[51] Kolosa 4

¹Oi kemudou na turaga, me caka vakadodonu ka vakasavasava na veiqaravi vei ira nomudou tamata, ka mo dou kila ni tiko tale e dua nomudou Turaga e levu cake vei kemudou.

²Dou masu tikoga vagumatua, ka yadrava tiko ena vakavinavinaka.

³Ka mo dou dau masulaki keitou tale tikoga, me rawa ni dolava vei keitou na Kalou e dua na katuba me curumaki yani kina na nona vosa, ka wasei yani kina na veika vuni baleti Karisito, me vaka au vesu tu kina oqo.

⁴Au sa kena tamata me'u vakaraitaka na ka oqo, ni'u rawa ni tukuna vakadodonu.

⁵Na nomudou bula me kilikili vei ira na sega ni lotu, ka mo dou volia na gauna.

⁶Na vosa me lako mai gusumudou me vosa ga ni loloma, e vaka na kakana vakamasima vinaka, me rawa kina vei kemudou mo dou dau veirogoci vinaka kina.

⁷O Tikiko e dua na taciqu lomani, ka i talatala yalodina e noqui tokani ena vuku ni Turaga, ena laki tukuna taucoko vei kemudou na ka me baleti au.

⁸O ya sara ga na vuna au talai koya yani kina vei kemudou, me rawa ni laki raica mai o koya na dredre dou sotava tiko, ka me solia vei kemudou na vosa ni vakacegu.

⁹O koya kei Onisimo e dua talega na taciqu yalodina, e rau na lako vata yani. E rau na vakaraitaka vei kemudou na veika sa mai vakayacori tiko eke.

¹⁰Sa loloma tiko yani vei kemudou o Arisitako e dua keirau vesuki vata tiko, kei Marika na tavalei Panapasa (sa vakau oti yani na kenai tukutuku: Kevaka sa lako yani vei kemudou, dou maroroi koya)

¹¹Kei Jisu na yacana talega o Jasato. O iratou qo na noqui tokani e ratou dau vukei au ena kena vakatetei na matanitu ni Kalou, ena vuku ni sa cilavi tu na yalodratou, edau vakamarautaki au na nodratou bula.

¹²O Epafira e dua ga vei kemudou sa loloma tu yani, e sega ni dau cegu nona dau nanumi kemudou ena nona qaqa ni masu, ka masu mo dou tudei ka cakava tiko na loma ni Kalou.

¹³E dua na ka au raica vua ena nona lomakatakata tiko ena vukumudou, kei ira mai Leotisea kei Iarapoli talega.

¹⁴O Luke na vuniwai lomani kei Timasa rau sa loloma tu yani vei kemudou.

¹⁵Au sa loloma yani vei ira na veiwekani mai Leotisea, vei Nemisa kei nai soqosoqo lotu era lotu tiko e nona vale.

¹⁶Ni sa wili oti vei kemudou nai vola oqo ni dou sa rogoca oti, au kerea me kau ki Leotisea me laki wiliki talega vei ira.

¹⁷Dou tukuna vei Akipo, "Me nanuma vinaka tiko na cakacaka sa solia vei kemudou na Turaga, ka mo dou cakava sara.

¹⁸Au sa loloma yani ka vola ena ligaqu dina “ o Paula. Dou nanumi au ena noqu vesu tiko. Me nomudou na loloma. Emeni.