[9] 1 Samuela 4

¹Sa yaco mai na vosa i Samuela vei ira na Isireli.Era sa lako yani na Isireli me vala kei ira na Filisitia ka mai vaka i tikotiko volekati Apenisa; o ira na Filisitia era sa mai tiko e Epeki.

²Era sa vakarautaki ira na Filisitia me vala kei ira na Isireli; ni sa ia na veivaluvaluti era sa vakadrukai na Isireli mai vei ira na Filisitia ka era sa vakamatei kina e va na udolu na sotia.

³Ni ra sa lesu mai na nodra i tikotiko, era sa tukuna na nodra qase na Isireli, "Ena cava sa vakadrukai keimami kina na Kalou ena matadra na Filisitia? Me da kauta mai na Kato ni Kalou mai Sailo kivei keda eke, ni sa tiko vata kei keda “ ena rawa ni vakabulai keda mai na ligadra na meca."

⁴Era sa lako ki Sailo, me ra la'ki kauta mai na kato ni veiyalayalati i Jiova ni lewevuqa o Koya sa tiko ena kedra maliwa na Jerupi. Oi rau na luvei Ilai o Ovini kei Vanaisi e rau sa tiko mai kea vata kei na kato ni Veiyalayalati ni Kalou.

⁵Ni sa kau mai ki na nodra i tikotiko na kato ni Veiyalayalati i Jiova, era sa kaila vakadomoi levu na Isireli ka sa yavavala na vanua.

⁶Ni ra sa rogoca na domo ni kaila oqo o ira na Filisitia, era sa tukuna, "Na rorogo levu cava oqo sa lako tiko mai ena nodra i tikotiko na Iperiu?" Era sa qai kila, ni sa tiko vata kei ira na kato ni Kalou.

⁷Era sa rere na kai Filisitia ka tukuna "Sa lako mai na Kalou ena nodra i tikotiko!" E ra sa tukuna tale, "Eda na leqa! Ni sa sega ni yaco na veika vaka oqo e liu.

⁸"Eda na leqa! O cei ena vakabulai keda mai na liga kaukauwa ni Kalou oqo? Oqo na Kalou e a vakaleqai ira na kai Ijipita ena mate ca kecega mai na vanua liwa.

⁹"Mo ni kaukauwa ka tu vakatagane, oi kemuni na kai Filisitia, mo ni kua ni nodra tamata cakacaka kina na Iperiu oqo, me vakataki ira veikemuni. Mo ni tu mai vakatagane ka vala!"

¹⁰Era sa mai vala na Filisitia ka sa vakadrukai o ira na Isireli ka dro ki na nodra i tikotiko. Sa dua na veivakamatei levu ni ra sa bale e tolusagavulu na udolu na sotia vei ira na Isireli.

¹¹Sa vesuki talega na Kato ni Kalou kei rau na luvei Ilai o Ovini kei Vanaisi e rau sa mate talega.

¹²E dua na tagane ni Penijamini sa cici mai nai valu ena siga o ya ka lako mai ki Sailo, sa kakabasubasu na nona i sulu ka soso vakalevu na uluna.

¹³Ni sa yaco yani, sa dabe tiko o Ilai ena nona i dabedabe ka vakararai tiko, ni sa yavavala vakalevu tiko na yalona ena vuku ni kato ni Kalou.

¹⁴Ni sa rogoca o Ilai na tagi levu oqo, sa taroga sara, "Na cava sa rorogo levu mai oqo?" Sa lako vakatotolo mai na tagane ka tukuna vei Ilai.

¹⁵Sa yabaki ciwasagavulu ka walu o Ilai ka sa buwawa talega na matana.

¹⁶Sa tukuna vei Ilai na tagane ka vaka: "Au sa lako mai ena i valu, ka dro mai ena i matai ni yatu i valu ena mataka oqo." Sa taro o Ilai, "Sa vakacava oi rau na luvequ?"

¹⁷Sa saumi vua ka vaka: "Era sa dro na Isireli mai vei ira na Filisitia ka sa dua na mate levu vei ia na tamata. E rau sa mate talega o Ovini kei Vanaisi kei na Kato ni Kalou sa kau talega vakavesu."

¹⁸Ni sa tukuni vei Ilai me baleta na Kato ni Kalou, sa lutu vakanadaku mai na nona i dabedabe o Ilai mai na matamata, ka sa ramusu sara na domona ka mate, ni sa qase ka rui bibi sara o koya. Sa lewai Isireli o koya me vasagavulu na yabaki.

¹⁹Na wati Vanaisi, na vugoi Ilai, sa bukete tiko ka sa vakarau vakasucu tiko; ni sa rogoca o koya nai tukutuku ni sa tauri vakavesu na Kato ni Kalou, ka rau sa mate talega o Ilai na nona momo kei Vanaisi na watina, sa cuva ka vakasucu, baleta ni sa tarai koya mai na mosi ni taratara.

²⁰Sa mate na yalewa ena nona vakasucu, ia, ni sa vakarau mate sa tukuna mai vua na nona dauveiqaravi, "Kua ni rere o sa vakasucuma e dua na gone tagane." Sa sega ni sauma lesu mai o koya.

²¹Sa vakayacana na gone o koya na dauveiqaravi me Ikapote kenai balebale. " Sa lako tani e Isireli nai ukuuku ni Kalou!" baleta na Kato ni Kalou sa tauri vakavesu kei na nodrau mate o Ilai kei Vanaisi.

²²Sa tukuna na dauveiqaravi, "Nai ukuuku ni Kalou sa lako tani e Isireli, ni sa tauri vakavesu na kato ni Kalou.