[11] 1 Tui 13

¹Ka raica, sa dua na tamata ni Kalou sa lako mai Juta ki Peceli, me vaka na vosa ni Kalou, o Jeropoame sa tucake tu e nai cabocabo ni ka boi vinaka.

²Sa kaci yani vaka ki nai cabocabo, me vaka me vosa i Jiova ka tukuna: "Nai cabocabo, nai cabocabo ni soro, sa tukuna o Jiova, 'Mo kila, sa na sucu e dua na gone, o Josaia na yacana ena vale i Tevita, vei iko, ena vakacabora o koya na bete ni tikina cecere o koya sa vakama na ka boi vinaka vei iko, na suina na tamata ena vakamai ena vukumu.'"

³Sa solia talega e dua nai vakatakilakila ena siga vata ga o ya ka tukuna: "Oqo nai vakatakilakila sa tukuna o Jiova, ena wasei rua vakaidina na i cabocabo ni soro ka vakakabuwacarataki na kena dravusa."

⁴Sa qai yaco ni sa rogoca o Jeropoame na tui, na veika oqo, na nona vosa na tamata ni Kalou o koya sa kaci yani ena i cabocabo ni soro mai Peceli, ni sa dodoka yani na ligana ki nai cabocabo ni soro ka tukuna, "Vesuki koya!" Na ligana sa dodo yani, sa sega ni rawa me kauta lesu tale vua baleta ni sa mate mai.

⁵Sa kabasu rua talega nai cabocabo ni soro ka sa tasova yani na kena dravusa, me vaka ga nai vakatakilakila sa vosa kina na tamata ni Kalou mai na vosa ni Kalou.

⁶Sa sauma yani na tui vua na tamata ni Kalou, "Au kerea me vakasukai na lewa ni nomuni Kalou o Jiova, ka masu ena vukuqu me vakasukai lesu tale na kaukauwa ni ligaqu." Sa masu vei Jiova na tamata ni Kalou, ka sa kaukauwa tale na liga ni tui me vakaga e liu.

⁷Sa qai tukuna na tui vua na tamata ni Kalou, "Mo lako vata mai kei au i vale, ka'u na solia vei iko e dua nai vakavinavinaka."

⁸Ia, sa tukuna mai na tamata ni Kalou vua na tui, "Kevaka mada ga mo solia vei au na veimama ni nomu vale “ au na sega ni lako vata kei iko, se me'u kana madrai se gunu wai ena vanua oqo.

⁹"Ni sa vakaroti mai vei au me vaka na vosa i Jiova ka vaka: 'Mo kua ni kana madrai se gunu wai, se mo lesu tale ena sala o lako mai kina.'"

¹⁰Sa lesu tale o koya ena dua tale na sala e a lako mai kina, ena nona lako mai ki Peceli.

¹¹E dua na parofita matua sa tiko mai Peceli, era sa lako mai na luvena ka tukuna vua na veika kece sa cakava na tamata ni Kalou ena siga o ya mai Peceli; era sa tukuna talega vua na vei vosa kece sa tukuna vua na tui.

¹²Sa tukuna vei ira o tamadra, "Sa lako ena yasana e vei o koya?" Ni ratou sa raica na luvena na yasana sa lako kina na tamata ni Kalou.

¹³Sa tukuna tale vei iratou na luvena, "Dou vakarautaka na asa vei au," e ratou sa vakarautaka na asa vei koya, ka sa vodo kina,

¹⁴Sa qai ciciva yani na tamata ni Kalou, ka raici koya ni vakacegu tiko ena dua na ruku ni vuni oki. Sa mani tarogi koya, "O iko beka na tamata ni Kalou e lako tiko mai Juta?" Sa sauma mai, "Sai au ga."

¹⁵Sa tukuna yani vua, "Lako vata mai kei au, mo mai kana madrai mada."

¹⁶Sa sauma yani na tamata ni Kalou, "Au na sega ni rawa ni lesu vata kei iko se lako vata kei iko, se me'u kana madrai ka gunu wai ena vanua oqo vata kei iko.

¹⁷"Ni sa tukuna oti vei au na vosa ni Kalou, 'O na sega ni kana madrai se gunu wai ena vanua oqo, se mo lesu tale ena sala o lako mai kina.'"

¹⁸Sa tukuna yani na matua oqo, "O au talega na parofita me vakataki iko. E dua na agilosi sa vosa vei au ena vosa i Jiova ka tukuna, 'Mo kauti koya lesu mai ki nomu vale, me mai kana madrai ka gunu wai'" ( ia, sa lasu o koya.)

¹⁹Sa lako mai na tamata ni Kalou kei na parofita lasulasu oqo ka mai kana madrai ka gunu wai e nona vale.

²⁰Sa yaco ni rau sa dabe tiko e na teveli, sa yaco mai na vosa ni Kalou vei koya, na parofita sa kauti koya lesu mai na tamata ni Kalou;

²¹Sa kaci tagitagi yani vua na tamata ni Kalou sa lako tiko mai Juta ka tukuna, "Sa tukuna vaka oqo o Jiova, 'Baleta ni o sa talaidredre ki na vosa ni Kalou ka sega ni maroroya na i vakaro sa tukuni vei iko mai vua na Kalou o Jiova,

²²"O sa lesu mai, ka kana madrai, ka gunu wai ena vanua ka vosa kina vei iko o Jiova, "Kua ni kana madrai se gunu wai," na yagomu mate ena sega ni lako ki na nodra i bulubulu na tamamu.'"

²³Sa yaco ni sa kana madrai oti ka gunu talega, sa vakarautaki talega vua na asa.

²⁴Ni sa lako yani, sa sotavi koya e dua na laione ena sala ka vakamatei koya. Sa viritaki tu na yagona ena sala, ka sa tucake tu e yasana na asa kei na laione talega.

²⁵Era sa lako yani na tamata ka raica na yago ni mate sa tu ena sala kei na laione sa tu voleka kina. Era sa lako yani ki na koro ka talanoataka ena vanua sa tiko kina na parofita qase.

²⁶Ni sa rogoca o koya na parofita e a kauti koya lesu mai na sala, sa tukuna "Oqo na tamata ni Kalou sa talai dredre mai na vosa ni Kalou, na Kalou sa soli koya ki na laione, sa basuraki koya ka vakamatei koya, me vaka na vosa i Jiova, e a vosa kina vua."

²⁷Sa tukuna vei luvena, "Vakarautaka na asa vei au." Sa vakarautaki na asa vua.

²⁸Sa lako yani ka raica na yagona na tamata ni Kalou ni sa tu ena sala, ka rau sa tu vata na asa kei na laione e yasana. Na laione sa sega ni kania na yagona se basuka na asa.

²⁹Na parofita sa keveta cake na yago ni tamata ni Kalou ka vakadavora ena asa ka kauta lesu. Sa lako yani na parofita oqo ka vakalolokutaki koya ena koro ka buluta na tamata ni Kalou.

³⁰Sa biuta na yagona ena nona i bulubulu, ka era sa vakalolokutaki koya ka tukuna tiko "Na taciqu! na taciqu!"

³¹Ni sa buluta oti, sa tukuna vei na luvena tagane, "Ni'u sa mate, ni buluti au e nai bulubulu sa bulu kina na tamata ni Kalou, na suiqu me tiko tarava na suina.

³²"Na veika kece sa kacivaka yani o koya me vaka na vosa i Jiova ena vuku ni cabocabo ni soro e Peceli, ena vuku ni veitikotiko tabu ena tikina cecere era sa tiko ena koro mai Samaria, ena yaco vakaidina."

³³Ni sa oti na veika oqo o Jeropoame sa sega ni lako tani mai na nona sala ca. Sa caka cala tale ena nona digitaka na bete mai na vei wasewase kecega baleta na tikina cecere; o koya ga sa vinakata, sa vakatabui sara, ka sa dua vei ira na bete ni tikina cecere.

³⁴Oqo sara ga nai valavala ca ni vale nei Jeropoame, ni sa dodonu me vakawabokotaki ka vakarusai mai na dela i vuravura.