[14] 2 Veigauna 12

¹Ia ni sa oti o ya, ni sa vakadeitaka o Reopoame na matanitu ka vakaukauwataki koya vakai koya, sa vuki tani mai na i vunau i Jiova, kei ira vata kece talega na Isireli.

²Ka sa yaco e nai kalima ni yabaki i tui Reopoame ni sa lako mai o Sisake na tui Ijipita ka valuti Jerusalemi, baleta ni ra sa caka cala vei Jiova,

³E dua na udolu rua na drau na qiqi ni valu, onosagavulu na udolu era vodo ose, kei na tamata e sega ni wiliki rawa era lako vata mai kei koya mai Ijipita O na Lubumi kei na Sukimi kei ira na kai Iciopea.

⁴Sa taura o koya na veikoro vakabai e Juta ka sa lako mai ki Jerusalemi.

⁵Sa qai lako mai o Semaia na parofita kivei Reopoama kei ira nai liuliu e Juta, era sa soqoni vata mai Jerusalemi baleti Sisake, ka tukuna vei ira, "Sa tukuna vakaoqo o Jiova: 'O ni sa biuti Au, ia oqo Au sa soli kemuni talega ki na ligai Sisake.'"

⁶O ira nai liuliu e Juta kei na tui era sa qai vakamalumalumutaki ira ka tukuna, "Sa yalododonu o Jiova."

⁷Ia ni sa raica o Jiova ni ra sa vakamalumalumutaki ira, sa lako tale mai na vosa i Jiova vei Semaia na parofita, ka vaka, "Era sa vakamalumalumutaki ira; o koya oqo Au na sega ni vakarusai ira, ia Au na vakayacora vei ira na veisereki. Na Noqu cudru ena sega ni sovaraki yani ki Jerusalemi e na ligai Sisake.

⁸"Ia era na nona bobula ga, me ra na kila kina na duidui ni Noqu veiqaravi kei na veiqaravi ni veimatanitu ni vevanua kecega."

⁹Sa mani mai valuti Jerusalemi o Sisake na tui Ijipita, ka kauta tani nai yau mai na vale i Jiova kei nai yau mai na vale ni tui; e kauta na ka kecega. E kauta talega nai sasabai koula e a cakava o Solomoni.

¹⁰Sa qai cakava o Repeoame na Tui nai sasabai varasa me kenai sosomi, ka solia vei ira na kavetani ni valu ni mata yadra, era sa yadrava na matamata ki na vale ni tui.

¹¹Ia ni sa dau curu yani na tui ki na vale i Jiova, na yadra sa dau lako me kauti ira ki tuba; sa oti era sa qai dau kau tale ki loma ni vale ni yadra.

¹²Ni sa vakamalumalumutaki koya o koya, sa lako tani mai vua na cudru ni Kalou, me kakua ni vakacacani koya vakadua sara; ka sa vinaka talega na ka kecega e Juta.

¹³Na Tui o Reopoame sa vakaukauwataki koya vakai koya e Jerusalemi ka vakatulewa kina. Ia oqo sa yabaki vasagavulu kadua o Reopoame ni sa yaco me tui; ka sa vakatulewa tiko e Jerusalemi me tinikavitu na yabaki, na koro sa digitaka o Jiova mai vei ira na vei yavusa kecega e Isireli me biuta kina na Yacana. Na yaca i tinana o Neama, na yalewa ni Amoni.

¹⁴Sa cakava na ka ca, baleta ni a sega ni vakarautaka na yalona me vakasaqarai Jiova.

¹⁵Na cakacaka i Reopoame, kenai tekivu kei na kenai otioti, era sa sega beka ni volai e nai vola i Semaia na parofita kei na nei Ito na daurai me baleta nai tukutuku ni kawa? E rau sa dau vala voli ga o Reopoame kei Jeropoame e na nodrau veisiga.

¹⁶Ia sa vakacegu o Reopoame vata kei ira na tamana, ka sa bulu e na Koro i Tevita. Sa qai tui o Apaitia na luvena tagane me kenai sosomi.