[51] Kolosa 3

¹Kevaka dou sa vakaturi cake vata kei Karisito, mo dou vakasaqara na veika mai cake, sa dabe tiko kina na Karisito ena liga imatau ni Kalou.

²Dou dau nanuma na veika mai cake, kakua ga na veika e vakavuravura.

³Ni dou sa mate, na nomudou bula sa vuni vata kei Karisito vua na Kalou.

⁴Ni na rairai mai na Karisito, na noda vuni bula, dou na qai rairai vata kei Koya ena i ukuuku.

⁵O koya oqo, mo dou vakamatea na veitikimudou sa vakavuravura tiko: A dauveibutakoci, nai valavala sega savasava, na garogaro, na garogaro ca, na daukocokoco na ka oqo sa tautauvata kei na qaravi matakau.

⁶Ena vuku ni veika oqo, na cudru ni Kalou ena tarai ira era sa cakava tiko,

⁷Ni oi kemudou dou a dau cakava tu e liu ena gauna dou se butobuto tu kina.

⁸Ia ena gauna oqo, sa dodonu mo dou sa luvata tani na veika kece oqo: Na cudrucudru, na ruru, na dau naki ca, dau vosa veivakasewasewani, kei na vosa vakalialia mai na gusumudou.

⁹Me kakua vei kemudou na veilasutaki, ni dou sa luvata tani taucoko nai valavala makawa,

¹⁰Ni dou sa daramaka nai sulu ni tamata vou, ka vakavoui tikoga ena nomudou veiwekani kei Koya, mo dou na vakaraitaka tiko kina na nona cakacaka na dauveibuli.

¹¹Sa sega tale ni dua me kai Kirisi se Jiu, se cilivi se sega ni cili, se kai matanitu tani sei taukei, bobula se turaga, ia sa o Karisito ga, io, me vakarisito na ka kecega.

¹²O koya oqo, ni dou sa tamata digitaki ni Kalou, sa savasava ka daulomani, dou bulataka na loloma ni Kalou, na yalovinaka, na yalomalumalumu, na yalomalua, na vosota vakadede;

¹³Dou veivuke ni colata nomudou i colacola, dou veivosoti vakai kemudou, ke dua na ka cala e beitaki kina e dua vei kemudou; ni sa vosoti kemudou oti o Karisito, e dodonu mo dou dau veivosoti.

¹⁴Ia na veika kece oqo, na loloma ga me yavu tiko ni nomudou bula, ni loloma e vakataucokotaka na ka kecega.

¹⁵Na vakacegu ni Kalou me lewa na yalomudou, me rawa ni da vakavinavinaka kina, ni o keda eda sa dua ga na yago.

¹⁶Me vakavale vei kemudou na Vosa i Karisito, mo dou vakasinaiti kina ena vuku kecega, dou veivakatavulici ka veivunauci vakai kemudou ena same kei na sere ena sere vakayalo, ka dou lagasere mai na vuni yalomudou ni dou lomana na Turaga.

¹⁷Ena ka kece dou cakava ena vosa se cakacaka, me caka kece ena yaca ni Turaga o Jisu, dou dau vakavinavinaka vua na Kalou o tamada ena Vukuna.

¹⁸Oi kemudou na yalewa vakawati, dou dau vakarorogo vua na watimudou, ni sa vinakata na Turaga.

¹⁹Oi kemudou na tagane vakawati, dou lomana na watimudou kakua ni dou dau vakatotogana.

²⁰Oi kemudou na gone, dau muria na vosa ni nomudou i tubutubu ena ka kecega, ni Turaga sa dau vinakata me vaka oqo.

²¹Vei kemudou na tama, dou kakua ni vakacudrui ira na luvemudou, de ra qai yalolailai.

²²Vei kemudou na tamata dauveiqaravi, dou talairawarawa vei ira nomudou turaga sa liutaki kemudou, dou kakua ni cakava me ra qoroi kemudou kina na tamata, ia ena yalodina ga kei na rerevaka na Kalou.

²³Ena ka kece dou cakava, mo dou cakava ena yalomudou dina, ni dou cakava tiko vua na Turaga, ka sega ni vei ira na tamata.

²⁴Ka mo dou kila na Turaga ena solia na kemudou i sau me noda i vota vota; ni dou sa qarava na Turaga o Karisito.

²⁵Ia o koya ga sa caka ca ena taura na kenai sau ni ka e cakava, ena sega ni dua na veitovaki me caka.