[11] 1 Tui 15

¹Ena i ka tinikawalu ni yabaki nei Jeropoame na luvei Nabati, sa tui kina e Juta o Apijami.

²Sa lewa tiko e Jerusalemi me tolu na yabaki. Na yaca i tinana o Maeka na makubui Apisalome.

³Sa muria nai valavala ca kecega nei tamana, ni sa cakava tikoga e matana; sa sega ni dina na yalona vua na Kalou o Jiova, me vaka na yaloi Tevita na tamana.

⁴Ena vuku i Tevita ga sa solia kina vua na Kalou o Jiova e dua na cina e Jerusalemi, me vakatikora kina na luvena me muri koya kei na nona vakadeitaki Jerusalemi;

⁵Baleta, ni sa cakava o Tevita na veika e vinaka vua na Kalou ka sa sega ni vuki tani mai na veika sa vakarota vua na Kalou ena veisiga ni nona bula, vaka vo ga na veika me baleti Uraia na Itaiti.

⁶E rau sa vala tikoga o Reopoame kei Jeropoame ena nona bula kecega.

⁷Na kena vo ni veicakacaka i Apijami kei na veika kece sa cakava, era sa sega beka ni volai ena i tukutuku ni veigauna nodra na tui Juta? E rau sa dau vala talega o Apijami kei Jeropoame.

⁸Sa vakacegu o Apijami vata kei ira na tamana, ka era sa buluti koya ena Koro i Tevita. Sa veiliutaki o Esa na luvena ena vukuna.

⁹Ena i ka ruasagavulu ni yabaki ni veiliutaki i Jeropoame e Isireli, sa lewa o Esa e Juta.

¹⁰Sa lewa me vasagavulu ka dua na yabaki e Jerualemi. Na buna o Maeka na makubui Apisalome.

¹¹Sa cakava o Esa na veika sa vinaka vei Jiova me vakataki Tevita na tamana.

¹²Sa vakatabuya na tamata ca mai na vanua ka basuraka na matakau kecega era sa cakava na tamana.

¹³Sa vakagalalataki Maeka talega na buna, mai na nona i tutu vaka tinani tui, baleta ni sa bulia nai vakatakarakara vakasisila kei Asera. o Esa sa taya sobu nai vakatakarakara kei Asera ka vakama ena bati ni wai mai Kitironi.

¹⁴Era sa sega ga na vakagalalataki na veitikina cecere. Sa dina tikoga na yaloi Esa ena nona veisiga taucoko vua na Kalou.

¹⁵Sa kauta lesu talega mai ki na vale ni Kalou na veika kece sa vakacabori vata tukuna mai vei tamana kei na veika ga sa vakacabora o koya me vaka na siliva, na koula, kei na veiyaya tale eso.

¹⁶Sa dua na i valu e rau sa vala kina o Esa kei Baesa na tui Isireli ena nodrau gauna.

¹⁷Sa lako cake mai o Baesa na tui Isireli ki Juta, ka tarai Rama me kua ni dua kina e lako yani se lako mai vei Esa na tui Juta.

¹⁸O Esa sa taura kece na siliva kei na koula era sa tiko ena vale ni Kalou kei na vale ni Tui Esa ka solia yani ki na ligadra na nona tamata. Sa talai ira yani vei Peni-Atati na luvei Tabirimoni, na luvei Esioni na tui Siria sa tiko mai Tamasiko ka tukuna,

¹⁹"Me dua na nodaru veiyalayalati, o iko kei au me vakataki tamamu kei tamaqu. Au sa vakauta yani oqori nai solisoli na siliva kei na koula. Lako mai ka tamusuka na nomu veiyalayalati kei Baesa na tui Isireli, me vakasuka kina mai vei au."

²⁰Sa rogoci Tui Esa o Peni-Atati ka vakatala na nona i valu e na veikoro e Isireli. Sa valuti Ijoni, Tani, Beci, Maeka kei Kinaroci kece kei na vanua kece vaka Navitalai.

²¹Ni sa rogoca o Baesa na veika oqo, sa tuvakadua na nona tarai Rama cake ka sa la'ki tiko e Tirisa.

²²Sa vosa e Juta taucoko o Esa; sa sega ni dua sa vakavoci kina. Era sa kauta tani na kau kece mai Rama kei na vatu talega, sa tarai Rama kina o Baesa, na veiyaya oqo sa tarai Kipa mai Penijamini kina o Tui Esa kei Misipa talega.

²³Na vo ni veicakacaka kece sa cakava o Esa, na nona kaukauwa kece, kei na ka sa cakava, na veikoro sa tara, era sa sega beka ni volai ena i vola ni tukutuku ni veigauna nodra na tui Juta? Ia sa qase mai, sa tauvimate vaka ca sara na yavana.

²⁴Sa vakacegu vata kei ira na tamana o Esa, ka sa bulu vata kei ira na tamadra ena koroi Tevita na tamana, o Josavate na luvena, sa veiliutaki ena vukuna.

²⁵O Netava na luvei Jeropoame sa tui e Isireli ena i karua ni yabaki nei Esa na tui Juta. Sa lewa e Isireli me rua na yabaki.

²⁶Sa caka ca ena mata i Jiova, ka muria na sala nei tamana, kei na nona i valavala ca sa vakavalavalacataki Isireli kina.

²⁷O Baesa na luvei Eaija ena vale nei Isakari sa buki vere ena vukuna. Sa vakamatei koya o Baesa mai Kibeconi na vanua vaka Filisitia, ni ra se toka vuni o Netava kei ira kece na Isireli me baleti Kibeconi.

²⁸Sa vakamatei koya o Baesa ena i katolu ni yabaki nei Esa na tui Juta, ka sa veiliutaki kina.

²⁹Sa qai yaco, ni sa tui kina o koya, sa vakamatea na kawa kece i Jeropoame. Sa sega ni vakavoca e dua mai na vale nei Jeropoame me cegu tale na ucuna. Era sa vakarusai kece me vaka na vosa i Jiova ea vosa kina vua na Nona tamata o Eaija mai Siloni,

³⁰Baleta nai valavala ca nei Jeropoame sa vakavalavalacataki ira kina na Isireli. Ena nona veivakayalocataki oqo, sa vakayalocataki Jiova kina na Kalou ni Isireli me cudru.

³¹Na vo ni cakacaka nei Netava kei na ka kece e cakava, era sa sega beka ni volai e nai vola tukutuku me baleti ira na tui Isireli?

³²E rau sa dau vala o Esa kei Baesa na tui Isireli ena nodrau gauna.

³³Ena i katolu ni yabaki nei Esa na tui Juta, o Baesa na luvei Eaija sa tui kina e Isireli taucoko mai Tirisa, ka lewa me ruasagavulu ka va na yabaki.

³⁴Sa caka ca ena mata i Jiova ka lako ena sala nei Jeropoame kei na nona i valavala ca sa vakavalavalacataki Isireli kina.