[46] 1 Koronica 15

¹Oqo me'u vakananumi kemudou na veiwekani, nai tukutuku vinaka au vunautaka vei kemudou, o koya dou sa vakabauta ka dou sa tudei talega kina,

²Nai tukutuku vinaka oqo dou vakabulai mai kina, kevaka modou taura dei tiko na vosa ni Kalou au vunautaka vei kemudou “ kevaka mo dou kua ni vakawaletaka na nomudou sa mai vakabauta.

³Au wasea taumada vei kemudou na ka e vakaraitaki vei au: Ni sa mate na Karisito ena vuku ni noda i valavala ca me vaka nai Vola Tabu,

⁴Ni sa bulu talega, ka ni sa tucake talega ena i katolu ni siga, me vaka nai Vola Tabu,

⁵Ni sa rairai talega vei Kifa, vei ira e muri na lewe tinikarua.

⁶Ni sa oti o ya sa qai rairai vei ira na mata veiwekani era lewe lima na drau ka vakacaca, e lewe levu vei ira se bula tiko me yacova mai oqo, ia eso vei ira sa moce.

⁷Ni oti o ya sa rairai vei Jemesa, ka qai rairai vei ira taucoko na Apositolo.

⁸E qai mai rairai talega vei au e muri, ena noqu qai mai sucu berata na veika oqo.

⁹Oi au e lailai sobu mai vei ira nai Apositolo, ka sega ni ganiti au me'u vakatokai mei Apositolo, baleta ena noqu dau vakararawataki ira nai soqosoqo lotu ni Kalou.

¹⁰Ia na loloma ga ni Kalou au sa yaco kina ena noqu tiko e daidai, na nona yalololoma vei au e sega ni ka wale; au gumatua ena noqu cakacaka mai vei ira kecega, e sega ni o au, ia na loloma ga ni Kalou o koya sa tiko vei au.

¹¹O koya oqo, oi au se o ira, e sega ni dua na ka, e bibi ga na neitou i vunau modou vakabauta. Sa Noda I Nuinui, Na Karisito Tucake Tale

¹²Kevaka sa vunautaki na Karisito ni sa vakaturi cake tale mai na mate, era sa tukuna vakacava eso vei kemudou ni sa sega na tucake tale mai na mate?

¹³Ia kevaka sa sega ni tucake tale o ira na mate, sa qai sega ni tucake tale mai na Karisito.

¹⁴Kevaka sa sega ni tucake tale mai na Karisito, sa sega ni yaga neitou i vunau ka sega ni yaga talega nomudou vakabauta.

¹⁵Io keitou na laurai kina ni keitou mai lasutaka tiko nai tukutuku ni Kalou, ni keitou mai tukuna tiko ni vakaturi Karisito cake na Kalou, e sega ni tucake dina mai o koya “ kevaka mera sega ni tucake mai o ira na mate.

¹⁶Kevaka me sega ni tucake tale o ira na mate, ena sega talega ni tucake tale na Karisito.

¹⁷Kevaka sa sega ni vakaturi cake tale na Karisito, e maumau walega nomudou vakabauta; dou se vesuki tu ga ena i valavala ca!

¹⁸Kei ira talega na tamata lotu era sa mate, era na rusa.

¹⁹Kevaka eda sa vakanuinui me yaga vei keda na Karisito ena bula oqo, eda sa qai vakaloloma vakalevu cake vei ira kecega na tamata.

²⁰Ia oqo na Karisito sa tucake mai na mate, ka sa yaco mei sevu ni tucake tale vei ira sa moce tu.

²¹Ni sa qai vuni mate na tamata, sa qai vuni tucake tale mai na mate na tamata talega.

²²Ni sa qai mate kecega ena vuku i Atama, ena vakabulai kece talega ena vuku i Karisito.

²³Ia eda na dui muria ga nai tuvatuva: O Karisito sa kenai sevu, era na muri o ira sa tu vata kei Karisito ena nona na rairai mai.

²⁴Ni oti o ya sa qai yaco nai vakataotioti, ena solia lesu na matanitu ni Kalou vei tamana, ni sa vakarusai taucoko na vei vuni kaukauwa, na lewa kecega, kei ira sa lewa.

²⁵Ena qai yaco o koya me vakatulewa, ni ra sa vakamalumalumutaki taucoko na kena meca mera tu ena ruku ni yavana.

²⁶Na kena meca mena qai vakarusai taudua e muri oqori o mate.

²⁷"Ni sa vakamalumalumutaka na ka kecega sa tu ena ruku ni yavana," Ia ni sa tukuna, "Na ka kecega sa tu ena ruku ni yavana," sa na uasivi sara o koya e vakamalumalumutaki koya ena ruku ni yavana ena ciqomi.

²⁸Ni vakamalumalumutaki koya na tamata kecega vei koya, o koya (Jisu) ena qai vakamalumalumutaki koya vei tamana ni solia vua na lewa kecega, me nona tikoga kina na Kalou na lagilagi kei na vakarokoroko kecega.

²⁹A cava na betena vei ira na papitaiso ena vukudra na mate, kevaka me ra sega ni tucake tale na mate? Cava mera papitaiso tiko kina ena vukudra na mate?

³⁰Ka cava me keitou bolea talega kina na mate ena vei auwa kecega?

³¹Au via tukuna dina, na veiwekani, ni sa dua na ka noqu rekitaki kemudou, ena vuku i Jisu Karisito na noda turaga, ena veisiga au sa mate tikoga.

³²Kevaka sa vakatamata ga na noqu veivala kei ira na manumanu daukata mai Efeso, a cava na kena yaga vei au? Kevaka mera sega ni tucake tale o ira na mate, "Meda sa kana ga, ka gunu yani ni da na mate ni mataka!"

³³Dou kakua ni vakaisini kemudou tiko vakai kemudou: "Na dau veitokani kei ira nai valavala vakabutobuto, ena vakayalia vakadua nai valavala uasivi."

³⁴Dou yadrava tiko na bula dodonu, dou kakua ni valavala ca tiko; ni so vei kemudou se bera ni se kila vinaka tiko na Kalou. Au vosa vakaoqo modou rawa ni madua kina.

³⁵Ia ena dua ena baci tukuna, ena vakaturi cake rawa vakaevei na mate? Ena vakacava na yagodra ni ra sa tucake mai?

³⁶O iko e dua na lialia, na ka o kaburaka kina qele, kevaka me sega ni mate mada ena sega ni rawa me bula.

³⁷Na ka o kaburaka, ni sa tubu cake mai o sega ni kaburaka na yago o ya, ia ena basika mai na sila - se witi se so tale na sila tani.

³⁸Ia na Kalou ena tokara vua e dua na yago vou me vaka sa vinakata o koya, na vei sore ni tei taucoko, era na tokara na yago vou ni ra sa bula cake mai.

³⁹E vaka talega kina na vei lewe ni ka, ia na tamata e tautauvata taucoko na lewedra, na manumanu yava i va e dua tani na lewedra, na ika e duatani tale na lewedra, na manumanu vuka e duatani talega na lewedra.

⁴⁰E tiko na yago vakalomalagi ka tiko na yago vakavuravura, nai ukuuku ni yago vakalomalagi e duatani, nai ukuuku ni yago vakavuravura e duatani.

⁴¹Sa duatani nai ukuuku ni matanisiga, ka sa duatani nai ukuuku ni vula, ka sa duatani nai ukuuku ni veikalokalo, ka duatani talega nai serau era solia na veikalokalo yadudua.

⁴²Sa vaka talega kina na tucake tale mai na mate. Ni sa biu sobu na yago sa vuca ka luca yani, ia ni sa tucake tale mai sa yago e vakaiukuukutaki vakalomalagi.

⁴³Ni sa tei, sa vakasisilataki, ni sa vakaturi cake sa vakaiukuukutaki, ni sa tei sa malumalumu, ni sa vakaturi cake sa tu vua na kaukauwa.

⁴⁴Ni sa tei sa yago dina ga vakatamata, ni sa qai vakaturi cake tale, sa yago vakayalo. E tiko na yago dina vakatamata, ka tiko na yago dina vakayalo.

⁴⁵Ni sa volai, "nai matai ni tamata o Atama sa soli vua na yago dina vakatamata." Na Atama qai muri mai sa yaco o koya me yalo sa solia na veivakabulai.

⁴⁶Ia sa sega ni liu o koya sa vakayalo, e liu o koya sa vakayago, sa qai tarava mai o koya sa vakayalo.

⁴⁷Nai matai ni tamata e buli mai ena kuvu ni qele; nai karua ni tamata sai koya na turaga sa lako sobu mai lomalagi.

⁴⁸Me vakataki koya sa buli mai ena kuvu ni qele, era na vaka talega kina o ira era ucui koya; me vakataki koya sa lako sobu mai lomalagi, era na vakatalega kina o ira era ucui koya.

⁴⁹Ni da sa tautauvata kei koya sa buli ena kuvu ni qele, meda segata meda tautauvata sara kei koya sa lako mai lomalagi.

⁵⁰Me'u tukuna vei kemudou na veiwekani na ka oqo, ena dredre sara me curu kina matanitu vakalomalagi na lewe kei na dra; na yago vucavuca rawarawa oqo ena sega ni rawa me bulabula tikoga me Sega ni mudu.

⁵¹Raica, au na tukuna vei kemudou e dua na ka vuni: eda na sega ni moce kece, ia eda na veisautaki ka vakamataliataki.

⁵²Ena vakasauri sara, me vaka na sauriva ni mata, ena kena uvuci nai otioti ni davui. Na davui mera na tucake mai kina o ira sa mate tu vata kei Jisu, mera na sega ni mate tale, kei keda sa bula tiko meda veisautaki ka vakamataliataki vata talega.

⁵³Sa na vakavoui na yago vuca oqo me kakua tale ni vuca rawa, ka sa na vakavoui na yago mate oqo me kakua tale ni mate rawa.

⁵⁴Ia ni sa vakavoui oti na yago vuca oqo me kakua tale ni vuca rawa, ka sa na vakavoui oti na yago mate oqo me kakua tale ni mate rawa, ena qai vakayacori kina na vosa sa volai: "Na qaqa ni tucake tale sa vakaoti vakadua kina o mate"

⁵⁵"O iko mate, sa E vei na nomu batigaga? O iko bulubulu, sa e vei nomu qaqa?

⁵⁶Nona batigaga o mate nai valavala ca, kei na nona kaukauwa nai valavala ca na vunau.

⁵⁷Ia me vakavinavinakataki ga na Kalou, o koya sa solia vei keda na qaqa ena vuku ni noda turaga o Jisu Karisito.

⁵⁸O koya oqo, oi kemudou na wekaqu lomani, dou tudei tiko, kakua ni dou rawai rawarawa tu, me uasivi cake tikoga nomudou cakacaka vua na turaga, ka modou kila sara, sa sega ni ka wale na nomudou cakava na cakacaka ni turaga.