[46] 1 Koronica 16

¹Me baleta na kumuni ka ni loloma vei ira sa lotu, me vaka au sa vakaroti ira kina na veisoqosoqo lotu mai Kalatia, kei kemudou talega modou cakava.

²E nai matai ni siga ni veimacawa, modou kumuna ka binia vata nai yau modou na sautu kina, me kakua tale kina ni dua na kumukumuni ni'u sa yaco yani.

³Ni'u sa lako yani, au na talai iratou sara ki Jerusalemi me ratou kauta nomudou i loloma, oiratou ga na yaca dou sa vakaraitaka tiko yani e nai vola.

⁴Ia kevaka ena vinaka me'u lako talega, e ratou na lako vata kei au.

⁵Au na mai raici kemudou ni'u sa yaco ki Masitonia (au na lakovi Masitonia).

⁶E rairai tiko ni'u na laki tiko vakalailai vata kei kemudou, ke sa donumaka na gauna ni batabata au sa na tikoga vata kei kemudou, me rawa ni dou qai vakauti au ena vei vanua eso au na lakova.

⁷Au se sega ni vinakata me'u raici kemudou mada oqo; ia au sa nuitaka tiko ni na dua na gauna vinaka medatou na qai sota vinaka, kevaka sa lewa ni Kalou.

⁸Ia au na tiko mada i Efeso me yacova na Siga ni Penitiko.

⁹E levu na katuba vinaka ni cakacaka sa tadola vei au, sa levu vata talega kei na kena meca.

¹⁰Kevaka sa lako yani o Timoci, dou vakai taukeitaki koya me kua kina ni rere; ni sa cakava talega o koya na cakacaka ni turaga, me vakataki au.

¹¹O koya oqo me kua ni dua me beci koya, ia dou vakauti koya mai ena yalo marau vei au; ni'u sa waraki koya tiko kei ira vata na veiwekani.

¹²Ena vuku i Apolosa na wekada, au sa kerei koya vakabibi me lako yani vei kemudou vata kei ira na veiwekani, ia sa dredre sara ga vua me lako yani ena gauna oqo; ena qai lako yani ni sa donu vinaka na kena gauna.

¹³Dou vakatawa, dou tu dei ena vakabauta, dou yaloqaqa, dou tu vakatagane.

¹⁴Na ka kece dou cakava me caka ena loloma.

¹⁵Kemudou na veiwekani, dou kila vinaka na matavuvale nei Sitavana, ratou nai sevu sara ga ni lotu mai Akaia, nodratou bula taucoko ratou sa musuki ratou sara ga ena nodra qaravi ka vukei na tamata lotu-

¹⁶Dou talairawarawa kina bula sa vakaoqo, ka vaka kina vei ira e mai colata vata kei keda nai vua ni cakacaka oqo.

¹⁷Au sa marau ena nodratou lako mai o Sitavana, Fotunatu kei Akaiko, ni ratou na mai solia na ka e sega ni rawa mo dou solia.

¹⁸E ratou mai solia vei au e dua na yaloqaqa vei kemudou talega. O ira na tamata sa vakaoqo meda kakua ni dau lako siviti ira.

¹⁹Sa loloma yani vei kemudou na veisoqosoqo lotu mai Esia. O Akuila kei Pirisila vata kei ira na soqosoqo lotu e nodratou vale era sa loloma vakabibi sara tu ga yani ena turaga.

²⁰O ira taucoko na veiwekani era sa loloma yani. Dou veireguci vakai kemudou ena veireguci e savasava sara.

²¹Oi au o Paula, oqo na mawe dina ni noqu volavola ni vakamoce vei kemudou.

²²Kevaka e dua me sega ni lomana na turaga o Jisu Karisito ena cudruvi o koya. Ni lako mai Turaga!

²³Na yalololoma ni noda turaga o Jisu Karisito me tiko kei kemudou.

²⁴Au sa loloma yani vei kemudou kecega ena vuku i Karisito Jisu. Emeni.