[11] 1 Tui 12

¹Sa lako ki Sikemi o Reopoame, ni ra sa lako kece mai na Isireli ki Sikemi me buli koya me tui.

²Ni sa rogoca o Jeropoame na luvei Nepati na veika oqo (ni a se tiko ga mai Ijipita, ena nona dro mai na mata i Solomoni na tui),

³Era sa talatala vua me lako mai. O Jeropoame kei ira na lewei Isireli taucoko era sa lako mai vei Reopoame ka tukuna,

⁴"O tamamu sa vakabibitaka na neimami i colacola “ mo vakamamadataka nai colacola sa veivakaocai kina o tamamu, keimami na qai qaravi iko."

⁵Sa tukuna vei ira o Reopoame, "mo ni lako mada ka lesu tale mai ni oti e tolu na siga," era sa lako yani na tamata.

⁶Na tui o Reopoame sa taroga na nodra i vakasala na qase era sa dau tu e matai tamana o Solomoni ni a se bula tiko, sa taroga, "nai vakasala cava dou na solia me'u tukuna yani vei ira na tamata?"

⁷Era sa vosa vua ka vaka, "kevaka mo sa dauveiqaravi vei ira na tamata oqo e na siga e dai ka cuva vei ira ka saumi taro vei ira, keimami na qai nomu tamata me sega ni mudu."

⁸Sa sega ni ciqoma nai vakasala era solia na qase, sa qai veivosaki kei ira na nona i caba era tubu vata, o ira sa tu e matana.

⁹Sa qai tukuna vei ira, "nai vakasala cava o ni na solia? "Na cava me'u na sauma vei ira na tamata era sa vosa oti vei au, ka vaka: "mo vakamamadataka nai colacola sa biuta vei keimami o tamamu'?"

¹⁰Era sa tukuna vua na nona i caba era a tubu vata ga mai, "mo vosa vei ira na tamata oqo, o ira sa tukuna tiko,' O tamamu sa vakabibitaka nai colacola “ o iko mo vakamamadataka vei keimami,' - mo qai tukuna vaka oqo vei ira; 'na noqu i qaqalo lailai sa vavaku cake mai na toloi tamaqu!

¹¹'Oqo, na veivanua e biuta kina o tamaqu nai colacola e bibi vei kemuni, au na vakaikuritaka nai colacola oqori. Sa kuitataki kemuni o tamaqu ena wa qaliqali “ ia, oi au, ena waya vakavotona!'"

¹²O Jeropoame kei ira kece na tamata, era sa lako mai vei Reopoame ena i katolu ni siga, me vaka sa vakarota na tui ka vaka, "mo ni lako tale mai ena i ka tolu ni siga."

¹³Sa vosa vakaukauwa vei ira na tamata na tui ka sega ni via rogoca na nodra i vakasala na qase;

¹⁴Sa vosa vei ira me vaka na nodra i vakasala na nona i caba ka vaka: "au na vakaruataka nai colacola sa solia vei kemuni o tamaqu, ka au na kuitataki kemuni e kuita waya vakavotona!"

¹⁵Sa sega ni rogoci ira na tamata na tui; ni sa mai vei Jiova na ka oqo, me rawa ni vakayacori kina na nona vosa, sa vosa oti kina o Jiova vei Eaija na kai Silone vei Jeropoame na luvei Nebati.

¹⁶Ni ra sa kila na Isireli taucoko ni sa sega ni via rogoci ira na tui, era sa vosa vua na tui ka vaka: "na cava sa neimami i votavota mai vei Tevita? Sa sega na ka me neimami mai vua na luvei Jese, mo ni lako ki na nomuni vale na Isireli! Mo lako talega ki na nomu vale Tevita. Era sa lesu yani na Isireli ki na nodra i tikotiko.

¹⁷Ia, o Reopoame sa lewa vei ira na Isireli era sa tiko e Juta.

¹⁸Na tui o Reopoame sa talai Adorami, o koya sa dau raica nai lavo, ia o ira kece na Isireli era sa vakaviriki koya ena vatu, ka sa mate sara. Sa mani vakasosolo vakatotolo na tui o Reopoame ka dro tani ki Jerusalemi.

¹⁹Era sa vuki tani kina na Isireli mai na vale i Tevita me yacova na siga oqo.

²⁰Ni ra sa rogoca na Isireli ni sa lesu mai o Jeropoame, era sa talatala vei koya ka sa lako mai ki nai soqosoqo levu, ka vakatikori koya me tui e Isireli. Sa sega ni dua e muria na vale nei Tevita, o Juta duadua ga.

²¹Ni sa lako mai ki Jerusalemi o Reopoame, sa vakasoqoni ira kece na vale i Juta kei na yavusa i Penijamini e dua na drau walusagavulu na udolu na tamata digitaki, o ira na dauvala me ra valuti na vuvale nei Isireli. Oqo me ra vakalesui kina na matanitu nei Reopoame ki na vuvale nei Solomoni.

²²Ia, sa lako mai na vosa i Jiova vei Semaia na tamata ni Kalou ka vaka,

²³"Mo vosa vei Reopoame na luvei Solomoni na tui Juta, vei ira kece talega na vale i Juta kei Penijamini, vei ira kece talega na vo ni tamata ka tukuna,

²⁴'Sa tukuna o Jiova: "mo kua ni lako cake mo vala kei ira na tacimu na luvei Isireli. Me ra dui lesu tale na tamata ki na nodra dui vale, (na lewa oqo sa mai vei Au)."'" Era sa talairawarawa ki na vosa i Jiova, ka vuki lesu me vaka na vosa i Jiova.

²⁵O Jeropoame sa tarai Sikemi ena veiulunivanua e Iferaimi ka tiko kina. Sa lako talega mai kea ka tarai Penueli.

²⁶Sa tukuna ki na yalona o Jeropoame, "ena rawa ni lesu tale na matanitu ki na vale nei Tevita:

²⁷"Kevaka era sa lesu na tamata me vakacaboi soro ena vale ni Kalou mai Jerusalemi “ ka me sa lesu tale na yalodra na tamata vei Jiova, o Reopoame na tui Juta, era na vakamatei au ka lesu vei Reopoame na tui Juta."

²⁸Sa tauri vakasala na tui, ka cakava e rua na luve ni bulumakau koula ka tukuna vei ira na tamata, "Sa rui dredre mo ni lako tale ki Jerusalemi. Oqo na nomuni kalou, i Isireli, o koya e a kauti kemuni cake mai na vanua o Ijipita!"

²⁹Sa vakaduria o koya e dua mai Peceli ka dua mai Tani.

³⁰Oqo sa yaco mei valavala ca “ ni ra sa lako na tamata me ra cuva kina, me yaco sara i Tani.

³¹Sa caka e dua na kena vale ena tikina cecere, ka sa digitaka na kena bete mai vei ira na duidui kecega, ka sega ni mai vei ira na livai.

³²Sa vakatabuya o Jeropoame e dua na Solevu ena i ka tinikalima ni siga e nai ka walu ni vula, me vaka na solevu sa caka e Juta, ka era sa vakacabora nai soro ena i cabocabo ni soro. Sa cakava oqo e Peceli ni sa vakacaboi soro tiko ki na bulumakau koula, e a cakava ga. E Peceli sa vakatikori ira kina na bete ena tikina cecere ea cakava talega.

³³Sa vakacabora nai soro ena i cabocabo ni soro sa tara ga o koya e Peceli e na i ka tinikalima ni siga e nai ka walu ni vula me vaka sa lewa ga e yalona. Sa vakatabuya e dua talega na solevu me baleti ira na gone ni Isireli. Sa vakacabora kina na kena i soro ka vakama talega na veika boi vinaka.