[52] 1 Cesalonaika 3

¹O koya oqo, ni keitou sa sega ni qai vosota rawa, keitou sa mani nanuma me keitou sa tiko mada ga mai Aceni.

²Ka talai Timoci yani o koya e dua na tacida, ka i talatala ni Kalou noqu i tokani ena vuku ni tukutuku vinaka i Karisito, me la'ki vakayavutaki kemudou vinaka ka vakataudeitaki kemudou, e na vuku ni nomudou vakabauta.

³Me rawa kina vei kemudou mo dou kua ni yalalailai ena veika rarawa; ka mo dou kila talega ni oqo sara ga na veika e dodonu meda na sotava tiko.

⁴Keitou sa vakaraitaka oti tiko vei kemudou ni keitou se tiko mai keri, ni da na vakacacani ena vuku i Jisu.

⁵Oqo na vuna au veitalai tiko yani kina, niu sega ni kila na nomudou vakabauta, de dou sa rawai beka mai vei ira nai to i Setani, sa qai sega ni yaga na neitou veiqaravi ena vukumudou.

⁶Ni sa lesu mai o Timoci ena nona tiko mai vei kemudou, e dua nai tukutuku vinaka e kauta mai ena vuku ni nomudou vakabauta kei na loloma, kei na vuku ni nomudou gadreva mo dou raici keitou, me vaka ga na neitou via raici kemudou

⁷Sa dua na ka na levu ni neitou marau ena vuku ni nomudou vakabauta e dina mada ga ni keitou vakacacani ka kune ka rarawa.

⁸Kevaka mo dou na tudei tiko vua na Turaga, keitou sa marau ka bula vinaka.

⁹Sa kila vinaka na Kalou na neitou marau ena vukumudou, ni sega tale e dua me na yavalata nai tikotiko ni Kalou ena vakavinavinaka oi keitou ga ena vukumudou.

¹⁰Keitou sega ni cegu ni masulaki kemudou ena siga kei na bogi me keitou raici kemudou, me rawa ni keitou la'ki vakavinakataka yani na vanua dou malumalumu tiko kina.

¹¹Ia na noda Kalou ka Tamada talega, kei na noda Turaga o Jisu Karisito me liutaki keitou me keitou lako yani vei kemudou.

¹²Me vakalevutaka vei kemudou na Turaga na loloma, mo dou veilomani kina vakai kemudou ka lomani ira kecega na tamata, me vaka dou sa raica mai vei keitou.

¹³Ka me rawa kina ni maroroi na yalomudou me kua ni tawani tu kina na veika ca, mo dou savasava sara ena mata ni Kalou o Tamada, ka waraka tiko kina na nona rairai mai na Turaga o Jisu Karisito, kei ira vata na Nona yalosavasava.