[12] 2 Tui 5

¹Ia o Nemani na nodra i liuliu vakaivalu na mataivalu i tui Siria, sa dua na tamata vakaturaga e na matai koya na nona turaga, baleta e na vukuna e solia kina na qaqa o Jiova kivei Siria. A sa tamata kaukauwa ka yalo qaqa, ia e tamata tauvi vukavuka.

²Era sa lako yani vakaivalu e liu na kai Siria, ka ra sa kauta lesu mai vakavesu e dua na goneyalewa mai na vanua o Isireli. A sa dauqaravi wati Nemani o koya.

³A sa tukuna o koya vua na nona marama, "Isa, kevaka me tiko mada ga na noqu turaga kei koya na parofita mai Samaria! E na rawa vua me vakabulai koya mai na nona vukavuka."

⁴Sa mani lako yani o Nemani ka la'ki tukuna vua na nona turaga, ka vaka, "Sa vosa vakaoqo na goneyalewa mai na vanua o Isireli."

⁵A sa vosa mai o tui Siria ka vaka, "Mo lako sara ga oqo, au sa na vakauta e dua na i vola kivua na tui Isireli." A sa lako yani o koya ka kauta vata kei koya e tini na taledi siliva, ono na udolu na sikeli na koula, kei na i sulu e rauta vakatini.

⁶A sa kauta sara mai na i vola vei tui Isireli, ka vakaoqo na lewe ni vola, Mo ni kila mada oqo, ni sa yaco yani vei iko na i vola oqo, ni'u sa talai Nemani na noqu dauveiqaravi vei iko, mo rawa ni vakabulai koya mai na nona vukavuka.

⁷A sa qai yaco, ni sa wilika oti o tui Isireli na nona i vola, sa dresulaka nona i sulu ka tukuna, "O au beka na Kalou me'u veivakamatei ka ia na veivakabulai, me tala mai kina o koya oqo na tamata oqo vei au me'u vakabula na nona vukavuka? Ia mo dou kila mada ka raica ni sa via veiqedravu vata kei au o koya oqo."

⁸Sa qai yaco, ni sa rogoca o Ilaisa na tamata ni Kalou ni sa via dresulaka nona i sulu o tui Isireli, sa talatala yani vua na tui, ka vaka, "Na cava o ni sa dresulaka kina nomuni sulu? Au kerea me lako mada mai vei au o koya, ka na kila talega kina o koya ni sa tiko oqo e dua na parofita e Isireli."

⁹Sa qai lako yani o Nemani kei na nona ose kei na qiqi ni valu, ka mai tucake tu ena katuba ni vale i Ilaisa.

¹⁰Sa qai tala o Ilaisa e dua na i talai kivei koya, ka tukuna, "Mo la'ki sili vakavitu kina Joritani, e na qai vakacokotaki tale na lewemu, o na qai savasava mai."

¹¹A sa cudru o Nemani, ka lako tani mai keya ka tukuna, "E dina, au vosavosa i yaloqu 'Ena lako vakaidina mai tuba o koya vei au, me mai tucake tu ka kaciva na yaca i Jiova na nona Kalou, ka me yalovaka na ligana i cake, me vakabula kina na vukavuka.'

¹²"E sega beka ni rau uasivi cake na uciwai oqo mai Tamasiko o Apana kei Faripari vei ira na uciwai taucoko e Isireli? E sega beka ni rawa ni'u sili vei rau ka savasava mai?" A sa vuki lesu ka lako yani e na yalocudrucudru.

¹³Sa qai toso volekati koya mai na nona dauveiqaravi ka vosa vua, ka vaka, "Na tamaqu, kevaka me tukuna vei iko na parofita mo cakava e dua na ka vinaka, e na sega beka ni rawa ni o cakava? E sa na qai vakacava sara o ya e na nona tukuna vei iko 'La'ki sili, o na qai savasava mai'?"

¹⁴A sa mani lako sobu ka la'ki tonidromuci koya vakavitu e na Joritani, me vaka na ka sa tukuna na tamata ni Kalou; a sa yaco me vuki na yagona me vaka na yago ni gonelailai, ka sa yaco sara me savasava mai.

¹⁵A sa lesu tale yani vei koya na tamata ni kalou, o koya kei ira kece na nona lewe ni sala, sa lako mai ka mai tucake tu e matana; ka tukuna sara yani, "Au sa qai mai kila oqo ni sa sega tale ni dua na Kalou e vuravura taucoko, e Isireli duadua ga; au sa kerea kina mo taura e dua na ka ni loloma mai vua na nomu tamata."

¹⁶Sa qai tukuna o koya, "Me vaka sa bula o Jiova, o Koya au sa tu e Matana, au na sega ni taura e dua na ka." A sa cikevi koya tikoga me taura, ia sa bese ga o koya.

¹⁷Sa qai tukuna o Nemani, "Io, kevaka e sa sega, mo ni solia mada ga vua na nomuni tamata eso na qele e rawa ni vakavodoki kina rua na meule; ni'u na sega ni qai vakacabora tale na nomuni tamata na i soro kama se dua na i madrali vei ira na kalou tani, vei Jiova duaduaga.

¹⁸"Ena veika oqo me vosota mada na nomuni tamata o Jiova; ni sa curu na noqu turaga kina vale ni soro i Rimoni me lotu mai keya, a sa ravi mai kina e ligaqu, ka'u sa mani cuva sobu e na vale ni soroi Rimoni “ ia ni'u sa cuva sobu e na vale ni soroi Rimoni, au kerea me vosota mada na nomuni tamata o Jiova e na veika oqo."

¹⁹A sa qai tukuna vei koya, "Mo lako e na vakacegu." A sa lako tani mai vei koya vakayawa vakalailai.

²⁰Ia o Keasi na dauveiqaravi i Ilaisa na tamata ni Kalou, sa tukuna, "Raica, na noqu turaga sa vakalaivi Nemani na kai Siria oqo, me kua ni taura mai na ligana e dua na ka e kauta mai; ia me vaka sa bula o Jiova, au sa na cicimuri koya mada me'u taura mai vei koya e so na ka."

²¹A sa cicimuri Nemani o Keasi. Ni sa raici koya mai o Nemani ni sa cici muri tiko yani, sa siro sobu mai na nona qiqi me tavaki koya, ka vaka, "E daumaka beka na veika kece?"

²²A sa tukuna o koya, "E daumaka tiko." Sa talai au mai na noqu turaga, ka vaka, 'E na dua na gauna lekaleka ga se qai oti oqo e rau a lako mai e rua na cauravou e rau luve ni parofita e rau a lako mai vei au mai na ulunivanua o Ifereimi. Au kerea ke rawa ni o ni solia mada vei rau e dua na taledi siliva kei nai lobi i sulu me katu rua.'"

²³Sa tukuna sara o Nemani, "Yalovinaka! Mo kauta sara ga yani e rua na taledi." A sa cikevi koya, ka vauca e rua na taledi siliva e na rua na taga, kei na rua na i lobi i sulu, solia yani kina rua nona cauravou, ka rau sa kauta sara e liu vei koya.

²⁴Ia ni sa yaco mai kina bai ni koro o koya, sa taura sara mai na ligadrau ka mai maroroya toka e loma ni vale; ka vakatalai rau yani na cauravou, ka rau sa lako sara yani.

²⁵A sa curu sara yani ki loma ka mai tucake tu e matai nona turaga, sa tarogi koya sara o Ilaisa "O a lako tu kivei Keasi?" Sa sauma o koya ka vaka, "Au sega ni lako tu kina dua na vanua na nomu tamata."

²⁶Sa tukuna sara vei koya, "E sega beka ni lako tiko kei iko na yaloqu e na nona suka lesu tale mai na tamata o ya me veitavaki kei iko? Oqo beka na gauna ni tauri i lavo, se i sulu, na olive, veivaini, na sipi se bulumakau, o ira na tagane se na yalewa dauveiqaravi?

²⁷"Raica, e sa na kabiti iko kina na vukavuka i Nemani kei ira na nomu kawa tamata, ka sega ni mudu." A sa lako tani mai vua ni sa kabiti koya na vukavuka sa vaka na uca vulavula.