[47] 2 Koronica 3

¹Keitou sa baci tekivu tukuni keitou tale? Se me keitou vakataki ira eso, me keitou vola li e dua nai vola mei vakadinadina vei kemudou se me dua li nai vola mai vei kemudou, mei vakadinadina?

²Oi kemudou ga na neitou i vola sa volai ena yaloi keitou, era sa kila ka wilika o ira na tamata kecega;

³E matata vinaka tu ni dou sai vola i Karisito, dou rawata mai vei keitou, sa sega ni volai ena wai ni volavola, ia ena yalo ga ni Kalou bula, sa sega ena dela ni vatu ni volavola, ena vatu ga ni yagomudou, oqori, na yalomudou.

⁴A sa vakaoqo na neitou vakararavi vua na Kalou ena vuku i Karisito.

⁵Keitou sa sega ni rawata vakai keitou me vakasamataka ni keitou rawa ni rawata e dua na ka, ia sa vu ga mai vua na Kalou neitou kaukauwa,

⁶O koya ga sa vakayacori keitou me keitou sa i vota mate ni veiyalayalati vou, sa sega ni ka e volai ia ena yalona ga; na vosa volai sa ka mate, ia na Yalo ni Kalou sa solia na bula.

⁷Ia kevaka e se yaco sara na cakacaka sa yaco kina na mate o koya sa volai ka ceuti ena vatu me serau, me dredre kina vei ira na luvei i Isireli me ra raica rawa na mata i Mosese, baleta nai serau ni matana, o koya sa takali rawarawa.

⁸Ena sega li ni uasivi cake sara nai serau ni cakacaka ni Yalo Tabu?

⁹Kevaka sa laurai nai serau ena cakacaka ni veicudruvi, na cakacaka ni veivakadonui oqo sa uasivi sara na kenai serau mai na kena o ya.

¹⁰E sega sara ga ni wili me dua nai serau nai serau o ya, ni serau sa qai tu oqo e uasivi cake sara na kenai serau.

¹¹Kevaka me uasivi nai serau o koya sa takali yani; o koya e sega ni takali e uasivi sara na kenai serau lagilagi.

¹²O koya oqo, ni sa tu vei keitou nai nuinui oqo, keitou sa doudou tiko kina ni vunau “

¹³Keitou sega ni vakataki Mosese, me ubia na matana ena i ubi, me ra kakua kina ni raica na luve i Isireli e dua na ka sa takali vakamalua tiko yani.

¹⁴Ni se butobuto na nodra vakasama. Me yacova mai na siga oqo e se sega ga ni kautani nai ubi o ya, ni dau wiliki nai veiyalayalati makawa, baleta o Karisito duadua ga sa qai mai kauta tani.

¹⁵Me yacova mai na siga oqo ni wiliki nai tukutuku kei Mosese, e tu nai ubi e yalodra.

¹⁶Ia kevaka e dua me sa veisau vua na Turaga, ena kautani vua nai ubi o ya.

¹⁷Na Turaga sai koya ga oqo na Yalo Tabu; ni sa tiko na Yalo Tabu ni Turaga, sa na yaco na bula sereki.

¹⁸Ia Oi keda kecega, ni sa sega ni ubi na matada, eda sa raica tiko nai serau ni Turaga me vaka na titiro tiko e nai iloilo, ka sa yaco kina vei keda na veisau mai na lagilagi ki na lagilagi, me vaka sa cakava tiko na Yalo Tabu.