega ni vakabauta nai solisoli oqo, esa na ciqoma taucoko o koya ni kila na nona cala, na nona lewa e loma ena beitaki koya mai na ka e rogoca.

²⁵Sa na vakaraitaki ga mai na ka e vuni tu e yalona; mena tekiduru sobu kina ena vakarokoroko vua na Kalou, me tusanaka ni sa tiko vakaidina kei kemudou na Kalou.

²⁶Sa qai vakaevei, kemudou na veiwekani? Ni dou sa soqoni vata dou sa dui taura yadua na sere, nai vakavuvuli, na veivakatakilai ni Kalou, na vosatani eso, na vakadewataki ni vosa. Me caka na ka kecega oqo modou vakatataki kina.

²⁷Kevaka e dua sa vosa ena vosa tani, ke levu me tolu se rua ga, me veitaravi yadua, me dua e tiko me vakadewataka.

²⁸Ia kevaka sa sega ni dua e tiko me vakadewataka, me kakua ni vosaicake me rogoca taucoko na tamata, me vosa toka ga i ra ni o koya ga kei na Kalou.

²⁹Me lewe rua se tolu na parofita me vosa, na kena vo mera dabe ka vakalewa vinaka.

³⁰Ia kevaka sa vakatakila vua na Kalou, e dua na ka vei koya e dabe voleka tiko, o koya e tucake tiko me dabe sobu ka galu.

³¹Ni sa rawa vei kemudou mo dou parofisai veitaravi yadudua, me yaco kina na veivakatavulici kei na veivakayaloqaqataki.

³²Na yalo ni parofita sa vakarorogo ki vua na parofita.

³³Sa sega ni dau vakavuna na Kalou na veilecayaki, ia na tiko sautu ga, me vaka sa yaco ena i soqosoqo lotu ni tamata sa vakabulai.

³⁴Ena nomudou vei soqosoqo lotu mera galu tiko na yalewa, ni sa sega ni vakatarai vei ira mera vosa; ia mera dau vakarorogo, ni sa tukuna talega na vunau.

³⁵Kevaka e dua na ka era vinakata mera kila, mera qai laki taroga ga i vale vua na watidra; ni ka vakamadua me vosa tiko e dua na yalewa ena i soqosoqo lotu.

³⁶Sa vu li mai vei kemudou na vosa ni Kalou? Se na vukumudou li sa yaco mai kina?

³⁷Kevaka e dua sa nanuma ni o koya e dua na parofita se tamata vakayalo, me kila sara ni sai vakaro ni turaga na veika au vola tiko yani oqo.

³⁸Ia kevaka e dua e sega ni via kila oqo, ena sega tu ga vua na kila ka.

³⁹O koya oqo, mo dou gadreva vakalevu mo dou parofisai, ia na vosa ni veivanua tani eso, mo dou kakua ni tarova.

⁴⁰Na ka kecega me caka vaka rairai vinaka ka vakamatau talega.