[47] 2 Koronica 8

¹Keitou vinakata, mo dou kila na veiwekani, me baleta na loloma ni Kalou, sa vakaraitaki vei ira na veisoqosoqo lewe ni lotu mai Masitonia:

²Ni ra sa vakatovolei tiko ena ka rarawa sara, sa qai levu ga nodra reki, sa sega ni dua na ka me tu ena levu ni nodra dravudravua, ia sa qai uasivi vakalevu sara na nodra loma soli ena soli ka.

³Au sa tu oqo me kena i vakadinadina, ni ra sa solia me vaka na ka era sa rawata, io, sa sega ni taqei rawa na ka era sa solia, ni ra solia ena yalo e marautaka,

⁴Era cikevi keitou matua me keitou ciqoma na i solisoli kei na veitokani ni veiqaravi vei ira era sa lotu.

⁵Sa sega ni vaka walega na ka keitou sa nuitaka, ia era sa cabori ira taumada vua na Turaga, emuri ki vei keitou me vaka na lewa ni Kalou.

⁶Ia keitou sa uqeti Taitusi kina, me vaka ni a tekivuna o koya, me vakaotia vinaka talega na cakacaka loloma oqo vei kemudou.

⁷Ia me vaka sa levu sara vei kemudou na ka kecega “ na vakabauta, sa tu na vosa matua, sa tu na kila ka, na gugumatua kecega kei na nomudou loloma vei keitou “ dou raica mo dou uasivi talega ena cakacaka loloma oqo.

⁸Au sega ni vosa me vaka na veivakaroti, ia au via raica na kena dina ni nomudou loloma, mai na nodra gugumatua o ira tale eso.

⁹Ni dou sa kila na loloma ni noda Turaga o Jisu Karisito, e dina sa vutuniyau o Koya, ka sa mai dravudravua ena vukumudou, me rawa kina vei kemudou, mo dou vutuniyau mai ena nona dravudravua.

¹⁰Ena vuku ni ka oqo au sa vakasalataki kemudou kina: E vinaka vei kemudou ni sega ni dou cakava tikoga na ka dou a tekivuna ka dou a gadreva tiko mo dou cakava ena dua na yabaki sa oti;

¹¹Ia oqo mo dou qai vakaotia sara, na kena cakacaka; me vaka dou a gumatua ena via cakava, me tini vinaka sara na cakacaka dou sa tekivuna oqo.

¹²Kevaka sa tu vei kemudou na loma e vinakata, sa vinakati me vaka na ka sa tu vua, ka sega ni vaka e sega ni tu vua.

¹³Au sega ni tukuna me ra vagalalataki eso mai nai tavi ka me vakabibitaki kina na nomudou i colacola;

¹⁴Ia me tautauvata ga, ena gauna oqo na nomudou i yau me sotava na nodra dravudravua, kei na nodra i yau talega mera solia mai me sotava na nomudou dravudravua- me rawa kina ni tautauvata.

¹⁵Me vaka sa volai, "O koya sa kumuna vakalevu sa sega na ka e vo vua, kei koya sa lailai na ka e kumuna sa sega na ka e yali mai vua."

¹⁶Ia me vakavinavinakataki na Kalou, o Koya sa vakatubura ena yaloi Taitusi na daunanumi kemudou vakaoqo.

¹⁷E sega walega ni taura na neitou i vakavuvuli, ia ena nona gumatua ga o koya, sa lako rawa yani kina kivei kemudou ena nona lewa ga.

¹⁸Keitou sa mani talai koya yani kei na dua na wekada, o koya sa rogo vinaka vei ira kecega na vei soqosoqo lewe ni lotu ena vuku ni tukutuku vinaka,

¹⁹Sa sega ni koya walega oqo, ia sa digitaki koya o ira na soqosoqo lewe ni lotu me kauta vata kei keitou na ka ni loloma, o koya keitou sa vakatulewataka me vakarokorokotaki tikoga kina na Turaga, ka me vakaraitaki talega kina vei keitou na nomudou yalo rawarawa.

²⁰Keitou sa qarauna vinaka; me kua ni dua me beitaki keitou ena vuku ni solisoli loloma levu keitou sa vakatulewataka tiko oqo -

²¹Me keitou solia na veika e vakaTuraga, sega walega ena mata ni Kalou, ena matadra talega na tamata.

²²Keitou sa talai iratou me ratou lako vata kei na wekada o koya keitou sa raica ni tamata gugumatua ena ka kecega, ia oqo sa levu cake sara na gugumatua baleta na levu ni neitou vakadinati kemudou.

²³Kevaka e dua e via kila nai tukutuku me baleti Taitusi, o koya na noqu i tokani ka keirau dau cakacaka veivolekati sara ena vukumudou. Kevaka e dua e via kilai rau na rua na wekada, oi rau nai talai mai vei ira nai soqosoqo lotu, nai ukuuku i Karisito.

²⁴O koya oqo mo dou vakaraitaka vei iratou oqo kei nai soqosoqo lotu, nai vakadinadina ni nomudou loloma kei na neitou dauvakadokadokai kemudou voli ga.