[52] 1 Cesalonaika 1

¹Oi au o Paula, o Silivenusi, kei Timoci, ki na nodra i soqosoqo lotu na kai Cesolonaika, o ira sa tu vua na Kalou o Tamada kei na Turaga o Jisu Karisito. Me nomudou na loloma kei na vakacegu ni Kalou na tamada kei na noda Turaga o Jisu Karisito.

²Keitou sa dau vakavinavinakataki kemudou tikoga vua na Kalou, ena neitou dau masulaki kemudou.

³Ena neitou dau vakananuma na nomudou dau cakacaka ena vakabauta, kei na nomudou dau oca ena loloma, kei na nomudou vosota nai nuinui, vua na noda Turaga o Jisu Karisito ena mata ni Kalou o Tamada.

⁴Kei na nomudou kila na veiwekani lomani ni Kalou e digitaki kemudou.

⁵Nai tukutuku dou a rogoca mai vei keitou a sega ni tarai kemudou ena vosa ga, ia ena kaukauwa kei na Yalo Tabu me vaka sa vakadinadinataki, ni dou sa kila na neitou i valavala ena vukumudou ni keitou a tiko kei kemudou.

⁶Ka dou sa yaco kina mo dou muri keitou kei na Turaga, ni dou muria tikoga na vosa ni Kalou ena dela ni vakararawataki, dou sa qai reki tikoga ena Yalo Tabu.

⁷Dou sa nodra i vakarau vei ira na lotu mai Masitonia kei Akaia.

⁸E toso vakatotolo na vosa ni Turaga ena vukumudou, sega walega mai Masitonia kei Akaia, ia ena veiyasana kecega. Na nomudou vakabauta na Kalou sa rogo ka teteva na veivanua, sa sega tale ni dua na kena yaga vei keitou me keitou vosa ena dua na ka.

⁹Ni ra sa tukuna ga o ira ena vuku i keitou nai valavala ni neitou la'ki tiko vei kemudou, ni dou sa vuki tani mai na veimatakau, ka qarava na Kalou dina.

¹⁰Dou waraka na Luvena sa tiko mai lomalagi o Koya sa vakaturi cake mai na mate, sai Jisu ga, ni o Koya ena vakabulai keda mai na veicudruvi sa roro tiko mai.