[11] 1 Tui 17

¹O Ilaijia na kai Tisiba o ira sa tiko mai Kiliati sa tukuna vei Eapi, "Me vaka sa bula o Jiova na Kalou kei Isireli, ena matana au sa tu kina, ena sega na tegu se uca ena veiyabaki oqo, vakavo ke'u sa vosa kina."

²Sa yaco tale mai vua na vosa i Jiova ka vaka,

³"Mo lako tani e ke ka lako vaka kina tokalau ka la'ki vuni tiko ena Mata ni wai mai Kirici ka sa dau drodro yani ki na Joritani.

⁴"O na gunu tiko ga mai na mata ni wai oqori, ka Au na vakatala yani na reveni me vakani iko mai kea."

⁵Sa lako o koya me vaka na vosa i Jiova “ ni sa lako ka la'ki tiko ena Mata ni Wai mai Kirici sa dau drodro yani ki na Joritani.

⁶Sa dau kauta mai na reveni oqo na kena madrai kei na kena lewe ni manumanu ena mataka, kei na yakavi talega; sa dau gunu talega mai na wai o Kirici.

⁷Sa yaco me sa maca mai na Mata ni Wai mai Kirici “ baleta ni sa sega ni tau na uca ena vanua.

⁸Sa yaco tale mai na vosa i Jiova vei Ilaijia ka vaka,

⁹"Tucake ka lako ki Sarifaci mai Saitoni ka tiko kina. Au sa vakarota oti e dua na yada me qaravi iko mai kea."

¹⁰Sa tucake o Ilaija ka lako ki Sarifaci. Ni sa yaco yani ki na matamata ni koro, sa tiko mai kea e dua na marama sa caka buka tiko. Sa kaciva sara yani me vaka, "Kauta mai e dua na wai me'u gunu mada."

¹¹Ni sa lako tiko yani na vada, sa kaci tale yani o Ilaijia, "Kauta talega mai e dua na madrai."

¹²Sa sauma mai na yada, "Me vaka sa bula o Jiova, sa sega vei au na madrai, sa tiko vakalailai ga na falawa, ka vakalailai na waiwai ena tavaya, raica, au sa kauta vakalailai tiko ga oqo na buka ka la'ki vakarautaka me keirau kana kina, o au kei na luvequ tagane, ka mate yani."

¹³Sa tukuna sara vua o Ilaijia, "Kua ni o rere, lako ka cakava me vaka o sa vosa kina, mo cakava mada ga vei au e liu e dua na keke ka kauta mai vei au, ni oti o ya mo qai cakava na kemudrau.

¹⁴"Ni sa tukuna na Kalou o Jiova ni Isireli: 'Ni na sega ni oti na falawa mai na kena taga kei na waiwai mai na kena tavaya me yacova ni sa vakatauca na Kalou na uca e vuravura.'"

¹⁵Sa lako yani na yalewa ka cakava me vaka na vosa nei Ilaijia ka e ratou sa kana tiko ga me vaka sa kena lewa.

¹⁶Sa sega ni oti rawa na falawa kei na waiwai me vaka na vosa i Jiova, sa vosa kina o Ilaijia.

¹⁷Ni sa oti na veika oqo, na luvena tagane na yada, sa tauvimate mai “ sa bibi sara na tauvimate oqori, ka sa yaco me sa oti sara na nona i cegu.

¹⁸Sa tukuna vei Ilaijia o tinana, "Na cava tale me'u cakava vei iko na tamata ni Kalou? O sa lako tiko beka mai, me'u mai vakananumi e na i valavala ca ka me mate kina o na luvequ tagane?"

¹⁹Sa tukuna vua o Ilaijia, "Kauta mai eke na luvemu." Sa keveta na gone ka kauti koya ki na tikini vale e cake sa tiko kina o koya, ka vakadavora na gone ena nona i davodavo.

²⁰Sa kaci yani vei Jiova ka vaka, "I Jiova na Kalou. O ni sa kauta beka mai na leqa vua na yada oqo “ o koya sa mai maroroi au tiko ena Nomuni vakamatea na luvena?"

²¹Sa vakaruruga yani na gone ena yagona vakatolu, ka tagici Jiova tikoga ka vaka: "Kemuni Jiova, au kerei Kemuni me lesu tale vua na gone oqo, na yalona."

²²Sa rogoci Ilaijia o Jiova “ ka sa lesu tale vua na gone na yalona, ka sa bula tale.

²³Sa keveta na gone o Ilaijia ka kauta sobu mai, sa solia vei tinana, ka tukuna, "Sa bula na luvemu!"

²⁴Sa tukuna na yalewa vei Ilaijia, "Ena ka oqo au sa kila kina ni o sa tamata ni Kalou kei na vosa ni Kalou sa tiko e gusumu, sa ka dina sara."