[9] 1 Samuela 1

¹Sa dua na tamata mai na vanua o Ramacaimi “ Sofimi ena veiulunivanua e Ifereimi, na tamata oqo o Ilikena na luvei Jeroimi, na luvei Ilaiu, na luvei Tou, na luvei Supi, na kai Ifereimi.

²Sa rua na watina, o Venina kei Ana. O Venina sa vakaluveni, sa sega ga o Ana.

³Na tamata oqo sa lako cake mai na nona koro ena veiyabaki me lotu ka vaka caboi soro vei Jiova ni lewevuqa e Sailo. Oi rau talega na luvei Ilai, o Ovini kei Vanaisi na bete ni Kalou o Jiova, e rau sa tiko mai kea.

⁴Ni sa dauyaco mai na gauna me dau laki vakacaboi soro kina o Ilikena, sa dau solia na i votavota vei Venina kei iratou na luvena tagane kei na luvena yalewa talega.

⁵Vei Ana ga, sa dau vakaruataka nai votavotani sa lomani Ana vakalevu cake, e dina ga ni sogota tiko na Kalou na nona kato ni gone.

⁶Sa dau vakararawataki Ana vakalevu o Venina, sa qai dau ca ga vakalevu ni sogota tiko o Jiova na nona kato ni gone.

⁷Sa dau veiyabaki ni sa lako tiko o koya ki na vale ni Kalou ka sa dau vakararawataki vakalevu, sa qai dautagi tikotikoga ka sega ni kana.

⁸Sa tukuna o Ilikena vei Ana na watina, "Na cava o sa tagi tiko kina? Na cava o sa sega ni kana tiko kina? Na cava o sa rui rarawa tiko kina? Au sa sega beka ni vinaka cake mai vei iratou na lewe tini na luvemu tagane?"

⁹Sa tucake o Ana ni ratou sa kana ka gunu oti mai Sailo. O Ilai na bete, sa dabe tiko ena i dabedabe voleka ki katuba ni valeniveitavaki i Jiova.

¹⁰Sa bibi vakalevu na yaloi Ana ka sa masu vakalevu vei Jiova ka tagi vakararawa sara.

¹¹Sa cakava e dua na yalayala ka tukuna, "I Jiova na Kalou ni lewevuqa, kevaka o ni sa raica dina na rarawa ni Nomuni vada ka nanumi au, ka sega ni guilecavi au, ia, ka solia vua na Nomuni vada e dua na gone tagane, au na soli koya lesu vei Jiova ena veisiga kece ni nona bula ka ena sega ni tara na yame ni toro na nona qavokavoka."

¹²Sa qai yaco, ni sa masu tiko ena mata i Jiova “ o Ilai na bete sa vakaraica tiko na gusuna.

¹³Sa vosa tikoga e yalona o Ana, ka sa yavala tikoga na gusuna, na domona sa sega ni rorogo. Oqo sa nanuma kina o Ilai ni sa mateni tiko.

¹⁴Sa tarogi koya o Ilai, "Me cava soti na dede ni nomu mateni tiko? Kauta tani na waini mai vei iko!"

¹⁵Sa sauma vua o Ana ka vaka: "Sa sega na noqu turaga, oi au na yalewa sa dau rarawa vakalevu na yaloqu, au sa sega ni mateni ena waini se yaqona, ia au sa sova tiko na yaloqu vei Jiova.

¹⁶"Kakua ni raica na vada oqo me vaka e dua na yalewa ca, mai na levu ni noqu vakatakekere kei na vutugu, au sa qai vosa sara ga oqo."

¹⁷Sa vosa mai o Ilai ka vaka: "Mo lako ena vakacegu, na nodra Kalou na Isireli ena solia na veika sa gadreva na yalomu, me vaka o sa kerea Vua."

¹⁸Sa sauma mai o Ana, "Me kune loloma na vada oqo ena Matamuni." Sa qai lako yani o koya ka kana ka sa sega tale ni kune na rarawa e matana.

¹⁹E ratou sa yadra vakamataka lailai ka lotu ena mata i Jiova ka lesu tale ki nodratou e Rama. Sa moceri Ana o Ilikena “ sa qai nanumi koya o Jiova.

²⁰Ni sa qai oti e dua na gauna lekaleka, sa qai kunekune o Ana ka vakasucuma e dua na luvena tagane ka vakayacani koya o Samuela “ "Baleta ni'u sa kerei koya mai vei Jiova."

²¹O Ilikena kei na nona vuvale kece, e ratou sa lako cake me vakacabora vei Jiova nai soro vakayabaki kei na nona yalayala.

²²Sa sega ni lako cake o Ana, ni sa tukuna vei watina, "Au na sega ni lako cake me yacova ni sa kali oti na gone; au na qai kauti koya me basika ena mata i Jiova ka me tiko kina ka sega ni mudu."

²³Sa tukuna vua o Ilikena, "Cakava na ka e Vinaka vei iko “ waraka me kali mada. Laiva vua na Kalou me vakayacora na Nona vosa." Sa wawa tiko na yalewa ka susuga tiko na gone me yacova ni sa kali oti.

²⁴Ni sa kali oti na gone, sa kauti koya cake kei na tolu na bulumakau, dua nai vakarau falawa, dua na i vakarau waini, ka kauti koya mai ki na vale ni Kalou e Sailo. Sa tubu cake na gone.

²⁵Era sa vakamatea e dua na bulumakau ka kauta mai na gone vei Ilai.

²⁶Ka sa tukuna, "Noqu Turaga! Me vaka sa bula na yalomu, oi au na yalewa e a tucake tu eke vei kemuni, ka masu tiko vei Jiova.

²⁷"Na gone oqo au a masulaka, ka sa solia vei au o Jiova me vaka au a kerea Vua.

²⁸"O koya oqo, au sa soli koya kina vei Jiova; ena nona bula taucoko sa na soli tiko vei Jiova o koya." E ratou sa qaravi Jiova mai kea.