[9] 1 Samuela 5

¹Era sa kauta na Kato ni Kalou mai Apenisa ki Asitoti o ira na Filisitia.

²Era sa kauta mai na Kato ni Kalou, ki na vale nei Takoni a sa mai tu vata kei Takoni.

³Ni ra sa yadra mai ena mataka na kai Asitoti, era sa raica ni sa cuva vakatobuicu tu o Takoni ena mata ni Kato ni Kalou. Era sa vakaduri Takoni cake tale ena kena i tutu makawa na tamata.

⁴Ni ra sa yadra tale mai ena mataka ka tarava, sa cuva vakatobuicu tale tu o Takoni ena mata ni Kato ni Kalou. Oqo ga sa kamusu sara na uluna mai na yagona kei na ligana ruarua. Sa tu duadua ga na yagona.

⁵O koya oqo, o ira na bete levu vei Takoni kei ira na daulako mai ki na vale nei Takoni, era sa sega ni butuka tale na vanua o ya me yacova na siga oqo.

⁶Sa tarai ira tiko vakabibi na kai Asitoti na liga i Jiova. Sa ravuti ira ka vakatauva vei ira na soso ca. Vei ira e Asitoti kei na veivanua vakavolivolita.

⁷Ni ra sa raica na kai Asitoti oqo. Era sa tukuna: "Na kato ni Kalou me kua ni tiko vata kei keda. Na liga ni Kalou sa rui tarai keda kina na ka e ca sara, sa vaka talega kina vei Takoni na noda kalou."

⁸Era sa vakasoqoni vata na turaga kece e Filisitia ka tukuna, "Na cava me da cakava ki na Kato ni nodra Kalou na Isireli?" Era sa tukuna, "Me kau na Kato ni Kalou ki Kaca." Era sa qai kauta tani na "Kato ni Kalou" ni Isireli.

⁹Sa yaco ni ra sa kauta tani na Kato ni Kalou, na liga i Jiova sa tara yani na koro ka sa yaco kina e dua na veivakarusai levu; era sa samuti na tagane ena koro, ruarua na qase kei na gone, sa tarai ira talega na bo ca ka boi ca.

¹⁰Era sa vakauta sara na Kato ni Kalou ki Ekironi, sa qai yaco me kau ki Ekironi na Kato ni Kalou. Era sa tagi vakalevu na kai Ekironi ka tukuna, "Era sa kauta mai na Kato ni Kalou ni Isireli" me mai vakamatei keimami kei ira kece na tamata!"

¹¹Era sa lako ka vakasoqoni ira kece na turaga ni Filisitia ka tukuna, "Me vakau lesu na Kato ni Kalou ni Isireli ki na kena vanua, me kakua kina ni vakamatei keimami kei ira kece oqo," sa dua na veivakarusai levu sa yaco ena veikorokoro; sa kaukauwa sara na liga ni Kalou vei ira.

¹²O ira sa sega ni mate, sa tarai ira na vidikoso lelevu, ka sa lako cake tikoga ki lomalagi na nodra tagi na tamata.