[52] 1 Cesalonaika 2

¹Dou sa kila vinaka na mata veiwekani ni sega ni ka wale na neitou a lako yani.

²Dou sa kila vinaka talega na levu ni veika rarawa keitou a sotava mai Filipai, ia e solia tiko vei keitou na Kalou na yalo e qaqa, me keitou vunautaka vei kemudou nai tukutuku vinaka, e dina ni tu na veisaqasaqa.

³E sega ni vuni neitou la'ki vunau yani baleta na leqa e yaco tiko, se nai valavala ca, se na veilawakitaki.

⁴Ia ena vuku ga ni sa digitaki keitou na Kalou me keitou tawasei ena vuku ni tukutuku vinaka, dou raica ga ena neitou vunau ni keitou sega ni via vakalomavinakataka e dua na tamata, na Kalou duadua ga ni kila tiko na yaloi keitou.

⁵E sega vakadua ni keitou vunau me veimari se vunau me tawa kina neitou taga “ na kena vakadinadina na Kalou.

⁶Keitou sega ni cakava oqori mera qoroi keitou kina na tamata, se mo dou dokai keitou se o ira tale na so, keitou sa kitaka tikoga ni keitou sa i apositolo i Karisito.

⁷Ia keitou sa rui kawaitaki kemudou vakalevu, me vaka nona rui kawaitaka na luvena e dua na tina ni gone.

⁸Keitou sa moce tatadrataki kemudou tu ga, keitou sega walega ni solia vei kemudou na vosa ni tukutuku vinaka, keitou gadreva me keitou sa solia taucoko na neitou bula vei kemudou, ena vuku ni nomudou caka vinaka vei keitou.

⁹Me kakua ni kani oca vei kemudou na neitou vakasosataki kemudou tiko, ena siga kei na bogi ena neitou cakacaka, keitou na cakava tikoga na kena vunautaki nai tukutuku vinaka.

¹⁰Na Kalou, kei kemudou sa kenai vakadinadina, ni keitou cakava sara tu ga vei kemudou sa lotu, ena yalo e vaKalou, e dodonu ka savasava.

¹¹Dou kila tiko neitou i tatau vei kemudou, neitou vakamamasu kei na neitou i vakaro, me vaka e dua na tama ni gone vei ira na luvena.

¹²Sai koya mo dou bulataka nai valavala sa kilikili me vaka na luve ni Kalou, ni dou sa digitaki mo dou taukena na Nona matanitu vakaiukuuku.

¹³Ena vuku ni ka oqo keitou sega ni dau cegu kina ena neitou vakavinavinakataki kemudou vua na Kalou, ena nomudou maroroya na vosa ni Kalou dou a rogoca vei keitou, ka sega ni dou vakaweleweletaka ni sa vosa dina, ka sa vakayaco bula tiko vei kemudou ni dou sa vakabauta.

¹⁴Vei kemudou na veiwekani, dou tautauvata sara ga kei na soqosoqo lotu ni Kalou mai Jutia era tu vata kei Karisito Jisu. Ena nodra a vakararawataki mai vei ira ga na wekadra, me vaka sara ga e yaco tiko vei kemudou.

¹⁵Era vakamatea na Turaga o Jisu kei ira nodra parofita, era mai vakararawataki keitou; na Kalou e sega ni taleitaki ira vata kei ira kecega na tamata.

¹⁶Era mai tarova na neitou vunau vei ira na kai matanitu tani de ra qai vakabulai, era sa vakaikuritaka tikoga nodra i valavala ca; na veicudruvi ena yaco vei ira ena kena i vakatagedegede sara e cake.

¹⁷Ia e dina ni datou sega ni veiraici tiko ena dua na gauna lekaleka oqo, io na yalo sa veivolekati, sa dua na ka na neitou gadreva tiko me datou veisotari mada.

¹⁸Keitou via lako tiko yani “ oi au mada ga o Paula sa vakalevu na noqu sasaga yani “ ia o Setani sa qai vakataotaka tiko noqu lako yani.

¹⁹Cava keitou nuitaka, ka rekitaka, se cibitaka tiko? Sa sega li ni oi kemudou ena mata ni Turaga ena nona rairai mai?

²⁰Ni o kemudou sa vuni neitou lagilagi kei na reki.