[47] 2 Koronica 4

¹O koya oqo, me tekivu mai na gauna keitou sa cakacaka kina vakaitalatala, me vaka na loloma sa yaco vei keitou, e sega ni bau dua na gauna me keitou guce kina.

²Na neitou i tukutuku vei ira na tamata e sega ni muria na gaunisala ni veivakaisini, keitou sega ni vakatavuvulitaka e dua na ka e sega ni tukuna na vosa ni Kalou, keitou sega ni via kauta cake talega mai na ka sa oti ka dau veivakamaduataki, ia ni keitou tucake tu ena mata ni Turaga me keitou tukuna tikoga na dina, ni ra rogoca o ira na tamata me laucoka na yalodra.

³Ia kevaka e buwawa na neitou kosipeli, ena buwawa ga vei ira sa lako tiko ki na rusa,

⁴Ni sa vakabutobutotaka na nodra vakasama na veika ni vuravura oqo, me dredre kina ni ra raica na rarama ni kosipeli sa serauni tu i Karisito, ni sai koya nai yaloyalo ni Kalou, me vakararamataka na yalodra.

⁵Keitou sega ni vunautaki keitou tiko, o Karisito Jisu Na Turaga, na uto ni neitou i tukutuku, oi keitou na bobula ga i Jisu.

⁶Na Kalou e vakarota me cila yani na rarama ki na vanua butobuto, o koya sa mai vakararamataka kina na yaloda, meda kila kina nai serau ni Kalou, sa kunei ena mata i Jisu.

⁷Ia nai yau talei oqo e mai ukutaka na yago qele, me vakaraitaka kina na Kalou na cakacaka veivakurabuitaki e vakayacora ena nona kaukauwa, ka sega ni o keitou.

⁸Ena vei yasana vava kecega keitou vakacacani mai kina, e sega ga ni mai rawai keitou, e vakatataro vakalevu sara na loma i keitou, ia keitou sega ni via suka i muri.

⁹Vakacacani sara vakaca, ia sega ni keitou guilecavi; viritaki sobu, ia sega ni keitou mate kina“

¹⁰Keitou sa colata tikoga e veisiga na veika rarawa me vakataki Koya na Turaga o Jisu, me rawa ni laurai talega ena yagoi keitou na mawe ni mavoa me vakataki Jisu.

¹¹Ni da se bula tikoga meda soli keda yani ki na mate ena vukui Jisu, ni na veisau na yago oqo me tautauvata kei Jisu.

¹²O mate sa cakacaka tiko oqo vei keitou, ia na bula sa tu vei kemudou.

¹³Ni sa duavata ga na yalo ni noda vakabauta, me vaka na ka sa volai, "au sa vakabauta kau sa vosa kina," oi keda eda sa vakadinata talega, o koya eda sa vosa kina,

¹⁴Eda sa kilai koya ka vakatura cake na Turaga o Jisu ena vakaturi keda cake vata kei Jisu, meda rairai vata e matana.

¹⁵Na ka kecega e yaco oqo me baleti kemudou, o ira na tamata era na raica mai ka vakacerecerea na Kalou ena Nona i serau, ni sa tubu cake nomudou loloma.

¹⁶O koya oqo me da kua ni yalolailai. E dina ni yagoda e sau sa salulu ka na vuca yani, ia na tamata e loma sa vakavoui tikoga mai ena veisiga kecega.

¹⁷Na noda rarawa e lailai sara ka lekaleka walega, sa vakarautaki keda tikoga ki na dua na bula e uasivi cake ka sa sega ni mudu na kena lagilagi,

¹⁸Ni da sa sega ni raica tiko na ka e laurai; eda raica na ka e sega ni rairai. Ia na ka e laurai e sega ni ka tudei, ia na ka sa sega ni rairai eSega ni mudu.