[12] 2 Tui 21

¹E se qai yabaki tinikarua walega o Manasa e na nona sa mai tui, ka lewa mai Jerusalemi o koya me limasagavulu ka lima na yabaki. Na yaca i tinana o Ifasipa.

²E caka ca o koya e na mata i Jiova, me vaka na nodra caka ca na veimatanitu e vakasevi ira tani o Jiova e matadra na Isireli.

³E a tara cake tale o koya na veivanua cecere a sa vakarusa mada na tamana o Esekaia; e vakaduria cake tale na i cabocabo ni soro i Peali, ka cakava tale e dua na matakau ceuceu, me vaka a cakava o Eapi na tui Isireli; ni a qaravi ira na veika buli kei lomalagi ka cuva vei ira.

⁴E tara talega na i cabocabo ni soro ena vale i Jiova, ka sa vosa oti kina o Jiova, "Mai Jerusalemi ga Au na biuta kina na yacaqu."

⁵E tara talega na i cabocabo ni soro me baleti ira na veika buli kei lomalagi e na loma ni rua na rara vakabai e na vale i Jiova.

⁶E vakayacora vei ira na luvena me ra vakamai e na bukawaqa, e cakava talega me daurairai, e vakatevoro, ka i lawalawa vata kei ira na daucurumi yalovelavela, kei na dau sova yaqona. E toro cake duadua na ka ca e cakava e na mata i Jiova, ka vakacudrui Koya kina vakaca.

⁷E ya ceuta e dua na matakau i Asira ka sa cakava oti, e na vale ka sa vosa oti kina o Jiova vei Tevita kei Solomoni na luvena, "E na vale mai Jerusalemi talega Au sa digitaka oti mai vei ira na yavusa e Isireli, Au na vakatikora kina na yacaqu me sega ni mudu;

⁸"Io Au sa na sega ni qai vakayacora tale vei ira na Isireli mera veilakoyaki mai na vanua Au a sa solia oti vei ira nodra qase “ kevaka walega mera qaqarauni me ra cakava na ka kecega Au sa vakarota vei ira, kei na lawa kecega sa vakarota vei ira na Noqu tamata o Mosese."

⁹Ia era sega ga ni via vakarorogo, ka sa lari ira o Manasa mera cakava vakalevu tale na ca me vaka na veimatanitu sa vakarusai ira o Jiova e matadra na Isireli.

¹⁰Sa qai vosa o Jiova ena gusudra na Nona tamata na parofita ka vaka,

¹¹"Me vaka ni sa cakava o Manasa na tui Juta na veika ca vakasisila oqo (e sa toro sobu sara kina na ka ca e kitaka o koya mai vei ira na Amoraiti ka ra liu vei koya, ka sa vakayacori Juta me i valavala ca kei na nona matakau),

¹²"Sa tukuna kina vakaoqo o Jiova na Kalou nei Isireli; 'Raica, Au sa kauta mai e dua na kalouca levu e Jerusalemi kei Juta, ia o koya ga e rogoca, e na qasikanunu kina na daligana ruarua.

¹³'Au na qai vakadreta e Jerusalemi na wa ni vakarau kei Samaria kei na i vakarau dodonu ni vuvale i Eapi, Ka'u na savati Jerusalemi me vaka e dua e qusia na veleti, me qusia ka vuki vakatoboicutaki koya.

¹⁴'Au na qai biuti koya laivi na kena vo ni Noqu i votavota ka soli ira yani kina ligadra na nodra meca; ka ra na yaco me ra tamata vakacacani ka kovei vakaukauwa mai vei ira na kedra meca,

¹⁵'Baleta ni ra sa cakava e mataqu na ka ca, ka ra sa vakacudrui Au me tekivu mai na gauna era lako tani kina mai Ijipita na nodra qase, me yacova na siga oqo.'"

¹⁶A sa qai vakadavea vakalevu o Manasa na dra ni tamata dodonu, me yacova ni sa vakasinaiti Jerusalemi mai na dua na muana kina dua tale, me vaka ni sa tu nona i valavala ca, sa vakayacori Juta talega me valavala ca, mera cakava na ka ca e na mata i Jiova.

¹⁷Ia na kena vo ni veika e cakava o Manasa na ka kece e cakava, na i valavala ca e a vakayacoraOe sega ni volai tu e na i vola tukutuku ni veigauna me baleti ira na tui e Juta?

¹⁸Sa moce vata kei ira nona qase o Manasa ka sa bulu ena nona yasa ni vale, o ya e nai teitei mai Usa. Sa qai lewa o Emoni me kena i sosomi.

¹⁹A se qai yabaki ruasagavulu ka rua o Emoni e na nona sa mai tui, ka lewa mai Jerusalemi, me rua na yabaki. Na yaca i tinana o Mesulemeci na luve i Arusi na kai Jotipa.

²⁰Sa dau caka ca o koya e na mata i Jiova, ka ucuya ga na ka e dau cakava na tamana o Manasa.

²¹E lakova talega o koya na sala e dau muria voli mai o tamana; ka qaravi ira na kalou matakau ka dau qaravi ira mai o tamana, ka lotu vei ira.

²²E biuti Jiova tani na Kalou ni nodra qase ka sega ni muria na sala i Jiova.

²³Era sa qai bukiveretaki Emoni o ira na nona tamata, ka vakamatei koya na tui ena nona loma ni vale.

²⁴Ia o ira na lewe ni vanua era sa qai vakamatei ira na i lawalawa era a bukiveretaka na Tui o Emoni. Era sa qai buli Josaia na luvena o ira na lewe ni vanua me kena i sosomi e na i tutu vakatui.

²⁵Ia na kena vo ni cakacaka i Emoni ka cakava o koya, e sega li ni volai tu ena i vola ni kedra i tukutuku ni veigauna na tui e Juta?

²⁶Sa qai bulu o koya e na nona i bulubulu e nai teitei e Usa. Sa mani lewa o Josaia me sosomitaki koya.