[52] 1 Cesalonaika 5

¹Ia me baleta nai vakataotioti ni gauna kei na ka ena yaco kina, sa sega tale ni qai yaga vei kemudou na veiwekani me'u vola yani, ni dou sa kila vinaka tu.

²Sa matata vinaka tu vei kemudou ni siga ni Turaga, ena lako mai me vaka na daubutako ena bogi.

³Ni ra na tukuna na tamata, "Me da vakacegu ga ni da sa tiko vinaka!" Ena qai yaco vakasauri mai na ka dauveivakarusai, ena yacovi ira kina na mosi vaka na yalewa sa taratara. Era na sega ni dro bula rawa.

⁴Ia oi kemudou na wekaqu, dou sa sega ni tiko ena butobuto, me rawati kemudou kina na siga oqo me vaka na dau butako.

⁵Oi kemudou kecega na gone ni rarama, kei na gone ni siga. Eda sa sega ni nona na bogi, se nona na butobuto.

⁶O koya oqo meda sa kua ni moce, me vaka era cakava tu eso, ia meda sa yadrava ka yalomatua tiko.

⁷O ira era moce tiko, era moce ena bogi, kei ira sa mateni era mateni ena bogi.

⁸Ia oi keda, sa cilavi keda tu na rarama me da sa yalomatua mada, meda sa tokara nai sasabai ni lomasereda na vakabauta kei na loloma, me daramaki talega na i tataqomaki ni ulu sai koya noda vakanuinuitaka tiko na bula.

⁹Ni sa sega ni digitaki keda na Kalou me da na mate, ia me da rawata na bula ena vuku ni noda Turaga o Jisu Karisito,

¹⁰Ka mai mate ena vukuda, se da yadra se moce eda na bula vata ga kei Koya.

¹¹O koya oqo mo dou dau veivakacegui vaka i kemudou, ka dou veitarai cake tiko, me vaka ga dou sa dau cakava tiko.

¹²Keitou sa kerei kemudou na veiwekani mo dou dau nanumi ira na veiqaravi tu ena vukumudou, ni ra dau masulaki kemudou tiko vua na Turaga ka vakavulici kemudou.

¹³Me ra dau raici ena mata loloma ena vuku ni cakacaka dredre era vakayacora tiko. Dou veivinakati vakai kemudou.

¹⁴Keitou sa kerei kemudou, na veiwekani, me ra vosataki tiko vakadodonu na talaidredre, o ira na yalolailai me ra dau vakayaloqaqataki, maroroi ira na malumalumu, dou vosoti ira kece na tamata.

¹⁵Dou raica me kua ni dua e sauma na ca ena ca vua e dua, ia dou sasaga mo dou veivinakati kei ira na tamata kecega.

¹⁶Mo dou dau reki tikoga,

¹⁷Nomudou masu me kua ni dua na gauna me cegu kina,

¹⁸Dou vakavinavinaka ena vuku ni ka kecega; Ni sa loma ni Kalou oqo vei kemudou ena vuku i Karisito Jisu.

¹⁹Dou kakua ni tabonaka se vakalailaitaka na cakacaka ni Yalo Tabu.

²⁰Dou kua ni vakawaletaka na parofisai.

²¹Vakatovolea na ka kecega; o koya ga e vinaka qai taura dei.

²²Dou kua ni la'ki tiko ena vanua ni lasa vakavuravura. Vakalouvinakataki Kei Na Veivakasalataki

²³Oqo me vakasavasavataki kemudou sara na Kalou ni veivakacegui; ka me sa maroroi me kua ni tauvi duka na yalomudou na lomamudou kei na yagomudou me yacova na gauna e lesu mai kina na noda Turaga o Jisu Karisito.

²⁴O Koya sa kacivi kemudou ena kitaka ni sa yalodina o Koya.

²⁵Na veiwekani, dou masulaki keitou tiko mai.

²⁶Keitou sa loloma yani vei kemudou ka salavata neitou vakanuinui vinaka ena i regu savasava.

²⁷Au sa vakarota yani ena vuku ni Turaga me wiliki nai vola oqo me rawa ni ra rogoca taucoko na veiwekani yalosavasava.

²⁸Me nomudou na nona yalololoma na noda Turaga o Jisu Karisito. Emeni.