[11] 1 Tui 18

¹Ni sa oti e dua na gauna sa yaco tale mai na vosa i Jiova vei Ilaijia, oqo, ena i katolu ni yabaki ka vaka: "Lako ka vakaraitaki iko vei Eapi, Au na qai tala yani ki vuravura na uca."

²Sa lako oilaijia ka vakaraitaki koya vei Eapi, ni sa dua na lauqa levu e Samaria.

³O Eapi sa kacivi Opetaia mai, o koya sa dau lewa tiko na nona vale. (O Opetaia sa dua e rerevaka vakalevu na Kalou.

⁴Ni o Jesepeli sa vakamatei ira vakaca sara na parofita ni Kalou, ia, o Opetaia sa kauta e dua na drau na parofita ka la'ki vunitaki ira, ya limasagavulu ena dua na qara vatu, me vakani ira tiko ka vakagunuvi ira tiko mai kea.)

⁵Sa tukuna o Eapi vei Opetaia, "Lako mada yani ki na vanua taucoko ka vakaraica de dua na mata ni wai e ra sa tubu vinaka kina na co, me ra mai kana kina na ose kei na meule me ra bula tiko ga kina, me ra kua ni mate kina na manumanu susu."

⁶Era sa wasewasea na vanua kece mera vakararai kina, sa lako ena dua na yasana o Eapi, ka lako talega ki na dua tale na yasana o Opetaia.

⁷Ni sa lako yani o Opetaia ena sala, e rau sa sota vakasauri kei Ilaijia, sa kilai Ilaijia sara ka cuva ki na ruku ni yavana ka tukuna, "Sai iko dina beka oqori na noqu turaga o Ilaijia?"

⁸Sa sauma yani o Ilaijia, "Sai au oqo, lako ka tukuna vua na nomu turaga, 'Ni sa tiko oqo o Ilaijia.'"

⁹Sa tukuna tale mai o Opetaia, "Me'u i valavala ca vakacava, ni o sa soli au tiko ki na ligai Eapi, me vakamatei au?

¹⁰"Me vaka sa bula na Kalou o Jiova, sa sega ni dua na vanua se matanitu me sega ni vakatala kina e dua me vakaraici iko; kevaka era na tukuna, 'Sa sega eke o koya', sa dau taura e dua nai vakadei mai na veimatanitu kei na veivanua ni ra sa sega ni kunei iko dina.

¹¹"Oqo o sa tukuna mai, 'Lako tukuna vua, na nomu turaga, 'Sa tiko oqo o Ilaijia"'!

¹²"Ena yaco ni'u sa lako tani mai vei iko, na Yalo ni Kalou ena kauti iko ki na dua na vanua au sega ni kila; ni'u sa lako me tukuna vei Eapi ka ena sega ni kunei iko o koya, ena qai vakamatei au. Oi au na nomuni tamata sa rerevaki Jiova mai na gauna ni noqu se cauravou kina.

¹³"'Sa sega beka ni tukuni vua na noqu turaga na veika au cakava ena gauna e vakamatei ira kina na parofita i Jiova o Jesepeli, na noqu vunitaki ira e duanadrau na parofita i Jiova, me ya limasagavulu dua na qara, kei na noqu vakani ira tiko ka vakagunuvi ira talega?

¹⁴"Oqo, o sa tukuna, 'Lako ka tukuna vua na nomu turaga, "Sa tu oqo o Ilaijia"' Ena qai vakamatei au o koya!"

¹⁵Sa tukuna mai o Ilaijia, "Me vaka sa bula na Kalou o Jiova, o Koya au sa tu e matana, au na vakaraitaki au vakaidina vei koya e ni kua."

¹⁶Sa lako o Opetaia me sota kei Eapi, ka tukuna vua: sa lako mai o Eapi me sota kei Ilaijia.

¹⁷Sa yaco ni sa raici Ilaijia o Eapi, sa tukuna vua, "Sai iko dina oqori na dauvakacaca ni Isireli?"

¹⁸Sa sauma mai o Ilaijia, "Au sa sega ni dauvakacaca e Isireli, o iko ga kei na vale nei tamamu sa dau vakacaca e Isireli, o ni sa biuta kina nai vakaro nei Jiova, ka o ni sa muri Peali.

¹⁹"Mo talaki ka soqoni ira kece na luvei Isireli vei au ena ulunivanua mai Kameli, me va na drau limasagavulu na parofita nei Peali kei na va na drau na parofita nei Asera, o ira sa kana tiko ena teveli nei Jesepeli."

²⁰Sa talatala o Eapi vei ira na luvei Isireli, ka vakasoqoni ira na parofita e na ulunivanua e Kameli.

²¹Sa lako mai vei ira na tamata kecega o Ilaijia ka tukuna: "Me cava soti na kena dede na nomuni veidre tiko ena ka e rua oqo? Kevaka sa Kalou o Jiova, ni muri Koya, kevaka sai Peali “ ni muri koya." Era sa sega ni tukuna e dua na ka na tamata.

²²Sa tukuna oilaijia vei ira na tamata, "Au sa parofita duadua ga i Jiova sa vo tiko “ na parofita nei Peali sa va na drau limasagavulu na tamata.

²³"Me ra solia mai e rua na bulumakau, ka me ra digitaka e dua na bulumakau me nodra, me ra cebecebeta ka biuta e dela ni buka, ia me kua mada ni waqa na buka. Au na vakarautaka talega e dua na bulumakau, ka me biu e dela ni buka e se boko tu.

²⁴"Mo ni qai kaciva na yaca ni nomuni Kalou, au na kaciva na yaca i Jiova, na Kalou ga ena sauma mai ena bukawaqa, sa Kalou o Koya." Era sa vosa na tamata kecega ka tukuna, "Sa vosa vinaka oqori."

²⁵Sa tukuna o Ilaijia vei ira na parofita i Peali “ "Mo ni digitaka e liu e dua na bulumakau ka vakarautaka, ni kemuni sa rui lewe levu, ka kaciva na yaca ni nomuni Kalou, ia, mo ni kua ga ni vakawaqa na buka."

²⁶Era sa taura na bulumakau sa soli oti vei ira, era sa vakarautaka ka kaciva na yaca i Peali, mai na mataka ki na sigalevu ka vaka: "I Peali, mo ni rogoci keimami." Sa sega na rorogo, sa sega ni dua e sauma mai. Era sa ladeladeva nai cabocabo ni soro era sa cakava.

²⁷Ni sa siga levu tutu, sa vakalialiai ira o Ilaijia ka tukuna, "Mo ni kaci vakadomoi levu ni sa kalou o koya; ena rawa ga ni se vakanananu tiko, se, e osooso tiko beka, se, e se gade tu beka i na dua na vanua, se, e se moce tiko ni dodonu me sa vakayadrati oqo."

²⁸E ra sa qai kacikaci ga vakalevu ka tavatavai ira me vaka na kena i valavala ena i sele me yacova ni ra sa dradra tu.

²⁹Ni sa sivi na sigalevu tutu, era sa parofisai tiko me yacova na gauna ni vakacaboi soro ni yakavi. Sa sega ga ni dua na rorogo, sa sega na kena i sau, sa sega talega ni dua e bau veikauwaitaki.

³⁰Sa tukuna yani o Ilaijia vei ira kece na tamata "Mo ni toso voleka mai vei au," Era sa toso voleka mai na tamata vua, sa vakavinakataka nai cabocabo ni soro nei Jiova e a sa kabasu tu.

³¹Sa taura o Ilaijia e tinikarua na vatu me vaka kedra i wiliwili na yavusa ni luvei Jekope, mai vei koya sa lako mai kina na vosa i Jiova ka vaka “ "Sa na yacamu o Isireli."

³²Sa tara na i cabocabo ni soro ena vatu ki na yaca i Jiova, ka sa kelia wavoki na i vakata ena i cabocabo ni soro me rauta e rua nai vakarau sila.

³³Sa tuvana vakavinaka na buka, ka cebecebeta na lewe ni bulumakau ka biuta ena dela ni buka ka tukuna, "Mo ni vakatawana e va na vokete ena wai ka sova ena i soro kama kei na buka talega."

³⁴Sa tukuna tale, "Dou cakava tale vakarua" era sa vakasuasuataka tale vakarua e se baci tukuna tale, "Me vaka tolu," era sa cakava vakatolu.

³⁵Sa sinai nai cabocabo ni soro kei nai vakata talega ena wai.

³⁶Ni sa yaco mai na gauna ni vakacaboi soro ena yakavi, sa toso voleka mai o Ilaijia na parofita ka tukuna, "I Jiova na Kalou i Eparama, Aisake, kei Isireli me kilai e daidai ni Kemuni sa Kalou e Isireli, ni sai au talega na Nomuni tamata, ka, au sa cakava talega na veika oqo ena Nomuni vosa ga.

³⁷"Mo ni rogoci au, i Jiova, mo ni rogoca, me ra kila kina na vei tamata oqo ni sai Kemuni o Jiova na Kalou, ni Kemuni sa veisautaka tale na yalodra vei Kemuni."

³⁸Sa lutu mai na bukawaqa mai vei Jiova ka kania nai soro, na buka, na vatu, na dravusa, ka sa gunuva na wai kecega sa tu e nai vakata.

³⁹Ni ra sa raica na tamata kece na veika oqo, era sa cuva vakatoboicu ki na qele ka tukuna, "Sa Kalou ga o Jiova, sa Kalou ga o Jiova!"

⁴⁰Sa qai tukuna vei ira o Ilaijia, "Me ra vesu mai na parofita i Peali! Me kua ni dua vei ira me dro!" Era sa vesuki ira; ka sa kauti ira mai ki na mata ni wai mai Kisoni ka vakamatei ira mai kea.

⁴¹Sa tukuna o Ilaijia vei Eapi, "Mo lako cake ka kana ka gunu, ni sa lako tiko mai oqo na rorogo ni uca levu."

⁴²Sa lako cake o Eapi me kana ka gunu. Sa lako cake o Ilaijia ki na delai Kameli, sa cuva sobu ki na qele ka biuta na uluna ena maliwa ni duruna,

⁴³ka tukuna vei ira na nona tamata, "Mo ni lako ka rai ki wasawasa," sa lako cake e dua ka rai ki wasawasa ka tukuna, "Sa sega ni dua na ka." Sa vakavitu na nona tukuna, "Mo lako tale."

⁴⁴Sa qai yaco ena i ka vitu ni gauna, sa qai tukuna mai, "Sa dua na o lailai me vaka na liga ni tamata, sa tubu cake tiko mai vakayawa sara," sa tukuna kina, "Mo lako cake vei Eapi ka tukuna, 'Vakarautaka na nomu qiqi, ka lako sobu ni bera ni tarovi iko na uca.'"

⁴⁵Sa qai yaco, ni sa buto mai na lomalagi ena o, ka sa dua mai na uca levu. Sa tucake o Eapi ka sa lako yani ki Jeserieli.

⁴⁶Sa lako mai vei Ilaijia na liga i Jiova, ka sa vauca na tolona o Ilaijia ka cici siviti Eapi ki na matamata mai Jeserieli.