[12] 2 Tui 4

¹Sa dua na marama ka vakawati kivua e dua na luve ni parofita sa mai tagi vei Ilaisa, ka tukuna, "Sa mate na nomu tamata na watiqu, ia o ni sa kila ni sa rerevaki Jiova o koya, ka ni sa lako talega mai na tamata au sa sega ni sauma rawa vua na noqu dinau, me mai kauti rau na luvequ tagane me rau la'ki nona bobula."

²Sa vosa vua o Ilaisa ka vaka, "Na cava me'u cakava vei iko? Tukuna mai vei au, na cava e tiko vei iko e vale?" A sa tukuna vua "Sa sega ni dua na ka e tu vua na nomu vada e vale e dua ga na tavaya waiwai."

³Sa qai tukuna vua, "Lako, la'ki kerea tale mai eso na saqa lala e veivanua kecega, mai vei ira na kai nomu kecegaOna saqa lala; me kakua ni lailai walega o kumuna mai.

⁴"Ia ni o sa curu mai loma, mo qai sogota yani na katuba ka mo dra sogolati kei na luvemu; ka livia yani kina veisaqa kece oqori, ka biuta vakatikitiki mai o koya e sa sinai."

⁵A sa lako mai o koya ka sogolati rau kei na luvena, ka a kau saqa mai kivei koya; ka sa liviraka sara yani.

⁶Ia sa qai yaco, ena gauna era sa sinai kina na saqa, sa tukuna o koya vei na luvena, "Kauta tale mai vei au e dua na saqa." A sa tukuna o koya vei tinana, "Sa sega ni qai dua tale na saqa." Qai mudu na waiwai.

⁷A sa lako mai o koya ka mai tukuna vua na tamata ni Kalou. Sa qai tukuna sara o koya, "Lako, la'ki volitaka na waiwai ka mo sauma kina na nomu dinau; ka mo drau qai bula o iko kei na luvemu e na kena vo."

⁸E na dua na siga sa lako yani o Ilaisa ki Sunemi, a sa tiko mai keya e dua na yalewa e kilai levu, ka sa kerei koya me vakayagataka eso na kakana. E sa mani yaco, ena veigauna kece e dau tavali e keya, e sa dau curu sara ki loma me la'ki kania eso na kakana.

⁹Sa vosa sara o koya vua na watina, "Mo raica mada oqo, au kila ni koya oqo e tamata yalosavasava ni Kalou, ka dau tavali tiko e ke vei kedaru e na veigauna.

¹⁰"Au kerea, me daru cakava mada e dua na rumu lailai e cake; ka me biu tale ga kina e dua na nona i mocemoce, dua na teveli, dua na i dabedabe, kei na dua nai tutu ni cina; Me rawa kina vei koya, e na veigauna kecega e lako mai kina vei kedaru, me curu sara yani kina."

¹¹E na dua na siga ni sa lako yani ki keya o koya, e curu sara yani kina rumu e cake ka mani davo no.

¹²Sa tukuna sara vei Keasi na nona dauveiqaravi, "Mo kaciva mada mai na yalewa ni Sunemi oqo. Ia ni sa kacivi sa lako sara ma ka mai tucake tu e matana.

¹³A sa vosa sara vua ka vaka, "Mo tukuna vakaoqo vei koya, 'Raica o sa rui kauwai vakalevu vei keirau e na veikauwaitaki dina. Na cava sara mada au rawa ni cakava vei iko? O vinakata li me'u vosa e na vukumu vua na tui se ki vua na kavetani ni valu?'" Sa sauma sara yani o koya, "Au sa dau tiko vata ga kei ira na wekaqu."

¹⁴Sa tukuna sara yani o koya, "Na cava sara mada me na caka vua?" Sa sauma yani o Keasi ka vaka, "O koya e yada, e sega tu ni vakaluveni, ka sa qase talega mai o watina."

¹⁵Sa mani tukuna yani o koya, "Kacivi koya mai," Sa kacivi sara mai o koya ka mai tucake tu donuya na katuba.

¹⁶Sa tukuna sara yani o koya, "Ena gauna vata oqo e na yabaki e lako mai, o na roqota kina e dua na gonetagane." Sa tukuna sara o koya, "Sega, noqu turaga, na Tamata ni Kalou, mo ni kakua ni lasu vua na nomuni dauveiqaravi!"

¹⁷Ia sa qai mani kunekune dina na yalewa, ka vakasucuma sara e dua na gonetagane e na gauna dina ga e lokuci kina, me vaka sa tukuna oti vua o Ilaisa.

¹⁸A sa tubu cake sara na gone. Ia sa qai yaco e na dua na siga e lako sobu yani na gone vei tamana, kivei ira era tamusuki sila tiko.

¹⁹Sa tukuna sara o koya vei tamana, "Na uluqu, Na uluqu!" Sa tukuna sara o koya vua na nona dauveiqaravi, "Mo colati koya yani kivei tinana."

²⁰Ena gauna sa yaco yani kina vei tinana sa keveta o koya ka tenea me yaco sara na yakavi, a sa qai mate.

²¹A sa keveta cake yani o koya ka la'ki vakotora e na nona i davodavo na Tamata ni Kalou, sogota yani vua na katuba, ka curu tale mai tuba.

²²A sa la'ki kacivi watina tagane, ka tukuna, "Au kerea mo vakatala mada mai vei au e dua na cauravou kei na dua na asa, me rawa ni cici mada ga vakatotolo vua na tamata ni Kalou ka lesu tale mai."

²³Sa tukuna sara o koya, "Na cava o lako kina vei koya e daidai? E se sega ni Vula Vou se na Siga ni Vakacecegu." Sa tukuna sara o koya "Ena daumaka ga."

²⁴A sa vauca sara yani nona i vodovodo kina asa, ka tukuna vua na nona dauveiqaravi, "Mo vakaciciva totolo na asa ka gutuwa yani; mo kakua ni vakaberabera me yacova ni'u sa tukuna yani vei iko."

²⁵A sa biubiu sara o koya, ka lako kusarawa yani vua na tamata ni Kalou e na ulunivanua o Kameli. Sa qai yaco, ni sa raici koya vakayawa mai na tamata ni Kalou, Sa tukuna sara vei Keasi na nona dauveiqaravi, "Raica, na yalewa ni Sunemi!

²⁶"Au kerea mo cici sara ga oqo ka la'ki tavaki koya, ka tukuna vua, 'Vakacava o lako vakavinaka mai? E vinaka tiko beka o watimu? E vinaka tale tiko beka ga na gone?'" Sa tukuna sara o koya "Ena daumaka ga."

²⁷Ia ni sa yaco mai vua na tamata ni Kalou e delana, sa mokota sara na yavana, ia sa toro mai o Keasi me biligi koya laivi. Sa vosa yani na tamata ni Kalou ka vaka, "Biuti koya ga; ni sa rui rarawa vakaidina na lomana, ia sa vunia talega vei au o Jiova, ka sega ni tukuna vei au."

²⁸Sa tukuna sara o koya, "Au a kerea beka vua na noqu turaga e dua na gonetagane? E sega beka ni'u a cavuta, 'Mo kakua ni vakaisini au'?"

²⁹A sa tukuna vei Keasi, "Mo vakarautaki iko, ka taura na noqu i titoko ki ligamu, ka mo lako yani e na sala. Kevaka o drau sota vata kei na dua, kua ni veikidavaki kei koya; kevaka e dua e kidavaki iko, kua ni sauma; ia mo la'ki biuta ga na noqu i titoko e matana na gone."

³⁰Sa qai vosa o tinani gone ka vaka, "Me vaka sa bula o Jiova, ka sa bula vakakina na yalomu, au na sega vakadua ni biuti iko." A sa tucake sara ka muri koya yani.

³¹A sa liu sara tiko yani vei rau o Keasi, ka la'ki vakotora sara na i titoko e matana na gone; ia e sega ni dua na domo se dua na rorogo e voqa mai. Sa mani lesu tale o koya me rau la'ki sota, ka tukuna sara vua, "E se sega ni yadra rawa mai na gone."

³²Ia ni sa curu mai loma ni vale o Ilaisa, sa davo matemate tu na gone e na nona i davodavo.

³³A sa curu yani ki loma, sogolatia na katuba vei rau, ka masu vei Jiova.

³⁴A sa lako cake ka davoca na gone, na gusuna kina gusu ni gone, na matana kina mata ni gone, na ligana kina liga ni gone; a sa vakadre o koya e dela ni gone, ka sa yaco me katakata mai na lewe ni yagona na gone.

³⁵A sa lesu mai ka mai veilakoyaki tiko e loma ni vale, e lako cake ka lako sobu, sa baci lako tale ka vakadre tale e dela ni gone; ka sa tekivu me suru mai vakavitu na gone, ka dolava rawa sara na matana.

³⁶A sa kacivi Keasi ka tukuna vua, "Mo kaciva mai na yalewa ni Sunemi oqo." A sa kacivi koya sa ra o koya. Ia ni sa curu mai vei koya, sa tukuna, "Mo keveta cake na luvemu."

³⁷A sa curu yani o koya, cuva sobu ki yavana, ka vakacuva na uluna; a sa keveta cake na luvena ka lako yani.

³⁸A sa lesu tale ki Kilikali o Ilaisa, ka donuya sara ga e dua na gauna ni dravuisiga. Era a dabe tikivi koya toka na luve ni parofita ka vosa sara o koya vua na nona dauveiqaravi, "Mo vakatokara yani e dua na kuro, ka mo vakasaqara eso na rourou me kedra na luve ni parofita."

³⁹A sa lako yani e dua ki nai teitei me la'ki minika mai eso na rourou, a sa kunea e dua na wa e tubu wale ka vetia mai kina eso na timo ni veikau, ka vakasinaita kina nona i sulu, a sa lako mai ka roverovea kina loma ni kuro, ia era sega tu mada ga ni kila se na cava o ya.

⁴⁰A sa mani takivi sara yani vei ira na turaga mera kania. Ia ni ra sa kania tiko na ka o ya, e ra sa qolou mai ka vaka, "Na Tamata Ni Kalou, sa tiko vakaidina na mate ena loma ni kuro!" Era sa sega ni kania rawa.

⁴¹Sa mani tukuna o koya, "Dou kauta mai eso na valawa." A sa balata yani o koya kina loma ni kuro, ka tukuna sara, "Dou vota yani vei ira na tamata, me rawa ni ra kana." A sa sega ni dua na ka me gaga e na loma ni kuro.

⁴²A sa lako mai e dua na tamata mai Pali Salisa, ka kauta mai kivua na tamata ni Kalou na i sevu ni madrai, e ruasagavulu na i buli madrai parile, kei na sore ni witi dreu e na nona loma ni kato. A sa vosa ka vaka, "Mo solia yani kivei ira na tamata, me ra kania."

⁴³Ia sa mani tukuna vakaoqo nona dauveiqaravi, "Na cava? Me'u vakarautaka tu oqo e matadra na lewe dua na drau na tamata?" Sa tukuna tale o koya "Mo solia ga vei ira oqori, me ra kana kina; ni sa tukuna vakaoqo o Jiova: 'Era na kana kece ka so ena vo tu ga.'"

⁴⁴A sa vakarautaka e matadra, ka ra sa kana ka vo tu eso, me vaka na vosa i Jiova.