[47] 2 Koronica 1

¹Oi au o Paula, nai apositolo i Jisu Karisito ena lewa ni Kalou, kei Timoci na wekaqu kivei ira nai soqosoqo lotu ni Kalou sa tiko mai Koronica, kei ira kece sa lotu ena yasana vaka Akaia:

²Me nomudou na loloma kei na vakacegu mai vua na Kalou o Tamada kei na Turaga o Jisu Karisito.

³Me vakavinavinakataki na Kalou o koya na Tama Ni Noda Turaga o Jisu Karisito, na Tama ni Loloma ka Kalou ni veivakacegui,

⁴O Koya sa vakacegui keitou ena neitou rarawa kecega, me keitou vakacegui ira sa rarawa ena dua na ka, ena veivakacegui keitou sa vakacegui kina mai vua na Kalou.

⁵Me vaka ni sa ka levu sara na veika rarawa keitou sotava ena vuku I Karisito, keitou sa sinai vuabale talega ena vakacegu mai vei Karisito.

⁶Kevaka keitou sa vakararawataki, oqori mo dou vakacegui ka vakabulai kina, ka sa yaco oqo ni dou sa vosota na veika rarawa sa yaco vei keitou, kevaka keitou sa vakacegui dou sa vakacegui vaka talega kina mo dou vakabulai.

⁷Na neitou nuitaki kemudou e dei tu ga, ni keitou kila dou sa vakaivotavota vata kei keitou ena veika rarawa, dou na vakaivotavota vata talega kei keitou ena veivakacegui.

⁸Keitou sega ni vinakata mo dou sega ni kila na veiwekani, na veika dredre keitou sotava mai Esia: keitou a vakamavoataki sara vaka ca, ka vakamalumalumutaki na neitou kaukauwa, keitou sa nanuma ni keitou na sega ni bula tale.

⁹Io, sa tau oti na keitou i totogi me keitou mate, ia keitou sega ga ni via nuitaki keitou vaka i keitou, keitou sa nuitaka ga na Kalou, o Koya sa vakaturi ira cake na mate.

¹⁰O Koya, sa vakabulai keitou mai nai sole ni mate, ia sa vakabulai keitou; ena tu ga vua na neitou vakanuinui ni o Koya ga ena vakabulai keitou tiko,

¹¹Oi kemudou talega, mo dou vukei keitou ena veimasulaki, me levu me ra vakavinavinaka ena vukui keitou, ni sa vakavotukanataki tiko na veika vivinaka sa yaco vei keitou, mai na nomuni veitokoni.

¹²Oqo na ka keitou sa boletaka tu ga: na veika keitou vakaraitaka yani ki vuravura o ya na neitou lewe e loma e vinaka ka savasava vaKalou, ka keitou sega ni tucake ena vuku vakatamata ia ena loloma duadua ga ni Kalou, ka vakauasivi ki vei kemudou.

¹³Keitou sega ni vola yani vei kemudou e dua na ka, dou sega ni wilika rawa se sega ni kila. Au sa nuitaka ni dou na taura dei tiko me yacova nai vakataotioti.

¹⁴(Me vaka ni dou se bera sara ni tauri au vakavinaka), ia au sa vakanuinui tikoga ni da na la'ki marau vata ena siga namaki o ya, na siga ni noda Turaga o Jisu.

¹⁵Au sa vakadeitaka yani oqo, ni'u sa lako yani medatou na la'ki sota. Me rawa ni so na ka vinaka mo dou na taura kina “

¹⁶Ena noqu i lakolako ki Masitonia au na yaco mada vei kemudou, ni'u suka lesu tale mai Masitonia au na yaco tale yani vei kemudou, mo dou na qai vukei au ena noqu i lakolako ki Jutia.

¹⁷Ia oqo, e a mamada wale beka na noqu tuva na ka me caka? Se na noqui tuvatuva vakayago beka? Se'u sa tautauvata beka kei ira eso ni ra tukuna na sega e dodonu me io? Ia, vei au na io ga na io, ka sega ga na sega.

¹⁸Ia me vaka na yalodina ni Kalou, na neitou vosa vei kemudou ena io na io, ka sega na sega.

¹⁹Ena neitou vunautaki Jisu Karisito na Luve Ni Kalou, o Timoci, o Silivenusi kei au, e sega kina na io kei na sega, ia vei Koya sa io tu ga.

²⁰Na ka kece e yalataka na Kalou ena vukuna sa io tu ga, o ya na vuna e cavuti kina vua na Emeni, me vakacaucautaki na Kalou ena vuku i keitou.

²¹Na Kalou sa vakatikori keda vata vei Karisito ka lumuti keda vata.

²²Ka dregati keda kei na Nona vakatikora e yaloda na Yalo Tabu ni sa yalataki tu.

²³Ia au sa kaciva na Kalou me noqu i vakadinadina vei au, kevaka au sega ni dina, na noqu lomani kemudou ena bera kina vakalailai noqu lako ki Koronica.

²⁴Neitou na lako yani e sega ni baleta nomudou i vakarau ni vakabauta, keitou na la'ki vukea cake ga na nomudou rekitaka na Turaga; e na vuku ni vakabauta dou sa tudei kina.