[52] 1 Cesalonaika 4

¹Ena vuku ni Turaga o Jisu, keitou sa kerekere ka vakaroti kemudou na veiwekani, mo dou sasaga ki na bula e uasivi cake, ia dou a ciqoma na neitou i vakavuvuli e na sala mo dou lakova ka vinakata na Kalou;

²Ni dou sa kila vinaka nai vakaro keitou a solia vei kemudou ena vuku ni Turaga o Jisu.

³Ni sai koya oqo na loma ni Kalou, mo dou savasava sara, ka kakua ni ia na gagadre ca ni tovo vakayago;

⁴Sa dodonu mo dou kila vakayadua na noda maroroya na yagoda me savasava tiko ka me dokai,

⁵Me kakua ni vakataki ira na matanitu tani era sega ni kila na Kalou, ena nodra veitaliataki ira ena gagadre ni yagodra;

⁶Me kua ni dua me vakatautaukeni koya ena veika oqo ka la'ki vakaleqa kina na tacina, baleta na Turaga ena sauma vua, na veika oqo keitou sa tukuna oti vei kemudou.

⁷Ni sa sega ni kacivi keda na Kalou meda dukadukali, ia meda sa savasava ga.

⁸O koya sa besetaka oqo e sega ni besetaka na tamata, e besetaka sara ga na Kalou, o Koya sa solia tu vei keda na Nona Yalo Tabu.

⁹Sa sega tale ni qai yaga vei kemudou me'u vola yani na veilomani vakaveitacini, ni sa vakavulici kemudou oti na Kalou mo dou veilomani vakataki kemudou;

¹⁰Ka ni dou sa vakayacora tiko vei ira na tacimudou era tu ena vanua vaka Masitonia. Ia keitou sa kerei kemudou mo dou tomana tikoga vakalevu na bula vaka oqo;

¹¹Sa vinaka nomudou sasaga ki na bula sautu, ka dou sa cakava, ka vakayagataka na ligamudou ki na qele, me vaka neitou i vakaro vei kemudou,

¹²Mo dou lako vakadodonu e matadra na sega ni lotu, me kua ni dua na gauna mera dusi kemudou ni dou dravudravua.

¹³Ia au sa sega ni vinakata mo dou sega tu ni kila na veiwekani, baleti ira sa moce, ka mo dou kakua soti ni rarawataki ira me vakataki ira sa sega tu na noda i nuinui.

¹⁴Kevaka eda sa vakabauta ni a mate o Jisu ka sa tucake tale, io na Kalou e na kauti ira vata mai kei Koya o ira sa moce ni ra tu vata kei Jisu.

¹⁵Keitou tukuna na vosa oqo vei kemudou mai na vosa dina ni Turaga, ni da na sega ni liu vei ira sa moce tu oi keda eda bula tiko,

¹⁶Ni na lako sobu mai lomalagi o koya na Turaga ena kaila, kei na domo ni agilosi Turaga, kei na rorogo ni davui ni Kalou. Era na tucake e liu o ira na mate era tu vata kei Karisito.

¹⁷Eda sa qai muri ira cake yani oi keda na bula tiko, meda na lako cake vata ena vei o ka sota vata kei na Turaga ena loma ni maliwa lala. Ni oti eda sa na qai tiko vata kei na Turaga.

¹⁸O koya oqo, mo dou ia tiko na veivakacegui vaka i kemudou ena vosa oqo.