[54] 1 Timoci 1

¹Oi au o Paula, na apositolo i Jisu Karisito, ena lewa ni Kalou na noda i vakabula kei na Turaga o Jisu Karisito, na noda i nuinui,

²Vei Timoci na luvequ dina ena vakabauta: Me nomu na loloma, na yalololoma, kei na vakacegu mai vua na Kalou o Tamada kei Jisu Karisito na noda Turaga.

³Me vaka ni'u na lako ki Masitonia, au sa kerei iko kina mo tikoga e Efeso, me rawa ni o vakaroti ira eso me ra kakua ni vakatavuvulitaka tiko nai vakavuvuli tani.

⁴Mo qarauna vinaka eso nai tukutuku lasutaki kei nai vola ni kawa sa volai; ni sa yaco ga kina na duidui kei na veibasuraki, ka sega ni tara cake na vakabauta kei na bula e vakalou.

⁵Nai naki ni vakaro oqo na loloma mai na yalo e savasava, kei na lewa e loma vinaka, kei na vakabauta dina,

⁶Ni so era vakacalai walega tu ga ena vosa kamikamica ni veirawai,

⁷Era vinakata mera qasenivuli ni vunau, ka sega tu mada ga ni kilai na ka era vakatavuvulitaka se na ka era vakadeitaka.

⁸Ia eda kila nai vunau e vinaka, kevaka me muri me vaka na kena i vakaro,

⁹Ni'u sa kila: ni vunau e sega ni buli me baleta na tamata yalododonu, ia vei ira sara ga na dau basu lawa kei na talaidredre, vei ira na sega ni lotu kei na i valavala ca, vei ira na dukadukali kei na dauvakacaca, vei ira na labati tamadra, kei ira na labati tinadra, kei ira na dauvakavuvala,

¹⁰Vei ira na dauveibutakoci, kei ira na dauveimoceri vakatagane, vei ira na dauvesuka vakavuni na tamata, kei ira na dau lasulasu, vei ira na dau bubului vakailasu, kei na so tale na bula e vakayacori ka sega ni lako vata kei na i vakavuvuli dina,

¹¹Me vaka na lagilagi ni tukutuku vinaka mai vua na Kalou ka vu ni sautu, sa lesi au kina me'u kena i talatala.

¹²Au vakavinavinaka vei Jisu Karisito na noda Turaga, ena nona digitaki au me'u Nona i talatala ena vuku ni sa wiliki au me yalodina.

¹³E dina ni oi au e dua na dauvosacataka na lotu i Jisu, ka dau vakararawataki ira na soqosoqo lotu, oi au e dua na tamata dau coqa na lotu; ia au sa lomani ga, ni'u vakayacora tu oqori, ena sega ni vakabauta kei na lecaika.

¹⁴Na loloma ni noda Turaga sa sega ni yalani rawa, na vakabauta kei na yalololoma sa tu vei Jisu Karisito duadua ga.

¹⁵Oqo na vosa dina ka dodonu me vakabauti, Ni sa lako mai ki vuravura o Jisu Karisito, Me vakabulai o ira nai valavala ca, me vaka taki au.

¹⁶Sa dina, oqo na vuna, au sa rawata kina na loloma, me liu vei au na nona vakatakila o Jisu Karisito nai valavala ni dauvosota, me rawa ni dusidusi vei ira era na vakabauti koya ena kena rawati na bula sega ni mudu.

¹⁷O koya na Tui sa sega ni mudu, ka sega ni rawai koya o mate, na Kalou oqo sa sega ni kune, e vuku ka rai yawa, me nona na lagilagi kei na vakarokoroko me sega ni mudu. Emeni.

¹⁸Oqo nai vakaro au sa vakaroti iko kina na luvequ Timoci, me vaka na parofisai sa vakayacori oti vei iko, mo vakarau tu ki na i valu vinaka,

¹⁹Me tudei na nomu vakabauta, kei na nomu lewa e loma me totoka tu, ni so, era sa biuta ka sega ni dei kina, sa yaco kina me voca ka kasere vakadua na nodra bula.

²⁰Me vakataki Emenio kei Alikisada, au sa soli rau vei Setani, me rawa ni rau vulica me rau kakua ni dauvosavakacaca.