[14] 2 Veigauna 13

¹Ena i ka tinikawalu ni yabaki ni lewa nei tui Jeropoame, sa tui kina e Juta o Apaitia.

²Sa lewa me tolu na yabaki e Jerusalemi. Na yaca i tinana o Mikaia na luvei Urieli mai Kipea. E rau sa dauvala o Apaitia kei Jeropoame.

³Sa dau tuvana vinaka na nona i valu o Apaitia, ka era sa tamata qaqa na nona tamata i valu, era sa lewe va na drau na udolu na nona tamata digitaki. Sa kauta talega mai o Jeropoame na nona tamata digitaki ni valu, ka era tamata qaqa talega e walu na drau na udolu na tamata.

⁴Sa tucake tu ena ulunivanua o Semaraimi ena veiulunivanua e Ifereimi o Apaitia ka kacivaka yani, "mo ni rogoca na Isireli kei Jeropoame:

⁵"E sega ni dodonu mo ni lecava ni o Jiova na nodra Kalou na Isireli, ni sa solia na lewa e Isireli taucoko vei Tevita me sega ni mudu, vei Tevita kei ira na luvena, na veiyalayalati sa vakamasimataki.

⁶"Ia o Jeropoame na luvei Nabati, na dauveiqaravi i Solomoni na luvei Tevita, sa tucake me vuki tani mai vua na nona turaga.

⁷"Era tokoni koya na tamata sega ni yaga, me ra vakaukauwataki ira vei Reopoame na luvei Solomoni, baleta ni se gone ga o Reopoame ka lecaika,sa sega ni gumatua rawa kina vei ira.

⁸"Oqo o ni sa vinakata mo ni kauta tani na matanitu ni Kalou, o koya sa tiko ena ligadra na luvei Tevita, o ni sa lewe levu, sa tiko vata kei kemuni na bulumakau koula sa bulia o Jeropoame vei kemuni me nomuni Kalou.

⁹"O ni sa sega beka ni kauti ira tani na bete i Jiova, o ira na luvei Eroni kei ira na Livai, ka bulia ga vakai kemuni na bete me vakataki ira na veimatanitu tani, ni sa lako mai e dua me vakacabora vei koya e dua na bulumakau gone kei na luve ni me e vitu me bete kina o koya ena ka e sega ni vakalou?

¹⁰"Ia, vei keimami, o Jiova sa neimami Kalou, keimami sa sega ni biuti koya: O ira na bete me veiqaravi vei Jiova era luvei Eroni kei ira na Livai era sa dui qarava na nodra i tavi.

¹¹"Era sa dau vakama vei Jiova nai soro kama ena veimataka kei na veiyakavi kei na vakamai ni veika boivinaka; sa dau tu talega na madrai vakarautaki ena teveli koula, ka sa dau waqa tiko ga na cina ena i tutu ni cina koula mai na veiyakavi: ni keimami se maroroya tikoga nai vakaroi Jiova na neimami Kalou, ia, oi kemuni sa biuti koya vakatikitiki.

¹²"Oqo mo ni raica, na Kalou vakataki koya sa tiko vata kei keimami ka sa neimami liuliu, kei ira na nona bete era sa vakadavui tiko me ra uvuca yani veikemuni nai vakaro. Kemuni na luvei Isireli “ mo ni kua ni vala vata kei Jiova na Kalou ni nomuni qase, ni kemuni na sega ni rawata!"

¹³Sa cakava o Jeropoame e dua na buki vere me ra lako mai e dakudra na Juta. Era sa tu e liu vei ira na Juta, ka lako talega mai muri.

¹⁴Ni ra sa veiraiyaki na Juta, era sa raica nai valu sa tiko ruarua ena yasana e liu kei na yasana e muri. Era sa tagi vei Jiova, ka ra sa uvuca na davui na bete.

¹⁵Era sa qai kaila na Juta; ia ni ra sa kaila tiko na Juta, sa yaco ni sa ravuti Jeropoame kei ira kecega na Isireli na Kalou e na mata i Apaitia kei Juta.

¹⁶Era sa dro na Isireli e na mata i Juta, ka sa soli ira na Kalou ki na ligadra na Juta.

¹⁷O Apaitia kei ira na nona tamata era sa qai cakava e dua na veivakamatei levu; e lima na drau na udolu na tamata digitaki nei Isireli era vakamatei.

¹⁸Sa yaco me ra vakamalumalumutaki na luve i Isireli e na gauna o ya; ka ra sa qaqa na luve i Juta, baleta ni ra vakararavi vei Jiova na Kalou ni nodra qase.

¹⁹Ka sa vakacemuri Jeropoame o Apaitia ka taura mai vua na veikoro eso: O Peceli kei na kena veikoro lalai, o Jesana kei na kena veikoro lalai kei Ifereimi kei na kena veikoro lalai.

²⁰Sa sega ni kaukauwa tale o Jeropoame ena gauna nei Apaitia, sa vakamatei Jeropoame o Jiova.

²¹Sa tubu na kaukauwa nei Apaitia, ka sa vakawatitaka e tinikava na yalewa, ka sa vakasucumi vua e ruasagavulu na luvena tagane kei na tinikaono na luvena yalewa.

²²Na vo ni tukutuku kei Apaitia kei na veika sa cakava, sa volai ena i vola nei Ito na parofita.