[51] Kolosa 2

¹Au vinakata mo dou kila na levu ni noqu lomaleqataki kemudou kei iratou mai Leotisea, kei ira talega keimami se bera ni bau sota vata,

²Me bolei na yalodra, me kua na datuvu, mera yalovata ka veilomani, ka mera kila sara ni sa nodra tu na bula kei na talei ni ka vuni, mai vei Tamada kei Karisito.

³Ni sa tu taucoko Vua nai yau talei ni yalomatua kei na vuku.

⁴Na ka oqo au sa tukuna rawa vei kemudou me kakua ni dua e mai rawai kemudou ena vosa ni veicavilaki.

⁵E dina ni datou sega ni tiko vata, io na yaloqu ga sa dau tiko kei kemudou, Au mai marau ena nomudou taura dei ka tudei ena vakabauti Karisito.

⁶Ni dou sa mai vakabauta na Turaga o Jisu Karisito, dou bulataka sara na kena bula.

⁷Dou tauyavutaki ka tara cake Vua, ka vakataudeitaki ena nomudou vakabauta, me vaka dou sa vakatavulici kina, ka mo dou uasivi cake ena vakavinavinaka.

⁸Dou qarauna de dua e mai veisautaki kemudou ena nona kila ka vakavuravura ena vosa vakavukuvukuya, ka sega ni yaga, e yavutaka tiko nona vosa ena vakasama vakatamata kei na i vakavuvuli vakavuravura, ka sega ni vaka nai vakavuvuli i Karisito.

⁹O Koya sai sosomi ni Kalou e vuravura ena nona mai bula vakatamata, ka sa vakasinaiti tu vua na kaukauwa ni Kalou kecega.

¹⁰Ena sega ni dua na ka me na yali vei kemudou ni dou sa tu Vua, ni lewai ira taucoko tu nai vavakoso yaloca kei ira sa kaukauwa.

¹¹Dou sa cilivi oti oi kemudou, ena veicilivi ka sega ni caka ena liga, nomudou sa luvata tani nai valavala ca ni yago, mai na veicilivi nei Karisito.

¹²Ni dou sa buluta yawa ena nomudou papitaiso, na Kalou sa qai vakaturi kemudou cake ena vuku ni nomudou vakabauta, me vaka nona vakaturi cake mai na mate na Turaga.

¹³Oi kemudou ni dou a mate tu ena vuku ni valavala ca, ena vuku talega ni yagomudou sa sega ni cili, sa qai vakabulai kemudou cake o Koya mo dou bula vata, ka vosoti kemudou ena nomudou caka cala kecega.

¹⁴Ka sa bokoca kece na veika ca e volai tu me baleti keda, ni tukuna tiko noda ca. E taura tani mai me laki vakoti vata kei Koya ena kauveilatai.

¹⁵E vakamalumalumutaki ira taucoko na vei vavakoso ena veiyasana vakalomalagi kei ira na kaukauwa ena nona tucake mai ka vakaraitaki Koya vei ira kece, ni sa nona na qaqa.

¹⁶Me kua ni dua e via lewa vei kemudou na kakana, se na memudou wai ni gunu, se nomudou dau soqo vata, se na vula vou, se na Siga Tabu,

¹⁷Ni oqori sai yaloyalo ga ni veika ena yaco mai, ia o Karisito ga na ka dina.

¹⁸Ni sa waraki kemudou tu na kemudou i sau, me kua ni dua e mai vakaleqai kemudou, me kamikamica nona vosa ka olifa ca e loma, ni o koya e masuta tiko na agilosi, ena ka e sega ni rawa me raica, ka vakasinaita tu nona bula nai tovo vakayago.

¹⁹E sega ni rawa mada ga ni vakabauta tiko na ulu, ni yago taucoko era veisemati vakavinaka, na veiualalai kei na viciko era vakarorogo taucoko kina ulu, ni yago taucoko e vakatuburi tiko mai vua na Kalou.

²⁰O koya oqo, kevaka dou sa mate vata kei Karisito ni dou muria tiko nai dusidusi ni bula vakavuravura; cava dou via vakavuravura tiko kina ka muria tiko na kena lawa -

²¹"Kua na vakataratara, dou kua ni tovolea, dou kua ni taura",

²²Na ka taucoko oqori e sega ni ka tudei ena gauna e vakayagataki kina “ e tautauvata sara ga nai vakasala kei na vakavuvuli vakatamata?

²³Na veika oqo ena rairai tu me vaka e vakalotu ka rakorako, qai vakaturaga, e sega ni dua na ka meda vakamelea rawa kina, ia e sega sara ga ni dua na ka e yaga kina, e vakabulabulataka ga nai tovo vakayago.