[9] 1 Samuela 2

¹Sa masu o Ana ka tukuna: "Na yaloqu sa reki tiko vei Jiova, na noqu kaukauwa sa laveti cake vei Jiova, au sa dredrevaki ira na kequ meca, ni'u sa rekitaka tiko na Nomuni veivakabulai.

²"Sa sega tale e vakatatabutaki me vakataki Jiova, ni sa sega tale, oi kemuni duadua ga. Sa sega tale na vatudei me vaka na noda Kalou.

³"Me kua tale na vosa vakadokadoka; me kua na viavialevu me lako mai na gusumuni, ni o Jiova, sa Kalou ni kila na ka; sa vakarautaka o Koya nai valavala kecega.

⁴"Na veqa ni dakai nodra na tamata qaqa sa musuki tani, o ira sa tacaqe era sa vauci ena kaukauwa.

⁵O ira sa mamau, era volitaki ira ena vuku ni madrai kei ira sa viakana era sa mudu tale ni viakana. O koya mada ga sa yava sa vakasucuma e vitu na gone, kei koya sa levu na luvena sa yaco me malumalumu ka ninini mai.

⁶"Sa veivakamatei ka veivakabulai o Jiova; Sa kauta sobu ki nai bulubulu ka sa veivakaturi cake mai nai bulubulu.

⁷Sa veivakadravudravuataki, sa veivakavutuniyautaki talega, sa veivakalolovirataki, sa veilaveti cake talega.

⁸Sa vakaturi ira cake na dravudravua mai na soso, ka laveti ira cake na daukerekere mai nai binibini dravusa. Me ra tu vata kei ira na ravouvou, me ra taukena vata nai ukuuku vakaTuraga. "Na veiduru e vuravura sa nei Jiova, ka vakatuvana kina na vuravura.

⁹Ena yadrava ka maroroya na yavadra na Nona tamata. O ira ga na tamata ca era na vagalui ena butobuto. "Ena vuku ni kaukauwa ena sega ni dua e qaqa.

¹⁰O ira na meca i Jiova era na vakavurumemeataki, na lomalagi ena kurukuru mai vei ira. "Ena solia na kaukauwa vei ira na Nona veitui, ka vakacerecerea na Nona tu na Nona lumuti."

¹¹Sa qai lako o Ilikena ki na nona vale ki Rama, ia na gone sa veiqaravi tikoga vei Jiova ena matai Ilai na bete.

¹²E rau sa gone ca sara na luvei Ilai, ni rau sa sega ni kilai Jiova.

¹³Sa dau i tovo vakabete vei ira na tamata, o ya ni sa dua e mai vakacabora e dua nai soro, na nona dauveiqaravi na bete sa dau kauta mai nai cula matai tolu e ligana ni sa saga tiko na lewe ni manumanu.

¹⁴Ena cula yani na lewe ni manumanu ke sa tiko ena tavuteke, se e na kuro ni wai, se ena beseni, se ena kuro levu; ena taura me kena na bete ns veika kece sa cabo mai ena i cula. Era sa dau cakava oqo mai Sailo vei ira kece na Isireli sa dau lako mai kina.

¹⁵Ni se bera talega ni dau tavu na uro, sa dau lako mai na nona dauveiqaravi na bete ka tukuna vua sa vakacabora, na lewena mei soro, "Mo solia mai e so na lewena me la'ki tavu me kena na bete “ ni na sega ni taura o koya na kena sa buta oti, ena taura na kena e se droka."

¹⁶Kevaka sa tukana mai na tamata, "Me tavu mada e liu na uro; oti oqo, mo qai taura ga na kena levu o vinakata." Sa qai dau saumi mai vakaoqo, "E sega, mo solia ga mai oqori, ke sega, au na taura vakaukauwa."

¹⁷O koya oqo, na nodrau i valavala ca na gone, sa rui levu sara ena mate i Jiova “ Ni sa vakaveitaliataka na tamata nai soro vei Jiova.

¹⁸Sa veiqaravi tiko o Samuela ena mata i Jiova ni se gone lailai ga, ka sa dau dara tiko na Efoti lineni.

¹⁹Sa vakarautaka talega vua o tinana nai oro, sa dau kau mai vua ena veiyabaki, ni rau sa daulako mai kei watina me vakacabora nai soro vakayabaki.

²⁰O Ilai sa dau vakalouvinakataki Ilikena kei watina ka tukuna, "O Jiova me solia vei iko na veikawa mai vua na yalewa oqo ena vuku ni votavota sa dau soli vei Jiova." Ni sa oti oqo e rau sa dau qai gole lesu ki vale.

²¹Sa qai sikovi Ana o Jiova me kunekune kina ka vakasucuma e tolu na luvena tagane kei na rua na luvena yalewa. A sa tubu cake na gone o Samuela ena mata i Jiova.

²²Sa qase sara o Ilai, ka sa dau rogoca na veika e rau sa dau cakava na luvena vei ira na Isireli kei na nodrau dau moceri ira na yalewa era sa dau mai tiko ena mata ni katuba ni vale ni veitavaki.

²³Sa tukuna vei rau na luvena, "Ena cava drau sa dau cakava kina na veika ca oqo? Au sa rogoca na nomudrau cakacaka ca mai vei ira kece na tamata oqo.

²⁴"E sega, kemudrau na luvequ, sa sega ni tukutuku vinaka au sa rogoca. Drau sa vakavuna na nodra lako sese na tamata i Jiova.

²⁵"Kevaka sai valavala ca e dua vua tale e dua “ me qai lewai koya na Kalou. Ia, kevaka sai valavala ca, e dua vua na Kalou, O cei me na qai sorovaki Koya?" E dina ni ra sega ni rogoca na nodra vosa na qase ni sa nakita o Jiova me vakamatei ira.

²⁶Sa tubu me levu na gone o Samuela ka sa taleitaki koya vakalevu o Jiova kei ira talega na tamata.

²⁷Sa lako mai e dua na tamata ni Kalou ki vei Ilai ka tukuna vua, "Sa tukuna na Kalou o Jiova, 'Au sa sega beka ni vakaraitaki Au vakavinaka kina vuvale nei tamamu ni ra a tiko mai Ijipita ena vale nei Fero?

²⁸'Au sa sega beka ni digitaki koya mai vei ira na Isireli me Noqu bete, me vakacabora nai soro ena i cabocabo ni soro, me vakama na ka boi vinaka, me dara tiko na Efoti e Mataqu? Au sa sega beka ni solia ki na vuvale nei tamamu nai soro kece nodra na Isireli sa vakamai ena bukawaqa?

²⁹'Na cava dou sa dau vakacaqeta kina na i soro kei na Noqu madrali, o koya Au sa vakarota ena Noqu i tikotiko, ka o sa dokai rau vakalevu cake na luvemu mai vei Au, mo tara kina na veika vivinaka mai nai soro me nomu nai madrali kece era sa kauta mai na Isireli na Noqu tamata.'

³⁰"Oqo, sa tukuna kina o Jiova na nodra Kalou na Isireli, 'Au sa tukuna vakaidina, ni nomu vuvale kei na vuvale nei tamamu me dau lako voli e mataqu me sega ni mudu.' Ia, oqo sa tukuna kina o Jiova: 'Me yawa sara vei Au, o ira sa dokai Au, Au na dokai ira “ o ira sa vakawaletaki Au, era na vakawaletaki talega.

³¹'Mo kila, sa lako tiko mai na siga Au na musuka kina na ligamu kei na liga ni vale nei tamamu, me kua kina ni dua na tagane e matua ena nomu vale.

³²'O na raica na meca ena Noqu i tikotiko, veitalia na veika vivinaka sa cakava o Jiova vei ira na Isireli. Ena sega na tagane matua ena nomu vale me sega ni mudu.

³³'Kevaka e dua na nomu tamata Au sa sega ni musuka tani mai na Noqu cabocabo ni soro “ ena vakaleqa na matamu ka vakararawataka na yalomu. O ira kece na nomu kawa era na mate ga ni se qai seraka mai na nodra bula.

³⁴'Oqo mei vakatakilakila vei iko, oi rau na luvemu tagane, o Ovini kei Vanaisi “ ni na dua ga na siga e rau na mate ruarua kina.

³⁵'Au na vakatubura cake ga vei Au e dua na bete yalodina me muria na veika sa tiko e yaloqu, kei na veika sa tiko e Noqu mona. Au na tara cake e dua na vale vua, ka me lako voli e mata i Noqu lumuti me sega ni mudu.

³⁶'Ena yaco mai na gauna, ni o ira kece sa vo e vale, era na lako mai ka cuva vei Koya me dua kina na tiki ni siliva kei na tiki ni madrai, ka tukuna, "Au kerea me'u biu yani kina dua nai tutu vaka bete “ me'u kania kina e dua na tiki ni madrai."'"